Asafar LIHI

TUDMAWIN N YIWEN YIḌ

0 78

Iffeɣ-d Umnay g tesdawit, tifawt n umhad (jeudi), yakel ɣef uẓru s uɣaram asdawan ( cité universitaire ) afad iwet anzaf. Sulent ɣures g uḥanu snat teglay d yat tẓalimt, ayenna s ittekkes laẓ. Netta nn-ilekmen imi n teflut iwet-t-id waḍu n usemri. Ikjem isres aεdil-nnes ɣef useggiwer (chaise) hat walu awedyan g uḥanu inna ingeras d iɣef-nnes: «uff ! nniɣ ikka diɣ Masin ɣef imekli », isul da isawal, iffeɣ-d Masin g dduc ar d-itteqqen tasergelt n userwal-nnes. Dinnaɣ ikcem-t adwal usurdu (doute) innexrireḍ s uxriḍ, yafet-inn da isinṣig. Nezdeɣ d icentan ṣafi, awed aman dɣad ɣifneɣ ten-tebbim, tekksem ɣifneɣ iεban, s uzεaf isawel Masin, ṣafi ṣafi ad mmteɣ nekk afad tedder-d key. Inzeɣ Masin imkiddaɣ g tesmneqqer, taggunt g igdi, isikk acebbuḍ inger iḍaren.

Amata g imezraw rḍelen-as, udem s ittetter ur iqqimi, iṛcey Umnay iɣef g tmattagt (oreiller) ar ittinig iṭṭes. Ittu εniɣ is ur da ttmunen, buheyyuf d unuddem. Ad tinid ka n unuddem id ad t-iwet, ḥeṛmas. Mayed ila wammas n wass ittenneqlab. Insa-iss yad iḍgam, ur igi laẓ n wassa win ussikel.

Yuwet tikkelt ayed iferdedda, iburksen i iḍaren isseɣley, lfista ɣef iɣir igra, ig dikes Cumaxer. Ika-t Sswisi i Ugdal, ik-t Ugdal i wammas n temdint, Tamesna. Dinnaɣ altu s ɣur umeddakwl-nnes, iman s iman, Wilyam aburkinabiy. Wa netta imnala-t Umnay yuwen wass, ayed i-yenna, g ka g tsedlisin-ddaɣ n idlisen iqburen g Legza; dinnaɣ ag myassan. Wilyam yufa diges ameddakwl, Amnay, netta, da ittemaεḍar ɣef iberrkanen, mud-nnes tasekla-nsen. Nettat a ɣef iswurri g usenfar-nnes n tezri (recherche) g tesdawit. Isqabba-as tiflut, iserser-as kan snat tikkal allig walu mayed ireẓmen tiflut, iɣerḍ dat ligliz.

Meqqar t-inɣa laẓ ibbey-as muḥul tayafuft (billet). Ur t-id-isfafa xes iferɣusen (brodequin) n ubulusiy s uḥruy uzzif, ddiyisetti uxla. Nuḍ, ayed as-inna, ḍewwer rrwayeḍ, yallah nuḍ tqewwed ! Ig Umnay ad iddu, ijennef-t wayeḍ ireẓẓi, iqelleb-as tirufa, yaf diksent takarḍa d yiwen iɣes n tiyni. Urgun-iss ireẓẓan s jjip ad t-sqerran.

Ur nn-ikki ɣursen xes kan imik yuɣul-d, ufan ɣures g tkarḍa Tizi n Imnayen rẓemen-as. Abulisiy ugg Rric ayed iga, U Izdey.

Meqqar issen nwis id ad as-d-yagel iɣimi g imi n Ligliz awal yaɣul ẓares, immɣerd g irbi-nnes. Ur iqqimi g udis-nnes umya, ismar-as lmaẓuḍ, ixsey, igen. Llig ɣrant takwzin, lεaṣer, g tmezgida n Ssunna ifafa-d, ar ikkat wiyha. Ittex ur as-irziq Rebbi ṣṣbeṛ iddu nnik s tmezgida allig ten-iεlaḥal yurri-d. Isul da itteddu han mayed as-ikkaten ɣef iɣewrdan, iḍur hat Wilyam, dinnaɣ ayed yusey unfus.

Xes tegra-t-inn Ligliz s agensu ar issa idammen Yasuε ar isemxuzzu aksum n Lmasiḥ, irεeb diges Wilyam maka issen id laẓ ayed t-inɣan irul s afella. Mṛaḍa mṛaḍa han yat tεerrimt, taseggant awed nettat, tsaggez-as-d aẓuḍa n seksu. Ur as-igi Umnay xes ad t-tesres isennextutem-t. Ar diges ikkat allig ibzey uεebbuḍ-nnes, yazen afus isrey tastawt (ceinture), yaɣul s uẓuḍa amm bexxu. Kammla ar ittini ad yamm isuggez-as-d Wilyam tarḍumt (bouteille) n uẓeggwaɣ, tsettu-yas aseksuten.

Nnant tin wučči llahukbar inna-as Umnay i uẓeggwaɣ aḥafiḍ, da issa inter ṭaba tawraɣt. Awal xla taɣbalut ayed ittegga Umnay ig ileqqey i warrub (vin), seg lεedluliḥsan ar Micil SYUṚAN, tekwcta tussna. Awal ur inni ad ismur, tillas uwɣent g wass, issreɣ Wilyam dduc i Umnay allig iwet ttelεumt, isgulu-t-i-nn aɣaram asdawan.

Tis sḍist n tifawt yanef allen-nnes amm walejnun ur issared aqmu ur ikriḍ (peigner) azzar ula isawel ar ɣur imi n lbanka; taggazt, laburs, uxla ! Amm id netta ayed akw nn-immutren ass-nnaɣ. Iwḥel Umnay tesdawit, iwḥel imeddukkal, yader i wallen-nnes ad ur as-d-aglent melyun n wazul ur ičči ur iswi. Geras d iɣef-nnes irceq da itteḍsa, anawur (fonctionnaire) n lbanka ibenned, taqhwat-nnes d takerwassat, ar itganna tamt ad tgulu. Tezrey ɣef Umnay imkiddaɣ g teqqend allen tanfed-tent, netta ɣur ur illi warryal abaylal teddu trufa-nnes ad tetkur. Netta d ugellid ayed tes-ibḍan.

Yameẓ tawala amm netta amm imezraw allig t-id-yuweḍ muley. Yazen afus ad d-ikkes takarḍa hat walu-tt, iddu kan wul ad as-ifest. Mridd i yat tegẓiwt (jeune fille) qqad as-d-imɣey uḍar g iɣef. Tenna-as s tmaziɣt εad: “ Ad ur ttedahdad iwa, aɣ lḥil tqellebd lajyab-nnek ∙. Ikkes afus da iger-t da, yaf takarḍa ittu tameṭṭut ur tt-isnammer. Iqariḍen ibḍaten ɣef trufa ad ur diɣ t-mexxṛen. Ig ad iffeɣ han tameṭṭut-ddaɣ, tegr-d dikes allen, inzeɣ iddu zund ur tt-yannay.

Ur d-ilkim Umnay aḥanu-nnes allig druɣ ur d-ibeddi ɣures warryal, ikka-d ɣef widdaɣ as-iḍfaren, bu tmiḍi, bu snat, allig iqqen ixwba. Nnican, iqqima-as-d mas ittidir yan imalas, isew tarḍumt n uɣisem (alcool) iseɣ yuwen udlis.

Masin, yulsen i tḥanut aseggwas izrin, azgen n taggazt ayed ittameẓ. Maka ig idder wul i ka awal yaḍen. Ur iɣiy ad yanef tiflut s mayed d-isɣa. Mer ur lliɣ qqad iqqim beṛṛa ard iddu Umnay neɣ irẓem i teglay d ṭṭeẓẓina (douzaine) n lkisan ad yanef. Izzul ɣifi isers-as i Umnay attayen n simraw n teglay d kilu n uẓalim, iffeɣ yaǧǧ tiflut terẓem.

Yaɣul-d Umnay, awed netta, g tuswiqt n Lqamra, Lqahiṛa ɣur imeddukkal, ar tgannaɣ ad i-iseqsa ɣef teglay d uẓalim. Llig ifetsta festeɣ.

Yan imiḥ innay-i:
«Anneyeɣ-t g tuswiqt allig ten-d-isɣa. Ar itteqqel εniɣ ad as-iniɣ mak igan ! »

Rareɣ-as :
Mayed diges awed key mek as-tt-tessenḍud ? Da akw zegglen medden !

Ikk-d uklaffu iminn-nnes :
Qewwed, awed key, ad ur k-ttinniyeɣ ! Tessnem kwenni xes ad tesganem bnadem.
Ǧǧin ddiɣ nek, ig ur tellid, ad am-ggwiɣ talkuzinat-nnem, ini ! Nekk ur da i-ineqqa laẓ, yawen ?

Greɣ-as agiṛṛu.
Ameẓ a yakurri ad tessiɣ-d, tenɣid-aɣ s wanect-nnaɣ d tfelsaft !

Tekk dinnaɣ, nenḍerra ar neskikkiy taḍsa. Seg taṭsa s tidet, da tmunent snat-a maci amm unuddem d buheyyuf. Nemmerẓa-d idrimen, nger ilan xsin s sin, Amnay d Masin. Ddiɣ s uɣisem, iddu Masin s tdinant. Amnay netta iqqima ad izizdeg ansa. Tamrilt, lmkiddaɣ g tεemmeṛd rrafayen (réveil), ar nettserssar g imi n uɣaram. Seg imi d-nettasi LEHWA N UDRAR, tizlit n usseεceq ittirir Masin.

Nekcem-d, han Amnay issa-aɣ g wakal nheyya aɣwjdim. Intu-aɣ Masin s Meεtub ar itferraɣ Yufa timeqqa n lwiski. Kamla ar nettaley, ikkes Umnay i Masin Tadinant. In-ker Masin yasi-d inna-k ad aɣ-iɣer yan usefru n tayri.

Iɣer-aɣ diges azgen (moitié) druɣ nzelleε s taṭsa. Iεma-tes ṣafi, yusi-d ka g tefriwin-ddaɣ ittmunen d usafar inna-k asefru. Tizwiri ar nettnaɣ ad nakez ka smi da t-iqqar s tefransist ar aɣ-isskar asuɣel (traduction) g udɣar, nenna nekwni da isawal s kan tmaziɣt n Lɣaci, netta a imečči n babnnes iffeɣ-nn g Ayt Σisa U Brahim nɣed Bu YEFLILU. Lḥasul mmeɣmazeɣ d Umnay, naɣ-as lḥil i Masin allig igna, neɣmes-t mezyan, nsexsey-as asidd neffeɣ ad aɣ-d-iwet uzwu.

Xes neffeɣ-d jaj uɣaram han ayt tmira d ayt tkenbac uḍren imi. S tidet, ksuḍeɣ, swiɣ yawey-i-d Rebbi ammi yumẓen ixwanjiyen adabu ar aɣ-tnadan. Druɣ ayed reẓmeɣ i wuggaden. Netta zziɣ tin yiṭes ag d-ffɣen ! Ad ddun ag gnin. Ha ha ha ! Nsul urta nenḍiw s iwri-nn i ubrid ittawin s Ugdal hu-n Σlilan, yan Umeṛṛukiy iẓman, da itẓalla ar issa iɣisem, Amaziɣ n Tamunt Tane-mlayt, littiḥad lictiraki. Inna-k netta : “ ur illi g leqwran ka t-isseḥramen, iɣisem. Lḥadit ag illa uyenna illan, griɣ-iss. Iggal nessa-nn kan tuqrifin g Caṭubriyun.

G ubrid ar neggar izlan, unna d-iktin ka iseṭsan yini-t allig nn-ngula yat tmezgida g ttuga tem-nyagert (compétition) n leqwran i icirran imeẓẓan. Iggallaɣ Umnay nkeccem ad neẓẓal ayenna aɣ-iktab mulana neffeɣ. Ur yad ṭṭifeɣ mecka ayed neẓẓula. Neffeɣ-d dinnaɣ nekcem lbaṛ afeɣ-nn aselmad-inu qqimeɣ ides, imiḥ ɣreɣ-d i Umnay nsekkiwes ; uress yad mani g nn-iffeɣ Σlilan.

Llig neɣley xla g tessi neddu s uḍar allig nečča yat taṭṭajint, nrul ur tt-nefri. Iwa ar netteqqel ɣur ṭwaks ad neddu s Lqamra dinnaɣ diɣ neɣley s uɣaram.

Ar netteqqel imiḥ han yat tegẓiwt tran-nn Lqamra awed nettat. Urss mani unna izrin tama-nnes iggwr-as ukan teddu ad tger igenna ɣef wakal. Mayed ixxan tesrarred-i-t. Amnay, netta, amm uyennaɣ ayed ittnada. Iḥaylella allig tes-nn-igula isafeε-as awal, lawah ad ur tɣewwat. Ikcem, iffeɣ g wawal allig d-tedda ṭṭaksi, neney s kraḍ. S tiṭ isawel-i, kkseɣ-d iqariḍen fruɣ.

Gulun-nn Lqamra, bbin s Sswisi isal uyennaɣ iṭfar-ten. Ayenna tttemyinin imeddukal s wallen igula-nn. Iseddref yuwen, iqqim-ides wayeḍ allig tes-nn-isgula i uɣaram. Ttiliɣri ag ttemsawa-len ḥma ad tes-nn-ssiwḍen aḥanu. Tekcem, reglen tiflut. Masin urss mag yad nn-iffeɣ.

Allen msawaḍent, iffeɣ Yufa iqqim Umnay. Ig as-isetterfes i wazzar, ig as-ileqqey i yidmaren (poitrine). Tuɣul tbed i iɣef-nnes tger s iḥruyen, iger Umnay s winnes asin-ten taḍḍangiwin n ususem allig ten-ssafɣen i wakal. Da tteddun ard akw εergen (suer), smiḍen diɣ mmesnayen. Ku tikkelt d mayed digsen igen amnay. Da ittɣima Umnay ig xes iyyis !

Sin isqibban kraḍ, ikcem yuwen iffeɣ yuwen. Tger tidi n ususem altu Yufa d tegẓiwet. Mer ur idd imiḥ n ẓẓheṛ ayed izemzarayen asḥiḥḥey-nsen d kan imezraw ibergagen (mouchards) qqad texxu jjeṛt.

Tifawt n Rebbi ur ta akw d-tneqqir tafuyt gen-as tiḥilit allig tes-d-ssafɣen agensu n uɣaram.

Itti-d imalas, sin, kraḍ, uɣulen imezraw taɣuri ar diɣ ttemyaɣen wussan. Ur d-iqqimi i usegg-was umya ad ismur, kken idsen iṛumiyen tesdawit ar zzruyen i imezraw, asin-asen idammen d wuggaden. Tamrilt (heure) n ḍart wallas (déjeuner) iɣer-nn ka g ifremliyen i Umnay g tesdawit inna-as : «Ameddakwl-nnek ur t-yaɣ umya, key digek ssida !» Innekrurem, iḥmeq Umnay inna-as :
Is ufiɣ ad i-talsem azzruy ?

Imun-ides allig diɣ ikkes idammen. Yales-as: “Ssuref-aɣ ameddakwl-nnek ayed tneqqerḍ. Key ur k-yaɣ waḍu. Awid uṭṭun n ttiliɣri-nnes ad as-nɣer !».

Yaru-t: Asafar LIHI

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *