titi yirgel

TITI N YIRGEL

0 81

Teggez-d add t-tawi, taf-t-id ar ittemcucud ɣef udis g yat tmazirt g idrus uḍar. Agerjum-nnes izwa, allen xsint, ul ar ittergigi s fad. Udem-nnes tessekmeḍ-t tafuyt n uwilan. Iḍra ɣef wakal amm uqbu. Yurem ad ibedd, ur izmir. Tbedda nnig-as amm tsaywalt. Nettat tra ad tasey iman-nnes, yasi-d allen, iger aseksew ɣer igenna mnalant wallen-nnsen. G tiɣwbi n mummeẓri-nnes, tannay anaruz-nnes. Issarem agensu-nnes ad ur immet ammas n uneẓruf-ddeɣ, ad ig učči i yigadren d i-iwaɣzniwen. Nettat tuki d ka issara agensu-nnes iddeɣ tseksew g wallen-nnes. Tenna g iɣef-nnes « Ur zmireɣ ad ssfeɣ iman-nnes seg mayed isul usirem idder agensu n wul-nnes. Teqqen allen, teqqim nnig-as. Tga-as tamalut, teqqim ar t-tseksiw, imiq takez tifiras-nnes. Aterras iɣerden g umalu-nnes, ittasin tixat s fad iga ageldun, memmis n ugellid n tmazirt n Kel Adrar. Ur tezmir ad t-tawi. Ageldun imeẓẓiy. Ibrey wul-nnes seg tnila-nnes.

Teldi-t allig t-inn-tesselkem i tama n yan umeksa n ileɣwman, tfel-t. Tbedda g yigenna. Tannay ameksa allig d-inmala ẓars, ik-as allig iswa imiq n waman. Yusit ar ddaw yan uzeggwar, iserst g umalu. Issaɣ umeksa timessi allig iga atay. Iɣwejdem, kud issa, ikemmey. Aḍu n wagiṛṛuten-nnes ixmej. Da sḍiḍiyen.
Tenna :
— Mayed d-yuwin ageldun ar tamazirt-ddeɣ. Imaɣ allig d-iffeɣ ibergemmi-nnes, ifel tudert tazedgant af ad immet s fad ammas n tnezruft.

Tbedda nnig-as, tḍuf-t amm kra n uwaɣzen. Ur tessin idd ad temger iman-nnes midd ad t-tfel ad yidir. Ḍrant tillas, issenker-t-id umeksa. Ika-as diɣ aman d kra n uɣrum, issiɣ-as afa, ur yuki ugeldun d iɣef-nnes allig iṭṭes. Iddeɣ d-inker tifawt, inna-as umeksa :

— Hayyi ad ak aǧǧeɣ ageddid n waman d uɣrum. Qqim ddaw uzeggwar ad tesgunfud. Add uɣuleɣ tameddit n usekka.
Ur as iruri. Inker umeksa, imun d ubrid-nnes ad inada ileɣwman-nnes. Nettat teqqima nnig-as. Ar tganna. Tettu amaḍal. Tettu medden tt-itgannan, d-ẓars iggaren ifassen ad tten-tawi ɣer tmura n usgunfu. Tbedda nnig-as sin wussan d sin yiḍan. Wiss kraḍ ibedd. Ismatter tiɣawsiwin-nnes idrusen imun d ubrid. Tekka deffir-as, teddem ar teswingim ad t-tfel iddeɣ tannay yan urgaz awessar g yir n ubrid. Tenna :
— Ad iselliɣ i mayed nnan, fleɣ-ten !
Isawel ugeldun, inna :
— Azul a mass !
Ur as iruri uwessar. Tuwit twuri. Immatter-t. Argaz ar iqqaz akal n tneẓruft s ufus n tɣenjawt. Iɣwejdem ugeldun ar t-isniɣis. Udem n urgaz iqquṛ. Ifassen-nnes sdiden amm tizar. Berrkin amm wuzzal. Tamart tumlilt tedla udem-nnes. Allen-nnes ṛmint. Iga ammi d-immɣi g wakal n tmazirt. Ammi degs iẓẓa. Inna-as diɣ ugeldun :
— Mayed da tesskard a yargaz ?
— Is tedderɣeld ? Nekkin da qqazeɣ anu. Ad ɣzeɣ ard afeɣ aman, kerzeɣ aneẓruf-ddeɣ, ẓẓuɣ degs isekwla. Ad akw ig azegzaw.
— Is da twaragd ? Aneẓruf ad ig amm tagant !
— Tsuled ad tiẓird, mek iɣwezzif usmud-nnek, tsuld ard tesmulud ddaw isekwla ẓẓiɣ, tsud aman n wanu-ddeɣ qqazeɣ !
— I mecta ayed tennid ad tezzrid g twuri-ddeɣ ?
— 500 neɣ 600 n useggwas. Asekka g izegzaw uneẓruf, ɣiyeɣ ad mmteɣ g talwit. Imaɣ ad ur teqqimed da, tawsed-i g twuri-ddeɣ ?
— 500 n useggwas ? Amya ayennaɣ, amm titi n yirgel ! Nek riɣ aɣlul (éternité) !
Tedduhda iddeɣ tsellla i wawal n ugeldun. Tur-a tessen maɣef irezzu. Inker ugeldun, inna i urgaz :
— Ar timnilit ! Nekkin ur sulaɣ !
Iṭsa uwessar, iwet s ufus n tɣenjawt g wakal, inna-as :
— Abrid n talwit a yegeldun !
— Tessend mayed mseɣ ?
— Awed yan uneɣmis ur da inettel g uneẓruf !
— Ar timnilit !

Ika tiɣwerdin i uwessar, yameẓ diɣ abrid. Tekka deffir-as amm tmalut-nnes. Nḍun i yidurar n Waṭlas. Idda ugeldun kigan n imalasen g uzaɣar, allig nn-ilkem ir n yil. G teftist yufa-nn yan urgaz awessar. Issektey-asd amezwaru. Myaɣen amm snat tmeqqa n waman. Da iggar akerbas-nnes g waman, ildit-id. Iẓem-t ɣef teftist tesserɣa tafuyt. Inna-as :
— Mayed da tesskard a yargaz ?
— Da zzwuɣ il ! Riɣ ad yuɣul amm umerdul. Ad t-kerzeɣ ad yuɣul amm tagant.
— I mecta n wakud ag tɣiyed ad tezzwud il-ddeɣ ?
— Γur 700 n useggwas !
— Hill ?
— Ur id tusi ! Nekkin riɣ aɣlul. Ad dduɣ ad t-nadaɣ !
— Aɣlul ur illi ! Tzemred ad akw tekked amaḍal, ur tennid ad t-tafed !
— Ak fleɣ ad tezzwud yil !

Ika-as tiɣwerdin, ar ittini : « Yiwen ira ad ikrez aneẓruf, wayed ira ad izzwu yil. Matta medden-ddeɣ ? Is ur akw ɣursen kra n uwettas g tudert ? Is sulan !»

Izdey tawada allig nn-ilkem yan iɣrem axatar, ikcem-t. Iddeɣ d-igula asarag axatar, iddu ar ddaw yan useklu, iɣwejdem ad isgunfu. Inmalad ẓars yan urgaz awessar, inna-as :

—Ur idd adɣar g sgunfun igeldunen aya ! Addud a mass ! Kked deffer-i !
Inker min ad iswingem, ikk deffir-as allig kecem iɣrem ageldan. iddeɣ bedden dat ugellid n tmazirt, inna-as :
— Anṣuf-issek a yageldun. I mani ayyis-nnek ?
Iseksew ugeldun tiseggwin-nnes, ur yannay amɣar t-id yuwin. Inna min ad ixemmem :
— Ayyis-inu ityaker. Imeddukkal-inu ttunɣan. Sdin-aɣ imakren ammas n tneẓruft, rwin-aɣ. Drguh ayed uwin iman-inu. ukren-aɣ aman. Γas nekkin waqila ayed inejmen. Mer ssinen mayed mseɣ is i-nɣan. Γalen waqila is giɣ kra n ubudrar. Mer ur idd i yan umeksa is lliɣ dɣi mmuteɣ. Is i-yad tcan iwaɣzniwen n umaɣa …
— I mani ɣer teddid allig …
— Aǧǧ-t ad isgunfu … Anṣuf-issek a mass !
Isella ugeldun i wawal n tmeṭṭut d-inmalan, inna-as :
— Azul a massa !
Γas yannay-tt, ikkucem g wansa. Yuki d wul-nnes irgag s tayri. Ira-tt. Maka agensu n wul-nnes yuki is tt-yad yannay, maka ur issin mani.

Tannayt, tesseknu allen, tenna-as :
— Anṣuf-issek a mass ! Ak fleɣ ad tesgunfud. Ad tilid teṛmid.

Asekka-nnes imun d tgeldunt, ffɣen seg iɣrem ageldan ɣef tdiwwa n iysan, kecmen igran ad ssaran. Ur akw msawalen ɣas ar ttemseksiwen. Qqimen. Mran. Itsen wussan deffer n yiweḍ-nnes ɣer iɣrem, myawalen. Gen tameɣra taxatart. Idder ugeldun g iɣrem ageldan. Zrin ɣifsen imalasen, iyyar d iseggwasen. Ittu ugeldun awettas-nnes amezwaru. Tsettut tayri. Ku yan yaɣul amm tmalut n wayeḍ. Ur da akw beṭṭun.
Yan wass iktid tamazirt-nnes, tneɣ-t tɣufi n imarawen-nnes, inna-as :
— Riɣ ad uɣuleɣ add kkeɣ tamazirt-inu. Ad yidi tmund ?
— Yuf is ur teddid !
— Imaɣ ?
— Qqim !
— Asekka ad dduɣ !

Asekka-nnes, issekter aserdun-nnes, iffeɣ-d seg iɣrem ageldan yaf-d tageldunt ar t-tganna. Tenna-as :
— Ddu, maka ad ur sar tteksed areksen-nnek. Aǧǧ-ten aha ttemran g iḍarren-nnek.

Yumeẓ abrid, iddeɣ yaggug ɣef iɣrem ageldan, yali yat tewrirt yuggan tamazirt, iger aseksew ɣer iɣrem, ur yannay ɣas tiwririn n ulxix. Ammi iftuttes iɣrem, ig irden n igidu. Aneẓruf iɣerd g yal tanila. Tduy tawda g wul-nnes. Izdi tawada kigan n wussan d yiḍan allig nn-ibedda ɣef yat tagant ammas n umerdul. Ibedda allig iswa g tergwa. Yukez ansa. Ikti-d awessar iqqazen anu ammas n tneẓruft s ufus n tɣenjawt, ikti-d awal-nnes. Iduy s tawda. Igra aḍar g inerkeb (étrier) n userdun-nnes, iney, izdey tawada ɣer tnila n tmazirt-nnes allig nn-ilkem adɣar ikka yil, yufa-nn il ur iqqimi, izwa, iga tagant, ikti-d awal n uwessar wiss sin …
Izdi diɣ tawada allig nn-ilkem tamazirt g inbeḍ bab-nnes. Yufa-nn iɣrem ur isul. Izla unaɣiz-nnes. Iseqsa yan umeksa, inna-as :
— Wi ! Timiḍḍa n iseggwasen aya mmuten. Uress is akw isul unaɣiz-nnsen ddaw wakal. Akkwen id bbaḥellu n id bbaḥellu-nneɣ ur asen ɛeqqalen.
Iduy ugeldun, inna-as :
— Nek ayed igan ageldun n tmazirt-ddeɣ ! Bba ayed igan agellid-nnes !
— Ageldun ! Waqila tenfeld ! Ur akw tsul tgelda g tmazirt-ddeɣ seg tegrawla n … Ffeɣ dati … Nek igan iɣef g unfal iɣalen is iga ageldun.

Izrit umeksa g udɣar. Iney diɣ ayyis-nnes, inna g iɣef-nnes : « Ur ukizeɣ mayed ijṛan. Tudert-inu tennewdem. Ur tli awed yan unamek.»

Yumeẓ abrid ɣer iɣrem ageldan g nn-izrey tameṭṭuṭ-nnes. Nettat tur-a ayed ɣurs illan. Γas nettat. Iqqes i wayyis-nnes allig nn-ilkem tagant. Iggez-d seg userdun-nnes allig issard ifassen d wudem. Imiq, ikkes iselsa d wareksen allig iccef. Γas ṭṭasen iḍarren-nnes igidu irɣan iddeɣ d-iffeɣ seg waman, yaki d usemmiḍ yulit. Isella i kra n yiwen ar as ittini, tama n umeẓẓuɣ :
— Is tennfeld keyyin iran ad i-injem n tmettant ? Nekkin ddreɣ idk, tama-nnek. Muneɣ idk aha. Nekkin ayed igan tamalut-nnek. Tɣald is tɣiyed ad i-truld ?

Yusi allen, yinniy tamattant tbedda nnig-as. Γef wudem-nnes yannay tifiras n iwessaren d-imnala, n tgeldunt, n umeksa t-ijjenjmen…
Yuki d tfekka-nnes ar ttektutuy allig tuccka g igidu, ig ired ammas n tneẓruft …

Tenna-as tmettant :

— Tur-a tufid aɣlul !

Yaru-tt : Aksil Azergi

Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.