TIRRA S TUTLAYT TAMAZIΓT

1 148

Ku tikkelt g kecmeγ neγ saggreγ s kra g yisemlan ittinin i yiγfawen-nnsen nwis gan imaziγen ar i-tneqqa tasa s wanect-nnaγ d iḍrisen d yimagraden isawalen γef tmaziγt maca s tirra d tutlayin yaḍnin lumen taεrabt d tefransist.

Ad d-nessektey nwis winna izizzilen tutlayin-a s snat ayd igan tamaddit seg wahli msasan ad nγen adren i tutlayt tamaziγt g wakal-nnes bbin tazzla n wawal amaziγ g yimawen n yimazγawalen.

G tnila-a, is ur nγiy ad nessumu widdeγ d tiddeγ tturunin s tutlayin yaḍnin γur yicenga n tutlayt-nneγ tigellint ? Maymi da ttarun anect-nnaγ d tirra ? Maγ allig ur illi neγ idrus kigan mayed digsen ikkaten anfa g tirra s tmaziγt?

Nitni ayd iγiyen ad aγ-d-raren tiriritin-nnsen mek tent-lan; nekwni nenurez ad fken tuttriwin zund ti i yiγfawen-nnsen seg wass neγ iḍ g ran ad asin imruten-nnsen neγ ad uten inasiwen n yiselkimen-nnsen. Maca widda degsen irγan qad aγ-d-yini nwis ur ta γiyen Yimaziγen ad ttaran tutlayt-nnsen neγ ad tt-γren.

Awal-a γures amur axatar n tidet maca da d-inezzeγ wayeḍ iγwban igan mimek nettegga ad niγiy ad nettara ar neqqar tamaziγt.

Nessen nwis gant tirra yat temyurt ittasi ufgan, ar ttyasay s tigi izdin; kud ttazzlant tirra zzuγurent-d tiγri. Kud tettgidiy tiγri teslala-d tirra: Imki aha imki as ttaγent tirra ar tettaγ tγuri. Ar nettarem azizzel n tirra seg uyedda aγ-inmalan zund izlan, iwaliwen ddernin, ineγmisen, tinfas, tineẓẓra…atg

Addag llant tirra da ttettrent taγuri s nettisin nakez mayed d-ugment d mayed nn-ira bab-nnsent ; s tγuri, da nettafa ad nestey ayenna nra nger s uyenna nugi: Aya ayd igan azγan d-issiriwen tirra d tγuriwin yaḍnin.

Is ur llint tirra acku tella tawda n uzeggal g yisekkilen d wubuy n yiwaliwen d unegzi n umawal?

Tuttra-a da tetteggwey imeγnasen d tmeγnasin n Umussu Adelsan Amaziγ isulen ur ta γiyen ad zdun imik i timawit nisin idd nitni d nitenti ayd nn-iqqen ussudu n tirra timaziγin d usnefli-nnsent ad nn-gulunt agdud neγ amata diges. Nitni diγ ayd nn-iqqen usebγes n tγuri n tmaziγt d ussiley n wawal d usnulfu n yimyura d yinaẓuren.

Tella yat temnaṭ yaḍen itteqqlen s twuri n widda d tidda ranin tudert i tmaziγt, ayd tt-igan d asuγel neγ igem seg tutlayin yaḍnin: akw tutlayin da d-suγulent tussniwin d yidelsen ilan azal; awd tamaziγt tnurez g yimyura-nnes d temyura-nnes ad d-awin tussna d yiwaliwen d tektiwin seg tneglizit d tyabanit, d taεrabt d tεibrit d teṣbenyulit d mayed igen tutlayt g umaḍal. Maca tella tmukrist n tussna n tutlayin-nnaγ, ihi iqqen-aγ-nn ad nettelmad tutlayin yaḍnin s nettizmir ad nernu afud i tinneγ. Imki as nγiy ad neffeγ gar aswir g nn-nezrey tutlayt-nneγ d yidles-nneγ d tussniwin-nneγ.

Iγuda ad nettara tutlayin yaḍnin maca yuf-t ad nezzwur tinneγ – γas mek ur tt-nri g tudert- ad ur tatem teftu s tattut d yicki.

Σumar DERWIC

Tiγermatin g 01 Mayyu 2964 (13/05/2014)

Amawal:

Isemlan (asmel): site; imagraden (amagrad): article; inaẓuren (anaẓur) : artiste ; lumen: surtout; tutlayt : langue ; zmer : pouvoir ; imyura (amyaru): écrivain, producteur d’écrit ; tiriritin (tiririt) : réponse ; imruten (imru) : stylo ; irem : essai ; tinfas (tanfust) : conte ; asuγel : traduction ; idelsen (idles) : culture) ; atem : être marginal ; aswir : niveau ; tattut : oubli

Tasghunt Idles

View all contributions by Tasghunt Idles

1 Comment

  1. Wiyha July 9, 2014 at 09:37

    Dghi gan tamaddit mgal n tirra n tmazight s tlatiniyt. Nekren id “V” (gh) d tirra id tar “e”, gen asif. Widdegh ghalen is da ssidiren tamazight, maka da tt-neqqan !

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Nba