UNGAL : Tasedna d-iggzen seg udrar – 3 –

0 44

 

 

 

 

 

 

Inker Bassu Kujan ɣer Γris. Igula-nn ikcem ɣer amaris n temsulta. Γas inna isem-nnes i yan umsaltu iɣwejmen ɣef useggawer g ugnir , inna-as :
— Qqim da !
Ibedda ar iseksiw tiseggwin-nnes. Γef ugadir uglent kigan n tewlafin n iregzen d twetmin. Ur issin ad iɣer, maka yukez is da ten-tnada temsulta. Ibbey wawal n umsaltu tagatut n iswingimen :
— Addud !
Inna-as Bassu :
— Ini-i mayed illan a mass ! Axes ur idd memmi ayed immuten.
— Ur t-yaɣ umya ! Key ayed nra ! Kcem.
Irẓen tiflut n yan umaris, icekcem-t, inna-as :
— Γwejdem !
Irẓem umsaltu yan ukaram , inna i uwessar :
— Bassu Kujani,
Irura-as agensu-nnes : Kujan a yaɣyul !
— Tlula-dd g 1912 g Uɣbalu n Kerdus. Dɣi tezdeɣ-d g Taɣya n Yifeɣ. Tameṭṭuṭ-nnek temmut kigan n iseggwasen aya …
Immuɣey wul-nnes iddeɣ isawel umsaltu ɣef tmeṭṭuṭ-nnes tigellint n Tidir N Ayt Tɣanimt. Ibbey-as awal, inna :
¬— Ssfeld a memmi ad ak siwleɣ. Urd ddiɣ seg Uɣbalu n Kerdus ar Γris af ad isineɣ addad-inu ametti. Ini-yi mayed tram. Ur sulaɣ tiwadiwin. Ṛmiɣ seg iberdan d id « ddu ar asekka». Kra ur t-sskireɣ. Ur nɣiɣ awed yan. Ur ukireɣ …
— Ssneɣis ur tesskird amya, maka tsawled !
— Trid ad ur siwleɣ ?
— Riɣ ad tisind mayed ttinid. Ku awal tennid llan medden t-id isselkamen. Nessen mayed tennid !
— Mayed nniɣ ?
— Ur idd dɣi !
Iɣra i yan umsaltu yaḍen, ikcem-d, inna-as :
— Awi-t !
Yusi umessaltu akaram, isikk Bassu dat-as allig t-icekcem i yan umaris yaḍen. Degs ɣas yat tdabut ammas d sin iseggawern. Ur yaɣ g imarisen akw yannay. Iɣwejdem. Irẓem umsaltu akaram, iqqim ar t-isniɣis, imiq yasey allen g Bassu, inna-as :
— Kujani !
— Kujan. Bassu Kujan !
— Ur idd imki. Twessired ɣef uya. Maka ssneɣ idd kra n yiwen ak icuccin !
— Ur ukizeɣ awal-nnek ! Maɣef da tsawald ?
— Iqqwur-ak iɣef !
— Ini-yi mayed illan. Iwda n temlellay !
— Tellid g kra n ukabar asertan ?
— Mayed igan akabar asertan ?
— Tellid g kan tmesmunt ?
— Mayed igan tamesmunt ? Hat ur ssineɣ maɣef da tsawaled !
— Tellid g kra n unmalu ?
Ifesta Bassu. Ur as iruri. Iddem umessaltu ar itturu g ukaram. « Yugi ad irar ɣef iseqsiten. Iga ammi ur da ittakez mayed as ttiniɣ.»
Isbedda tirra, iseksew g Bassu, inna-as :
— Dɣi teggri-dd ɣas keyyin ! Tannayed. I mani dɣi williɣ ak innan siwel s yisem-nneɣ ?
— Is tɣaled idd taslemya ayed giɣ ?
— Mayed msen imeddukkal-nnek ?
— Ayt iɣrem-inu imeddukkal-inu ayed akw gan !
— Nitni ayed ak innan ad tsiwled s yisem-nnsen ?
— Awed yan ur i-yenni, ur nniɣ i yawed yan.
— Ssneɣ is ur trid ad tezznezd awed yan, ssneɣ tixxitert n yiman-nnek d tirrugza-nnek, maka, mek ur tsawled hat keyyin ayed inna ad iddu ɣer akurmu .
— Akurmu, imaɣ ?
— Ssfeld. Amɣar n iɣṛem inna-aɣ mayed illan. Issen mayed tennid.
— Iwa mek diɣ tessned, ini-yit !
— Riɣ ad as talsed keyyin.
— Maka ka ur t-nniɣ. Ur ɣuri mami ttalseɣ.
— Tezgeld, tennid !
— Ur zmireɣ ad ak alseɣ i mayed akw nniɣ !
— Imaɣ ?
— Seqsa iman-nnek ! Awed yan izemren add ikti ayenna akw inna.
— Trid ad tinid is tsawled, maka dɣi tettud mayed tennid. Tɣiyd ad tettud, maka Amexzen ur da ittettu !
— Ur illi umya ger-i d umexzen !
Inker umsaltu, ibedd, iddem ar itteddu, ar ittettey i tdabut. Kud itteddu iɣerref iḍarren-nnes i wakal, inna :
— Yuf-ak is tsawled !
— Ur ɣuri mayed nniɣ !
— Ales-i mayed tennid ! Ur tezmird acku tegwded midd ur trid ?
— Ur ggwideɣ acku ur nniɣ ula ssekreɣ ! Ssfeld ad ak iniɣ. Nek ur sulaɣ. Ini-yi mayed trid. Iwda n ukeccum d wufuɣ g wawal.
— Nekkin sulaɣ ! Amexzen da i-iferru af ad ssekreɣ tawuri-ddeɣ ! Amm nekkin amm memmik ! Ifassen n umexzen ayed akw nga. Ifeckan-nnes !
— Amm memmi ? Netta aserdas ayed iga. Da itnaɣ mgal n icenga. Keyyin tefferd da g umaris ar tesdiddiyed argaz awessar ! Matta tsuta-ddeɣ !
— Memmik ayed ak innan ayenna tennid ?
— Ur t-annayeɣ sin iseggwasen aya. Ur ssineɣ is idder midd immut. Ttu memmi.
Iffeɣ umsaltu, iqqen tiflut. Iqqima Bassu ɣas netta. Yuki d laẓ iẓbert. Ibedda, yiselli i kra n yiwen iṭṭas tiflut, ar ittini : « Γas ddu ! Awey-id imekli. Amm ku yass.» Ikcem-d yan uterras, inna i Bassu :
— Axes ur k-yaɣ laẓ ?
— Inɣa-yi !
— Ggann imiq. Dɣi add awin imekli !
— Aganni ag ddreɣ kigan n wussan ay-a ! Waqila tram ad i-tamẓem da … Hat ur ukizeɣ mayed tram.
Iɣwejdem uterras, inna-as :
— Ini-asen ayenna ran, rẓemen-ak !
— Ur nniɣ amya ɣef umexzen. Ur t-rgimeɣ. Uwiɣ-tt g iɣef-inu d twuriwin-inu.
— Ur qqimin allig ṛmin, ɣrin-ak-d !
— Kwenni ayed issnen !
— Γas semmektey ! Γez g twengimt-nnek ! Rar-tt ɣer deffer … itsen iyyar neɣ itsen iseggwasen.
— Iseggwasen ?
— Aseggwas izrin, mayed ijṛan g iɣrem-nnun ?
— Kigan n tɣawsiwin. Ur ɣiyeɣ add semmektiɣ ayenna akw ijṛan g iɣrem. Tamektit-inu teṛmi. Twessir amm nek.
— Ur illi kra n usemmekti ak iqqiman g twengimt. Ur iri ad t-iffeɣ ?
— Ih !
— Matta netta ?
— Ass g yuwi ungi Tidir, tameṭṭuṭ-inu. Tedda ad tezdem !
— I yasif-nnaɣ tt-yuwin, is ila uggug ?
— Uhu. Nsul da t-netganna !
— Illa degs wuggug ! Mayed ttinid ?
— Ur degs illi ! Nek zedɣeɣ g yir n waqqa-nnaɣ 40 n iseggwasen aya ! Keyyin ur tessind awed mani g illa Yifeɣ !
Iga umessaltu ammi ur as isella.
— Tennid ayenna tennid acku asif yuwi tameṭṭuṭ-nnek !
— Ur nniɣ amya !
Ibedda utarras, issaɣ i wagiṛṛu, inna-as :
— Ikka-d mass-nneɣ iɣrem-nnun aseggwas izrin. Issker-awen uggug !
— Nniɣ-ak kan wuggug ur illi ! Daccen mayed imes mass-nnun ?
— Is trid ad nn-tensed akurmu, midd tennfeld ?
— Uhu ! Riɣ ad isineɣ !
— Da sawaleɣ ɣef ugellid !
— Ih ! Ass amxib ayed iga wass-nnaɣ ! Axub n waḍu d usselku. Ur sar t-ttuɣ.

Isul …

Aksil Azergi

Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.