UNGAL : “Tasedna d-iggzen seg udrar” – 1 –

0 184

 

 

 

 

 

Ibedda Bassu Kujan, iger tiṭ ɣer deffer. Yannay isignew n ugeḍrur umlil issenker umekkalu d-ikkan abrid igezmen amerdul izwan amm isinser n ifiɣer. Yuki d wul-nnes ifessus amm yifer. Imdez agensu-nnes. Ibedda g yir n ubrid ar t-itganna. Ifadden-nnes ṛmin. Allen-nnes nɣan-tt. Aɣulent amm tirrgin. Zeggwaɣent. Ar suddument imeṭṭawen irɣan. Isars ɣifsent iḍudan-nnes izuraren, imzitent. Yuki d usgunfu yulid agensu-nnes iddeɣ iqqen allen. Ammi ickecta aman ɣef tirrgin as issekmaḍen agensu n yiman.

Irẓem-d allen ɣef igli (horizon) ɣef-d tuley tafuyt. Asidd-nnes amelwaɣ ifser ɣef umerdul amm ikḍif. Ur ǧǧin ibeddi, g tudert-nnes, ad immatter iley neɣ aɣelluy n tafuyt. G tur-nnaɣ, yuki ammi da ittidir ass ameggaru g tudert-nnes. Iddem ar isniɣis amerdul, asidd, imɣin ammi-dd tikkelt tamezwarut ten-ittinniy.

Isars afus ɣef ugerḍ-nnes, imri-t. Issekna iɣef, yinniy areksen-nnes idlan s wakal unɣid n ubrid. Yuki d uduhdu. Laẓ ar inebber adis-nnes s imegwran, maka ur as iki wul-nnes ad ittec. Agensu-nnes da itwaɣ. Immuɣey. Iɣef-nnes ar ittendu. Isars ifassen ɣef ifadden, yarem ad irar. Ur d-iffiɣ seg imi-nnes ɣas yan ilezdi n waman iwraɣen. Islatef ɣef wakal, ildid tarḍumt n waman seg waqrab-nnes azeggwaɣ allig iswa. Iqqim ibedd, immatter tafuyt d-ittalin. Kudd ittenmala ugeḍrur, ittakez amekkalu awraɣ n Yidir Uhzi.

Ur issin seg mantur ayed d-iffeɣ seg taddart-nnes g Taɣya n Yifeɣ. Kra n temrilt ur ɣurs telli. Iduy-d ammas n yiḍ ammi t-iqqes kra, ilsa iselsa-nnes, iger aɣrum d tiyni g ugunun n ujellabiy-nnes aqbur, iffeɣ-d seg taddart. Awed udem-nnes ittu ur t-issard allig d-ilkem asif. Iwta ifassen g waman isemmaḍen amm ixwedmiyen allig iswa, issird. Isfeḍ udem-nnes s ufus n tjellabiyt, inker, imun d ubrid. Ur issin mayed ira unebbaḍ n Tinejdad allig as d-iɣra. Amɣar n iɣrem ayed as-d isslekmen aneɣmis, maka ur as inni amya. Awed netta ur issin. Immuɣey wul-nnes. Inna waqila memmis Muḥa igan aserdas ayed immuten. Igrures wagensu-nnes. Ur akw igin. Iqqim ad irezzu agensu n twengimt-nnes, ar izerru ussan-nnes, ar isemmektay mayed akw inna netta d imeddukkal-nnes. Ur yufi amya. Iqqim imuyed. Iggwed ad yili kra n yiwen isselkem-nn kra n wawal inna, neɣ kra n uneɣmis. Issen is gan inebbaḍen n tmazirt amm iyḍan isiḍen, is ḍufen iwaliwen d imussuten n imezdaɣ. Issen awed is ɣursen icekkamen g mayed igan iɣrem. Issen is zemren ad t-nɣen, neɣ zlan anaɣiz-nnes. Iswangem diɣ agensu-nnes, inna : « Ur sskireɣ amya ! ». Issen agensu-nnes is ur isskir yat, maka ul-nnes ikkucem s tawda.

Ibedda umekkalu nil-as, iney. Iddeɣ igra aḍar ɣer agensu, yaki s usgunfu. Illexsey ɣef yat txenciyt n imendi. Yufa-nn imessukal ṭṭṣen. Ur isawel i yawed yan, iqqim ar iswingim, immater ageḍrur issenker umekkalu, yuli ɣer igenna, ar itseggam udmawen n iwaɣzniwen, n taririwin, n ineglusen … maka unuɣen rekkiẓen amm wul-nnes.

Ar d-ttali tafuyt iddeɣ d-ilkem umekkalu abrid axatar ittawin ɣer Tinejdad. Yuwit imiq n unuddem. Igen iddeɣ ur yad da ittemhiqqiy umekkalu awessar. Ikḍa aḍu n uɣrum irɣan ar itteg tigelgaḍ i tyenzar-nnes, yakez is d-yuweḍ. Asebded n imekkaluten ittawin ɣer Aɣbalu n Kerdus, Ifeɣ d Igwedman, illa tama n bu uɣrum. Ismatter tiɣawsiwin-nnes, iggez. Inna-as-d Yidir, amessudu :
— Amm ku yass. Uɣul-d ɣur temrilt tiss kraṭ. Ad ur tmaḍaled.
Yuli tasukt as d-ikan udem, ikcem g tmezwarut ɣef uyeffas. Kud itteddu itneqqar ajellabiy-nnes imellulen s wakal unɣid. Isɣa-d snat tacfenjin g yat tḥanut, yuɣuled ɣer tama n usebded. Ikcem ɣer asasu n Uεjud. Itter aberrad n watag. Iɣwejdem, isnem takerziyt-nnes. Yufa-nn kigan n imesdurar ttin i yiberraden ar sawalen ɣef watig n wactal g ugdez. Iktid idd ass n ugdez asuynan g Tinejdad. Yusi allen ɣer bu usasu ittekkan ger imgeddzen ar isrus tiberradin n watag ɣef tdabutin, mlalant wallen-nnes d tin Hasan Wissin. Amudem-nnes ttuten-as wakwmamen ɣef ugadir. Ččant yizan. Iberrkin. Ičča, ifru, iffeɣ. Iggez tasukt g illa usasu, izri dat kigan n tḥuna d isasuten ireẓmen, izdi tawada allig nn-inmala tigira-nnes, yameẓ tin uzelmaḍ. Yannay dat-as asebded n unesmaddu d iṭaksiyen ittawin ɣer Ɣris, Imtɣren d Arfud. Ɣef uzelmaḍ-nnes amaris n tesreqqest (le bureau de poste).
Iɣley abrid, imun d yir n ugadir n teqcelt n imxezniyen allig nn-ilkem imi n umaris n unebbaḍ. Iseqsa amxezniy iḍufen imi, inna-as :
— Ad irẓem g uzgen n temrilt !
— I mantur ayed d-itteddu unebbaḍ ?
— Awed yan issnen a Mass ! Mraw, neɣ mraw d yan. Itsent tikkal ur da d-itteddu ar ammas n wass ! Ku yass d winnes !
Iɣwejdem ar itganna.
Irẓem umxezniy iflew, ddmen medden itgannan g imi ar keccmen ɣer agensu. Ikcem awed netta. Inmala ɣer yan umxezniy yaḍen ibeddan g imi n umaris n unebbaḍ, inna-as :
— Ira unebbaḍ ad i-yinniy ! Is illa ?
— Ɣurrek kan tseɣra ?
— Uhu. Amɣar ayed it innan. Ur i-iki aḍu.
— Ggann !
Ikcem allig iseqsa amaray (secrétaire) n unebbaḍ, iffeɣ-d inna-as :
— Anebbaḍ ur ɣurs awed yan usihar (rendez-vous) tifawt n wassa !
— Yah ! I mayed dɣi sskareɣ nekkin ?
— Ur ssineɣ ! Ssker ayenna trid ! Ur i-iddi kra !
Ifesta, imiq inna i umxezniy :
— Memmi … riɣ hill ad isineɣ idd Muḥa-inu, aserdas (militaire), ayed yaɣ ka. Idd ɣifs a ɣef id-ɣran ? Is immut midd idder ?
— Mer idd memmik is ak nn-isselkem umɣar aneɣmis. Ur idd netta. Kra yaḍen a ɣef ak iɣra.
Yuki d tawda-nnes tafraw, innarẓem wudem-nnes, medzent tfiras-nnes. Inna-as umxezniy :
— Ddu ad tɣwejdmed ! Add igulu, iniɣ-ak-t !
— Waxxa a mass !
Iffeɣ-d ɣer dat umaris n unebbaḍ, iɣwejdem g umalu ar itganna. Meqqar iffeɣ umedlu n tawda ul-nnes, isul wagensu-nnes irwey. Iduy. Ibedda iddeɣ yannay anebbaḍ g thirit-nnes tumlilt, iseddref tisurifin ɣer agensu. Imgar-nn yids g imi n umaris-nnes, inna-as :
— Mass !
Ibedda unebbaḍ, iseksew ɣer amxezniy, ishiww :
— Matta wa ?
— Inna-i trid ad t-tinniyed a mass ! Iddad seg Yifeɣ.
Igra degs unebbaḍ aseksew, inna-as s ushirr :
— Mayed igan isem-nnek ? Siwel !
— Nekkin ayed igan Bassu Kujan!
— Ggann da ard ak d-iɣer umxezniy !
— Waxxa a mass !
Yaɣul Bassu ɣer deffer. Anebbaḍ netta iseksew ɣer amxezniy, inna-as :
— Ad usar ttaǧǧad awed yan ad id iger itnan imki !
— Ssurf-iyi a mass !
Iɣwejdem diɣ ar itganna. Kud iseksiw medden ikeccmen ar tteffɣen, ittini agensu n twengimt-nnes ittuten : « Mayed i-ran ?»
Inker diɣ, inmili ɣer amxezniy ibeddan g imi n umaris, inna-as :
— Kigan ay-a tgannaɣ. Nek ur sulaɣ aɣwejdim. Ɣuri mayed sskareɣ !
— Anebbaḍ iffeɣ. Idda ɣer agdez !
— Ur t-annayeɣ !
— Iffeɣ g imi yaḍen yakkan ɣef teqcelt !
— Iwa mayed sskareɣ nek ? Ad diɣ gganneɣ ? Is tɣalem is sulaɣ.
— Uɣul-d tameddit !
— Ad qqimeɣ ar dd-yuɣul !
— Wenna trid !

Iffeɣ imi n umaris, iddu ar ddaw ugadir n tesreqqest, iɣwejdem ɣef yan iselli. Iẓra amxezniy allig irgel iflew, issen is d-ilkem wammas n wass. Iwta afus g ugunun, ildid taberruyt n uɣrum d kraṭ tiyniwin. Ičča tiyniwin, iseṭfur-asent aɣrum. Iga ammi da itfeẓẓa aluḍ. Aɣrum ur ɣurs iqqimi waram g imi-nnes. Yuki d waman irẓagen ulin-d seg iseknaf-nnes, iknu allig irura. Iffeɣ adɣar, iddu ar ddaw itsen isekwla ifkan udem i umaris, iɣwejdem, iḍuf iflew, yawit imiq n unuddem. Iddeɣ d-ifafa, yannay amxezniy ar t-diɣ ireẓẓem, inker. Inmalad ar imi, iqqim ibedd. Yuki d iḍarren-nnes is ur yad zmiren ad t-asin, iɣwejdem diɣ. Ɣas isers tizukin ɣef wakal, yinniy tihirit tumlilt n unebbaḍ ar d-ttenmili, inker, iger-as itnan. Iggez-d unebbaḍ, inna-as :
— Ssuref-i a mass !
Ur ẓars igri awed aseksew, ifel-t g udɣar amm umnir, ammi ur illi. Ikcem ɣer amaris. Ikka deffir-as, yamm-as umxezniy, inna-as :
— Ggann !
— Rmiɣ seg uganni !
— Nniɣ-ak ggann, yuf-ak !
— Ur sulaɣ ! Ggunniɣ, iga ammi ur lliɣ, nekkin ad uɣuleɣ ɣer iɣrem-inu. Mek ɣurs mayed isskar, issker-t.
— Yuf-ak is teggunnid ! Ssfeld i wawal-inu. Ur tessind amexzen !
— Ad gganneɣ imiq, mek walu, qqen ad dduɣ iberdan-inu !
— Ggann !
Iɣwejdem diɣ ddaw ugadir g tafuyt, ar itganna. Yannay anebbaḍ allig d-iffeɣ, iney tihirit-nnes, iddu. Iqqim ar itganna allig teɣli tafuyt. Anebbaḍ ur d-yaɣul. Amxezniy ar ireggel iflew. Inker Bassu, inna-as-d umxezniy :
— Uɣul-d asekka !

Isul ….

Aksil AZERGI

Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.