UNGAL : Tasedna d-iggzen seg udrar – 4 –

0 66

— Ikka-d mass-nneɣ iɣrem-nnun aseggwas izrin. Issker-awen uggug !

— Nniɣ-ak kan wuggug ur illi ! Daccen mayed imes mass-nnun ?

— Is trid ad nn-tensed akurmu, midd tennfeld ?

— Uhu ! Riɣ ad isineɣ !

— Da sawaleɣ ɣef ugellid!

— Ih ! Ass amxib ayed iga wass-nnaɣ ! Axub n waḍu d usselku. Ur sar t-ttuɣ.

Isreḥ waggwu n wagirru i umsaltu ibeddan iddeɣ isella i wawal-ddeɣ. Inna :

— Alem i yimi-nnek ! Hayyi ad geɣ ammi ur sellaɣ i mayed tennid !

— Ssenkren aqqwur d udida. Sxuben aḍu i yimezdaɣ ar ɣifsen skirkisen. Ukren-asen tikḍifin. Ar tigira ur illi umya. Ur sbeddin uggug ula imdez awed yan.

Yukez umsaltu awal n Bassu, inna-as :

— Aya ssneɣt, issinent akw medden,  maka ku yan ifesta, isseknu iɣef-nnes ɣas af ad ittec taɣrumt-nnes.

— Ilaq ad reẓmen imawen. Ku yan ad yini ayenna yukez mek tra tmazirt-ddeɣ tigellint ad teddu ɣer dat. Tannayed addad n ubrid ger Γris d Tinejdad. Ur da akw sawaleɣ ɣef ubrid ɣer Aɣbalu n Kerdus.

— Iwda n wawal. Mek ur ɣifneɣ tfestid ak azneɣ dɣi ɣer Imtɣren. Nitni ak aznen ɣer Ameknas neɣ Tamesna. Ad zlen anaɣiz-nnek ddaw wakal. Hayyi ak aǧǧeɣ ad tuɣuled ɣer iɣrem-nnek, maka ilaq ad tisind is tellid dɣik ddaw wallen-nneɣ.

— Ur sskireɣ aḍu ! Wenna ur isskiren urda itteggwed !

Iffeɣ umsaltu. Isella uwessar i teflut allig temneqqeṛ. Imiq ikcem-d yan umsaltu yaḍen, inna-as :

— Itsen iseqsiten yaḍen, aǧǧeɣ-k ad teddud !

— Mayed trid awed keyyin ?

— Illa ɣurrek umudem n ugellid g taddart-nnek ?

— Illa ɣuri win Benyusef yugel g uḥanu n inegbawen !

— I win Ḥasan wiss sin ?

— Ur ɣuri illi !

— Dɣi ayed ukzeɣ imaɣ allig-as tennid: «Nra udem-nnek » !

— Mami nniɣ awal-nnaɣ ?

— I ugellid !

— Ur t-nniɣ !

— Aya ayed illan g ukaram-nnek !

— Mayed riɣ ad ssekreɣ s wudem-nnes ? Netta ayed innan ad aɣ d-irar aman g wuna, neɣ issaley uggug ?

Ibedda umsaltu, iɣra i sin yaḍen, inna-asen :

— Wa azen-att ɣer Imtɣren !

Nnan-as g yiwt tikkelt :

— Asekka g tifawt ad nn-tilid g Imtɣren.

— Is tɣalem is sulaɣ iberdan. Ur ddiɣ ! Ad uɣuleɣ ɣer iɣrem-inu. Ayenna ɣurrun ad t-tessekrem, tessekrem-t. 

Iffeɣ-d seg temsulta, ibedd g imi allig ibbey taseɣra as-fkan dat wallen n imsulta, yameẓ abrid ɣer asarag n iṭaksiyen. Iɣwejdem g yan usasu kud itganna aṭaksi, itetta ddaw tekwut. Netta imda, yinniy anesmaddu irẓem-as-d uzeglal, iɣley abrid, iger-as afus. Iddeɣ ira ad iney yannay yiwen g imsulta iddad g tnila-nnes ar as-d ittini kra. Ur tt degs yuwiy.

Yameẓ abrid ɣer Tinejdad. Imrara g iɣef-nnes iwaliwen n unebbaḍ d winin imsulta, ur yukiz amya. Iwta s ufus, isnem takerziyt afella n iɣef-nnes, iɣerd g useggawer. Illexsey. Ur d-inkir ar Tinejdad. Isella i kra n yiwen ar ittini : « Tinɣir … Tinɣiiiiir … tin … ɣir snat ayed d-isulen… Arfud a lalla. Arfud … Arfud …

Iggez-d, iseddref tisurifin ɣer asebded n imekkula ittawin ɣer Aɣbalu. Yufa-nn ameggaru, iney, iɣwebbez diɣ g unuddem.

isul

Aksil Azergi

Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.