Ur tettuklal Zalla tumliḥt

0 91

Yaru-t: Djamal AREZKI, LEZZAYER

Ilul deg Tezmalt, tawilyat n Bgayet deg useggas 1966. Yura yakan amud n tullisin “Akal d wawal” d-yefɣen ɣer tezrigin Tira akked d wamud n tmucuha “….

Lɣaci n uzniq ufella kkren-d s tergagayt ass-nni n tlata taṣebḥit n ugris d usemmiḍ imi i slan i leɛyaḍ d yimeǧǧiden d yisuɣan n “l’ambulance”.

Yeduqqes-d seg yiḍes Dda Muḥ:

– Ad iḥud Rebbi, d acu-t akka wa diɣen?
– Ad yeṭṭef Rebbi ayen yugaren aya! I as-terra tmeṭṭut-is Malḥa.

Tekker, tessufeɣ-d aqerruy-is seg ṭṭaq, twala medden meḥčučin ɣer uxxam n Lḥaǧ Ɛmer Uqirquc.
– Ay argaz, ruḥ ad twaliḍ d acu-tt akka twaɣit-a i yeḍran akka!

Iger Dda Muḥ msekref. Ur yezmir ara ad yazzel meskin, yerẓa-t zellum umeɣbun!

Axxam n Ɛmer yeqreb. Deg ubrid, iteddu yettxemmim ɣef umeddakel-is n taltin iseggasen. Yerra s wurrif tasfift n tudert-is ɣer deffir. Ha-t-an tura yuɣal alarmi d taxibuqt-nni i deg yezdeɣ deg Auberḍilliers, deg tama n ufella n temdint n Paris asmi yella dinna d aɣrib deg yiseggasen n 1970. Ha-t-an yurag-d akk lḥif-is deg yiwet n teswiɛt asmi llan zedɣen netta d Ɛmer, lǧar-is anda teḍra twaɣit tasebḥit-a!

Seg wasmi d-uɣalen ɣer tmurt yekfa fell-asen leɛtab d tnekra n zik deg usemmiḍ d yideflawen! Aṭas i ɛetben deg luzinat n ugafa n Fransa. Asmi iruḥ d ilemẓi yeǧǧa tameṭṭut lḥenni deg waccaren-is! Yettas-d tikkelt deg useggas ma yella kra i d-yessager. Ad d-yefk i baba-s, i tmeṭṭut-is, i watmaten-is, ad ixelleṣ ṭṭlabat-is… Mačči d yiwet.

Ad d-yezzi useggas, ad d-yaf yerna ɣur-s uqcic neɣ taqcict alarmi yesmed tnac: sebɛa n warrac, tiyiḍ d tiqcicin.

Ɣas akken tura gan akk ixammen, ur ten-yeṛwi ara, acku ur ten-yessin ara akken tissinen yimawlan tarwa-nnsen. Yettas-d yettuɣal am uberrani. Tarwa diɣen kifkif: Kkren-d gar tuzmiwin n leɛmum d lḥif n lǧiran. Mmi-s ameqqran akked yelli-s, asmi llan mezziyit akken kan kecmen s aɣerbaz, teḍra-asen tedyant ur nettwaqbal. Ar ass-a mazal ccama deg tfekka-nnsen d wallaɣ-nnsen masakit… Dda Muḥ, ur yezri tigert. Teffer fell-as tmeṭṭut-is.

Yiwen wass, yewwi-ten ɛemmit-sen amezyan ɣer lexla ad ksen. Lɛerbi d Wezna d inubiyen, gar tnac d 13 n yiseggasen. Deg lexla, yeḍra-d ayen i tugi tmetti : itɛedda fell-asen ɛemmit-sen Qasi i sin, yerna yeggul deg-sen lammer i d-qqaren kra! Uɣen-tent mkemmed msakit, sussmen. Alarmi d ɣas melmi i tesla yemma-tsen. Tewwet meskint agejdur maca, tessusem. Tugad imennan, tugad argaz-is ad ineɣ gma-s. Degmi tenɣa awal!

Mi temmed akka cwiṭ Wezna tamelḥant, tucbiḥt i ɣef yettcercur sser, tezweğ tlata n yiberdan! Wehmen medden ayɣer ur tesɛi ara “zzher”! Ar daxel ay ul! Zzher-is, yewwi-t ɛemmi-s Lɛerbi! Ala win yewwten d win yettewten i yeẓran d acu i yellan deg teylut!

Dda Muḥ yeffer aqerruy-is dihin deg Fransa! Yettkel ɣef watmaten-is. Rebɛin n yiseggasen ruḥen kan akka am targit. Yeqqar i medden mi ara testeqsin ɣef lɣerba:
– Ur ddireɣ dihin, ur qqimeɣ da deg tmurt gar warraw-iw d yimawlan-iw! Teḍra yid-i am bu tsekrin. Ur d-ṭṭifeɣ ula d yiwet. Ur rbiḥeɣ Rebbi, ur nziheɣ iḍebbalen!

Ula d Ɛmer meskin akken i as-teḍra ɣas akken meẓẓi cwiṭ deg laɛmer, yugar-it Dda Muḥ s sebɛa n yiseggasen. Yettmeslay iman-is, yeqqar:
– Tura nekkini dayen, jbiɣ. D acu ara sirmeɣ seg xemsa u-sebɛin n yiseggasen akkin ? D leɛtab kan i d-rennuɣ !

Yeḥrured alarmi yewweḍ s axxam n Lḥaǧ Ɛmer, yaf-d iman-is gar medden. Yezzi akka d wakka, iwala sin n yifermeliyen εeddan-d s nnɛac, gren-t deg tkamyunt-nnsen.

Dda Muḥ, yezzi ɣer yiwen n yilemzi, yesteqsa-t:

– D acu akka yeḍran a mmi?

– Azul a Dda Muḥ!

– Ssbeḥ lxir a mmi-s n Buḥu! D acu-t akka uxessar-a? D Ɛmer i yemmuten akka?

– Ala ! D yelli-s Zalla, tamaẓuzt-nni.

– Amek ? D acu i tt-yuɣen ?

– Anef kan a Dda Muḥ, waqila texneq iman-is. Yufa-tt-id lǧar-is tɛelleq ssbeḥ-agi ɣer temrart deffir n uxxam, deg tebḥirt-nnsen, yerna ur yezmir ara ad tt-id-isukkes, yugad ad as-d-yini kra Meqqran, mmi-s n lḥaǧ Ɛmer, yak tesneḍ-t amek i yuɣal!

– Ad aɣ-inǧu Rebbi! D tis tlata i yenɣan iman-is deg temdint-agi nneɣ n deɛwessu seg waggur-agi kan! Yaxi yir ddunit! Ay usan i aɣ-d-yegran! Ur twalaḍ ara d acu i d sebba?

– Ur ḥsiɣ ara a Dda Muḥ…

– Tanemmirt a mmi….

Dda Muḥ εerqent-as s tidet! Ur yezri anda ara yerr. Ad ikcem s axxam n umedakkel-is, ur yufi ara abrid seg lɣaci. Dɣa yefra-tt d rray ad yuɣal s axxam s yimir ara tres tegnit ,ad yerzu ɣer Lḥaǧ Ɛmer. Yewwi ul-is yeqquzber. Iteddu yettmelslay i yiman-is:

– Snat ledwar-a tineggura kan, sin n yilemẓiyen d tlemzit i yenɣan iman-nnsen, d sin nniḍen rewlen ɣer tmura n berra s tuffra, ddan deg teflukin timezyanin, xellsen acḥal d adrim yerna wissen ma ad awḍen neɣ ad ten-yečč yill deg ubrid!! D acu-tt akka twaɣit-a?

Awwah, tamurt-a tewwi daɛwessu neɣ dɛan-as Ṣellaḥ-is, ma tesɛa! Nekni nerwel-d seg tmura n medden, ilemziyen-a rewlen seg tmurt-nnsen! Ay axessar, yuɣal uqelmun ɣer yiḍarren! Zikenni necfa-d d irgazen kan i yittinigen acku terra-ten tmara, tura ula d tilemziyin diɣen! Nniqal ula d Zalla tebɣa akken ad truḥ ɣer Fransa ad tkemmel leqraya-s, maca yugi-as umcum-nni n gma-s bu učamar i isemman i yiman-is Abu Qutada! Wehmeɣ dɣa ansi d-yejber isem-a, neɣ d acu d-yesukkes i yisem-is n tidet: Meqqran! Yuɣal-asen d aɛegga deg uxxam iyi-d-yenna ussan-a baba-s, Ɛmer meskin! Ɣer ccib-is, ad yettnaɣ tura d mmi-s! Yuɣal ufrux yesselqaḍ baba-s: iḍeli kan i d-yekker, yeqqqar-as i baba-s d acu ara yexdem, d acu ur ixeddem ara, d acu yellan d leḥram d acu yellan d leḥlal… Seg wasmi akka d-yusa ccix-nni n lǧameɛ amaynut, tenneqlab tegnit fell-as. Iḥeṭṭer i “lḥalqat-is”, i temsirin-nni yal iḍ. Ur d-ikeččem alamma qrib ad yali wass. Mi yeɛreḍ Ɛmer ad as-yini kra, ad-t-id yečč, ad t-yessebleɛ. Yeqqar-as i baba-as d acu i tessneḍ keččîni! Kečč d akafriw, ur iǧuz ara ad ččeɣ deg yedrimen-ik n Fransa d wid-nni teffred deg lbanka. Yewweḍ alarmi d-yejbded kra deg-sen, yefka-ten i ccix-is! Winna iǧuz ad yečč adrim ur d-yessasi! Ma d baba-s yeṛwan aḥnunef deg lminat n Fransa, ur as-ǧuzen ara! Ha-tt-an tmussni tamynut d-yusan seg Ccerq! A ddunit i aɣ-yeggran!

Yewweḍ s axxam, yeḥka-as i temɣart, tewwet agejdur s lǧehd n tgerjumt-is!

Zalla (isem-is Zulixa), tella d tanlemadt deg tesdawit n Bgayet. Ur ɛad tesmid ɛecrin n yiseggasen. Tessen yiwen n yilemzi n uzniq-nni anda tezdeɣ. Isemm-is Yidir, mmi-s n Lmulud d Malḥa Uceṭṭub. Nutni n taddart n Yiɣil Usennan. Akken i ɣran deg tesdawit. D tiziwin. Yidir ifuk kan yunag ɣer Fransa ad ikemmel taɣuri-s. Zalla tebɣa ad teddu yid-s maca, amcun-nni n Meqqran iger-d taẓẓelt-is, yesluɣ-as tamda. Iḥbes-itt deg uxxam, yessels-as aqiḍun aberkan, yekkes-as tilizri d radyu akked tilifun seg wasmi tt-yeṭṭef tettemsawal ukud d Yidir, yerna tettaru-as s tawil n Internet. Seg wassen, tuffɣa ulac! Tikwal yettrebbi-t akken yeqqar meḥsub yettadam aɛekkaz ɣur-s. D acu kan d trebga yelhan: werǧin tt-yewwit s udem, werǧin s-yeǧǧi ccama. Akka i d terbga n Yinselmen i as-d-yenna ccix Abeɛli. Yettaɣ-as awal. Awal n ccix yeswa azal-is, “trebga” diɣen ur txuṣ ara!

Kra n wagguren kan yebɣa ad tt-yefk i ccix n lǧameɛ, ameddakel-is, ur icawer ara ula d baba-s d yemma-s. Deg wallaɣ-is netta, ixdem ayen yelhan acku d argaz, yessen, yeɣra ddin, yefhem. Akken s d-yenna Ccix Abeɛli, tameṭṭut ad tili ddaw n uḍar n urgaz. Netta yessen d acu yeffɣen fell-as, d acu ur tt-neṣliḥ ara. Tineslemt d tin ara yettaken azuɣer i urgaz: d baba-s, gma-s d ɛemmi-s neɣ d xali-s neɣ win yellan d imsewweq n uxxam ma ur tesɛi ara imawlan. Ccix Abeɛli d ilemzi ula d netta, yeffeɣ-d seg tesdawit. D yiwen bu uqendur akkenni am unebdu am tegrest, yerna tacacit tamellalt, kra n wanẓaden ttifriren ɣef wudem-is i ččurent snat wallen i wumi tezzi taẓult… Yettmeslay anagar taɛrabt tunṣibt.

Zalla ur t-tḥemmel ara. Ul-is yewwi-t Yidir. Asmi dukkulen, acḥal n yisenfaren i ssulin deg yixfawen-nnsen yeččuren d tirga d zzhu. Ma d tura, kra din, yerra-yas-t Abu Qutada d qeḍran d yili.

Yiwen wass yemmuger Dda Muḥ Ccic Abeεli deg yiwet n tmeɣra. Dɣa yeqqes-it winna, yenna-as (s taɛrabt tunṣibt):

– A Dda Muḥ, kečč d argaz yelhan, yeṣfa wul-ik, tesɛiḍ lxir…maca…

– Ad k-iɛuz Rebbi a ccix maca d acu?

– Bɣiɣ ad k-id-iniɣ maca seḍhaɣ!

– Tezriḍ a mmi, ma dayen yelhan, ur tseḍḥin ara yes-s medden, ma d ayen n diri, ulayɣer ad t-id-tiniḍ!

– Ala a Dda Muḥ, nek d aḥemmel ay k-ḥemleɣ! Bɣiɣ-ak ayen yelhan kan, daya!

– Ihi ini-d d acu!

– Tanemmirt ! Bɣiɣ ad waliɣ acimi ur tettẓallaḍ ara am kečč am yemɣaren n lbaraka nniḍen?

– Tamezwarut, d acu-t weɣbel i k-ikecmen ma ẓulleɣ neɣ qqimeɣ ? D kečč i d agensas1 n Rebbi deg lqaɛa? Tis snat, ayen i yes-s tumneḍ keččini, yella deg wallaɣ-ik mačči deg wayla-w! Tis tlata, nek mačči d Meqqran! Tfehmeḍ akka?

– Suref-iyi maca yenna-d Rebbi deg wala-is, tlaq tẓallit.

– Nek mačči akka iyi-d-yenna! Sḥesfeɣ!

Ccix Abeɛli, ur as-teṭṭif ara. Yejmeɛ ijufar-is, yekker iruḥ. Widen-nni yellan dinna, ṛwan taḍsa! Yeqqed-asen-tt Dda Muḥ musanwen s ṣṣwab d Teqbyelit i yettnawal akken iwata.

Aṭas n medden i yettxemmimen am netta maca ur ufin ara amek ara d-suffɣen tikta-nnsen. Assen dɣa ikmez-asen-d anda bɣan.

Ma d ccix Abeɛli, yewwi tiyita maca, iles-is am win n userdun: leggaɣ maca itečč isennanen. Yewweḍ ixdem-as tarbaɛt n yicenga i Dda Muḥ! Yerwi akk azniq-nni qrib ad yesker imenɣi gar yimezdaɣ-is! Yessaweḍ alarmi yekkes isem n lǧameɛ-nni yuran s tmaziɣt. Yefta-asen belli d leḥram.

Netta d Meqqran ur temfaraqen ara! Yuɣal taggar-nni yettawi-t yal iḍ s axxam s nneqma n baba-s d tin n Zalla.

Dɣa ihi ass-nni n tlata, Zalla yeččur wul-is. Tekker-d tafejrit, tga tamrart i yiman-is…

[1]: Agensas : représentant, délégué.

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *