UNGAL : Tasedna d-iggzen seg udrar – 5 –

0 28

 

 

 

 

 

 

Isdit-id udida n umekkalu seg tkellawt (sieste) . Iɣal is da itwarag. Isars iɣef ɣef wattag ar iswingim. « Mayed izemren ad issudu amekkalu g tizi-ddeɣ n wass g akw iṭṭeṣ iɣrem. Tafuyt terɣa amm uzerdab. Awed yan iɣiyen ad iffeɣ » ayed inna agensu n uqerru-nnes. « Γas mek-idd kan umagar ur issinen tamazirt !» Iduy iddeɣ iswangem g umagar. Isella i tawda tenyadda g iẓuran-nnes, ikti-d isdiddiyen n imsulta n Γris d winin unebbaḍ n Tinejdad. Ibedda, irẓem asfaylu, isugger ɣer tasukt. Yanany amekkalu awraɣ ibedda, iggez degs yan urgaz akw immɣen s tidi. Γas isars aḍar ɣef wakal issekmaḍen, ar isgingim, ar ireggem. Ibedda, iseksew ɣer tseggwin-nnes. Tasukut tura. Tezwa. Ur degs awed yan. Awed amalu irul seg iɣrem. Iɣal is illa ammas n udɣu . Isfeḍ tidi, yali ɣer amekkalu, iɣwejdem. Iqqen Bassu asfaylu, iggez ɣer tenwalt, iqqed i waman n watag. Netta ar iggar aman g uberrad, yiselli i titiwat ɣef teflut n taddart.
— Mayed iɣran ?
— Amɣar !
— Ggann !
Yugga iɣef i uberrad-nnes allig yuli, iddu ad irẓem tiflut. Ibedda umɣar g tizzit n umalu imunn d ugadir n tgemmi. Udem-nnes immeɣ s tidi, yaɣul amm kra n uherdun. Inna s umdaz :
— Gulan-d
— Mayed dd-igulan ?
— Imudmen (portraits) ! Amekkalu n imudmen !
— Ur ukizeɣ amya !
— Imudmen aɣ d-yuzen ugellid !
— Mayed nra ad nessker s umudem n ugellid ? Is da ɣifi tetteṣṣad ? Yak ku amezdaɣ ifra tinnes bla ul-nnes. Awed imezlaḍ ur yufin aɣrum bezzezen ɣifsen mesɣiwt n tunant-nnaɣ ur iffullisen i yawed yat.
— Fest ad ur ak yiselli kra !, ayed as inna umɣar tekcem tawda.
— Imaɣ allig g dd-teddid ad i-tsiweld ɣef uya ?
— Acku keyyin ayed asen innan nra imudmen !
— Ur nniɣ amya !
— Anebbaḍ ayed innan awal-a !
— Ikerkas !
— Ur i-iddi ka ! Tettred imudmen, haten ! Dɣik, rẓem tiflut n taddart-nnek ad tamẓed tasemɣwert-nnek !
— Kcem ad tsud atag !
Ikcem umɣar, iqqen tiflut, inna :
— Mayed trid ad t-ssekreɣ s umekkalu n imudmen ? Awed mani g tent sruseɣ ur ɣuri illi.
— Imaɣ allig tent-tetterd ! Aya ayed ugiɣ ad akzeɣ !
— Ur ǧin ten-ttireɣ !
— Maka ur nɣiy ad nrar asefki n ugellid ! Is trid ad aɣ gren g ukurmu ?
— Asefki n ugellid ! Medden ur ufin timẓin, ur ufin aman, ur ufin aɣerbaz, netta yazen-aɣ-d imudmen-nnes. Mayed nra ahenfur-nnes !
— Fest ! Han igidar lan imeẓɣan g tmazirt-ddeɣ !
— Mayed sskareɣ ? Mel-iyi areẓẓum !
— Ameẓ imudmen, teqqend imi-nnek ! Iwda. Hayyi ad ffɣeɣ add smuttreɣ iterrasen n iɣrem add nsuggez ixerḍan seg umekkalu.
Isxwabb atag g uḍangaz illan dat-as, iffeɣ. Isemmektid Bassu ass-nnaɣ amxib. Issen is ur ǧǧin issutir imudmen.

Itsen iyyar dat uya ayed imnala Bassu d wudamwen akw n iɣrem d Ḥasan wiss sin. Ur idd is ids mnalan udem s udem. Beddan, ku ig d-igula tanila n ka degsen iknu ard as issudem tadawt n ufus d tdikelt, yini «Tudert tazegrart i mass-nneɣ ». Iwda. Uwin-ten-d af ad knun, ssudmen afus, festen. Dat yiweḍ-nnes ɣer tmazirt, kigan n wussan ayed lan imezdaɣ tawuri. Zzdigen iberdan, ẓẓun isekwla, sbeddin ikenyalen ɣef tduliwin n tadderwin-nnsen ɣwman s ikenkel. Izeddig iɣrem. Awed imezdaɣ ur t-ukizen. Ibeddel wudem-nnes. Nekren-d isekwla g tasukin. Abrid ikkan inyama yaɣul iga ammi imeqqwur. Ku yass ar t-sswan imekkula n tɣiwant s waman ur ufin imezdaɣ awed i ttessi. G yirawen n iberdan, beddan ikenyalen ɣef iqwba iɣwman s yiniten n ukenyal. Iɣrem ilsa timelsa n tmeɣra, ar itganna ass axatar, win yiweḍ n ugellid iran ad irẓem (inaugurer ?) asenfar n usbedd n wuggug g yan waqqa yaggugen ɣef iɣrem. Awed adrar yuggan iɣef i tmazirt ɣzant, arun ɣef udmer-nnes kra n iwaliwen s tserɣint. Kraḍ iwaliwen. Sbeddan isekkilen s iselliwen, ɣwmen-ten s ikenkel.

isul

AKSIL AZERGI

Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.