TIKKIT N UMEDYAZ G UZAZRAF

0 71

Moha_abehri

Muḥa ABEḤRI (1950-2003 (g l.ε.)), fsis ɣifs a yakal, d aneɣmas d umyaru amaziɣ s tutlayt tafṛansist. Ikka issafeγ-d g Tmesna “Etre ou ne plus être”, ungal s tutlayt tafṛansit.

Σumar Derwic (Issaɣulen tullizt-ddeɣ s tmaziɣt), ilul g useggwas n 1960 g yiɣrem n Yigwelmimen. Issufeγ-d kraḍ n wammuden n tmedyazt: Anfara g 2005, Taskiwin g 2008, Ha-yi g ubrid g 2009.

Ibedda yiwen umsaltu g tawurt ittawin γer usarag n wuṭṭifen llanin g tzeqqa n ussefled n uzazraf n Meknas. Akud nna g ittemneqqar ulaγa n uselway n tmerdult ar t-id-iṭeffur uγuyyi n umsaltu ittettren adaf n kra n umaluf. Iwda-yas yiwen ulaγa t-id-issufuγen zund yiwen yifer d-iṣuḍ uṣemmiḍ. Ar d-ittaγ dat yiẓriten, s yiγefnnes yudren d wudem-nnes azawraγ, iẓerreḍ-t-id usarag-a issiγin taγufi, izrey mnid n wasserrid n ibugaḍuten ggawernin afella n yiwen wattekkwan n ukeccuḍ, mar ad nn-iṭṭef adγar ibedd dat unezzarfu. Irẓem uselway akaram yaḍen, isemrara kra n iwaliwen; iṭfar-t umessiḍen ittemnaden amsaltu n uzerf nna isawalen s uγuyyi, inna:

Muḥa uΣeddi n AytΣeddi!

Muḥa u Σeddi n Ayt Σeddi!
Iga Umγar Muḥa yiwen umedyaz amaziγ d-iggzen seg idurar illan inger n Ayt Σeṭṭa d Ayt Merγad, attayen n
Saγru. Yih! Is d-temmektim Saγru?

Dγik, izdeγ Muḥa g kra n usun tama n Tmentiṭ neγ Ifran neγ Aẓru.

Inna-yas unezzarfu i Umγar Muḥa:

Nta huwwa Muḥa ben εeddi, lmusemma Cix Muḥa, lmuzdad ḥawalay sanat 1919, εend Ayt εeṭṭa n Umalu?
(Keyyin ayd igan Muḥa u Σeddi, mi qqaren Amγar Muḥa, d-ilulan attayen n useggwas n 1919, γur Ayt εeṭṭa n Umalu?)

Irura-yas awal Umγar Muḥa, inna-yas:

Sawel-iyi-d s tmaziγt! A-k-yağ Rebbi ay mass anezzarfu!

Tewt tsusmi ihen γef tzeqqa n uzazraf s mayed diges illan. Ur yukiz unezzarfu amya allig nn-tucka yiwet tmeṭṭut ilsan timelsit n ibugaḍuten, tenmala-t-in tessefru-yas i uselway nwis issuter umaluf ad ittwazerref s tmaziγt.

Isemneqqer unezzarfu taḍṣa, ittu tazeqqa iktaren s imannayen d wasserrid n ibugaḍuten d imawasen n
teγdemt. Inna-yasen uselway i medden:

Wac hada ḥmeq? (Is inufel wa?)

Tenna-yas tbugaḍut: Huwwa amaziγi, u ka yeltames iredd εla lqaḍiyya dyaltu belluγa dyaltu! (Netta d Amaziγ, ar issutur ad irar γef tnakut-nnes s tutlayt-nnes!).

Inna-yas-d unezzarfu:Belberbariyya? Uεlah ma idirha belviṭnamiyya melli cadd fiha? (S tcelḥit? I max ad ur d-irar s tviṭnamt seg mayed iṭṭef diges?).

Temḍerra tbugaḍut s amedyaz, tenna-yas: Uhu ay Amγar! Difanḍi! (Megdul!).

Ismed, diγ, unezzarfu awal-nnes zund ur illi kra, issitem taẓit, inna:

Nta huwwa Muḥa ben Σeddi ben Muḥa u Σeddi, yak? (Keyyin ayd igan Muḥa ben Σeddi ben Muḥa u Σeddi, ya-k?)

Iddeγ yukez Umγar Muḥa awal inna-yas:

Ayenna mi nẓiγ is iga tidet, a mass-inu anezzarfu, iga-t yisem n yu d win yu-nnes d win yu n yu-nnes. Day, nekkin giγ memmis n Ḥadda n Σeğu, illis n Σeğu n Σeğiba, igan awd nettat illis n Σeğiba n …

Ibbey-as awal uselway s uzγiγ (s uzεaf), inna-yas:

Seqqer εlina! Rah ma ka nleεbuc felmeḥkama! (Fest γifneγ! Hat ur da netturar g uzazraf!)

Inna-yas Umγar Muḥa: Yih a mass-inu ! Tenna-yi yu-nu nwis giγ iwis n yiwen urgaz nna mi d-tgam isem ! Ayenna d-tenna yu-nnes, iga memmis n yiwen wayeḍ urgaz igan…

Isγayya unezzarfu, inna-yas i Umγar Muḥa: Rah teḥbes dak lleεb ulla nsifṭek daba llḥebs! (Iwda-k n wurar neγ a-k-sssifḍeγ din din γer ukurmu!)

Irura-yas umedyaz, inna-yas: Ur rẓiγ kra n tekwta n uneflus! Mek rẓiγ tikwta tinin tmektit n yu-nu d urgaz nna mi qqareγ bba…

Iwa, mani da taruẓi n kra n tektut n umdan n uzref ? Ssutreγ ad nemrara awal s tmaziγt acku tutlayt-a as felli tegram tilumas-nnwen! Tamaziγt aγef i-d-tṣerḍem γer datawen! Tidet aya neγ wahi?

Inna-yas unezzarfu: Wac bγiti temci llḥebs? (Is trid ad tadfed akurmu?)

Irura-yas umedyaz, inna-yas: Netta ag d-dewleγ ussan-a, a mass aselway!

Amsaltu nna nn-iddan γer tgemmi-nu, g temrilt tiss tẓat n yiḍ, ayd i-nn-isersen g ukurmu, ggawreγ dinnaγ ass n wacur d wass n sed akw-t! Akurmu ag i-d-uwin s mnid-ak tifawt-a! Iwa, is uklaleγ aya?

Inna-yas unezzarfu: Acnu lmihna dyalek? (Mayed igan tawuri-nnek?)

Inna-yas Umγar Muḥa: Tawuri-nu tga-tt tkessa neγ asegmi n wulli, mek trid a mass aselway! Maca, ur suleγ da kessaγ kra imir-a!

Inna-yas unezzarfu: Acnu ka ddir fhad luqita? (Mayed ttmahaled g wakud-a?)

Irura-yas umedyaz, inna-yas: Hayyi da ttraraγ γef tuttriwin-nnwen mar ad i-tessuγlem γer akurmu, acku snaγseγ-kwen da yiss i-tesdiddiyem akud g urmeγ ad rareγ γef yiman-inu; ar i-tessiwidem tγalem is giγ aqellal iggwden ad ireẓ g ukurmu!

Inna-yas unezzarfu: Bac εayec? U bac mqabel mεictek qbel ma njibuk hnaya? (Mas tettidired? D mayed igan tiγrad-nnek ngum nwad k-id-nawi γer da?)

Inna-yas Umγar Muḥa: Nekkin a mass-inu, amedyaz ayd giγ!

Inna-yas uselway: Kifac dayra had lmihna? (Mimek tga twuri-yad?)

Inna-yas umedyaz: Da ttirireγ timedyazin! Kud ttirireγ tturareγ adinan-inu! Day, nekkin d amedyaz, a mass anezzarfu! Ar sedwateγ timeγriwin d igdad d tfaskiwin. Nekkin ur da sezgaγ atig n immectigen-inu, ar tteṭṭfeγ tawna i imezdaγ; mek ten-issemdez wawal-inu d mek da d-tsewlaf tmedyazt-inu ixittan-nnsen d ixemmimennnsen, d mek ten-syawnen iqecciben-inu d ticaf-inu ar i-ferrun s iqariḍen: Llan kra n yiwdan i-yettaglen tifert n snat timaḍ n idrimen.

Inna-yas uselway: U kanu ta yxellṣuk gedd hakkak εla ma ka tεawed beccelḥa? (Ar ak-ferrun s wanect-nna n idrimen γef uyenna yasen-ttinid s tcelḥit?)

Inna-yas umedyaz: Yih a mass aselway! Is ur ta tessined aya? Unna γef teggez taktert n udabu ar γures ttγudu, ar ttiṭfit tmedyazt-inu; Gguten imannayen d imessefliden-inu γas ur asen-trurim taγḍeft! Gan imnefkan n trezzifin γas ig nemnal.

Gguten iduba, a mass aselway! Illa imennbeḍ d imiẓgi d umsaltu d udabu n igensasen yaḍen n Umexzen
zund ayt tmezgida ittiddiren γef tdiwwa n imezdaγ. Illa diγ udabu n tmeṭṭut nna mi nn-iqqen ad d-tawim asala-nnes a mass-inu! Illa udabu n walmessi d yirban s wudem iẓlin, g iga urgaz, akud-a, tanbaṭ tameggarut.

Day, argaz amm wa, ittuẓmin g kraygat tasga, asag yufa kra n unaẓur issnen ad iẓaga… g ulazim-nnes, isefsis fellas kra n ixittan, da yas-iferru ifek-as s umdaz, ar yakka kigan!

– Iwda-k n iwaliwen! Mayed tesskared yaḍen iwer-inn i treggam s treggmed Amexzen g ulazim n imezdaγ!?

-Ur da reggmeγ awd yiwen, a mass-inu! Nekkin, ar sγuyyuγ ukan! D wansa n wiyeḍ ansa-nu awd nekkin
ayd iga!Nek, amuγ g “wiyeḍ” ddeγ ganin amur seg digi, ṭṭfen digi. Mek ifreγ uya max allig da d-ssikizeγ
ssefruγ-d ixemmimen-nnsen d tmariwin-nnsen s tiwan n tmedyazt ?

– Ur nezzegrir awal! Keyyin tgid amedyaz, ya-k !?

– Uhu, nekkin, tawuri-nu tga alday n wallen n wiyeḍ s tezlit d tmedyazt! Ur giγ kra g imedyazen nnaγ dittaγen g tiliẓri, ar d fellaneγ qqaren timedyazin-nnsen d-iffγen mgal n wulawen-nnsen; timedyazin nna darun g tefriwin zund kran n ugatu n temsuγt. Nekkin da ttiniγ ayenna d ukiγ, ayenna d tukey tewsit-inu ar tttidir, ar t-ittidir akw uγref… Ar akw ttiniγ awal-a -muneγ d temyurt- i winna ittenbaḍen , ssiwḍeγ-asen-nn iẓagaten n imezdaγ. Ar sawaleγ g udγar n medden !

-Iwa, yih! I dγik? Hat keyyin isawalen g wansa-nnsen ayd qad ikecmen s ukurmu g ulazim-nnsen!

-Yih ay anezzarfu-nu! G ulazim n imyisaten-inu rad dduγ s akw dinna ira wakud, lumen mek idd ad asen-dawiγ afulki d umesku! Adγar-inu iga win wuẓyiren, a mass aselway !

-Iwda-k n wawal! Mayed da diγ tesskared asag ur da treggmed ?

-Ur da reggmeγ awd yiwen, a mass aselway !!

-Mayed da tteggad asag ur da ttirired ?

-Da tteggaγ tasetturt g igedzan asag tezrey tallit n tmeγriwin d tfaskiwin, ar ttiniγ, aha, timedyazin; nek ayd igan Amγar Muḥa! Is ur ğin tsellad i kra g tesfifin n Umγar Muḥa ?

Γuri tasfift nna giγ γef umennuγ n Agmuḍ Anammas, giγ diges mgal n Imarikanen igan tamaddit nitni d
Inelmaden-nnsen i Seḍḍam! Tella, diγ, tayeḍ γef udhac yaγen aselmed γurneγ; llant tiyeḍ γef yicki n
Imaziγen d yicki n insayen-nnsen d tiyeḍ…

Da nezzant tesfifin-inu dinna tekkid ! Ur ğin teddid s agdez ad teẓred aγref n tmurt-nneγ amek tga tudertnnes! Ssneγ is da treggwled i temrilin n igimmir neγ akud g illa ugeḍrur d iγuyyan d immeẓmayen g
iγarasen. Maca, zḍareγ ad iniγ nwis ifulki ad d-ikk ufgan agdez asuynan ilan tizi tamajgalt! Tikkit-nnaγ
teffulles-ak g twuri-nnek d akw g tudert-nnek. Yagur-d wawal n tarda n tjellabit-nnaγ tumlilt d usfaḍ n
tkurebyin-nnek tifalkayin knanin, ur annayeγ kra n usweḍḍer g uya n tirzi γer ugdez.

-Dγik, iqqen-aγ-nn a-naweḍ tisegwri ay Amγar!

-Tisegwri iga-tt nwis giγ amedyaz ittidiren seg iwaliwen-nnes; Sskelseγ mennawt n tesfifin nzanin s imelyan maca ur k-id-telkim awd yiwet; tella awd tewlaft-inu g tifert n tγamust n kraygat tasfift. Assa, lli g zrin kigan n iseggwasen, tenkerd-d ad takzed is giγ amergam! Mani g nn-tegnid anect-a d iseggwasen? Is nn-tellid iwer-inn i tmurt ?

Tilumas nna fellak ttugranin uwint-d γef truẓi n useggem azayez s tigi n tesfifin icicciyen iwdan!

-Matta unna irẓan aseggem azayez ddeγ illan? Nekkin? Matta kra n useggem nna rẓiγ? D useggem n mi ayd rẓiγ? Walli felli d-igran tilumas-nnes yawi-d inigan-nnes d ussikez n uyenna s t-ggwiγ !

-Talumest tamezwarut iga-tt ussufeγ nna d-tessufγed tisfifin-nnek γer agdez min turagt; tella ta neγ wahi?

-Nniγ-ak-t yad! A mass-inu anezzarfu! Mer da d-ttekkad agdez d wansiwen n uznuzu n tγawsiwin ur itsawaled! Mecta ayd izzenzan tisfifin zund tinu, zund imezzenziten n wagirruten. D ur d γas Amγar Muḥa
ayd ittinin timedyazin!

Ttagga-nn, a wa, tifaskiwin d igedzan mar ad tisined tudert n imezdaγ, temsekcamed idsen! Amek trid ad tentakzed netta keyyin ur ten-tessined?! Ar nn-ttgawarem g ugwemmaḍ ar yiwen wass tnekrem ad ten-tsikkem
fellasen azerf.

-Ayenna tteggad ay Amγar ar ittawey γer truẓi n useggem azayez! Ar teqqared i Imaziγen ad munen!

-I keyyin? Trid ad msebḍun, ktutyen, asusen amm usaγur?! Ad gen zund idili n iẓakkwen asag afrun dat tmegra aγef trezzud? Ayennaγ ayd igan asaḍuf-nnun? Asaḍuf-nnaγ aya iddan ad i-issidef γer ukurmu!

-Han iwaliwen-nnek gan argam n Umexzen! Iwa, mas ttrarad γef tlumest-a?

-Mek tga tutlayt tamaziγt tamergemt, nekkin ar iss sawaleγ, a mass-inu anezzarfu! Nekkin Amaziγ ayd giγ; ffullsen γuri Imaziγen d Tmaziγin ittakzen ayenna ttiniγ acku da t-ttidiren, ar t akw nettidir s umata! Iwa, is ittwagdel wawal-a? Maγef ittwagdel?

Ur γur Umexzen amya g taluft-a. Mimek ttegga tedbelt – yukin is ttuwet- ad tisin takez ayenna ttiniγ seg mayed ur da tsawal γas s snat tutlayin: Taεrabt d tefransist ?

-Yaq! Tessen akw tedbelt-nneγ akw tutlayin! Ar tent-ttakez !

-Yih!? Iwa, max, a mass-inu anezzarfu, allig tugid ad idi tsiwled s tmaziγt? Mek da γifi teggarem tilumas γef uyenna nniγ s tmaziγt is tukzem tutlayt-a! Iwa, mek da tt-ttakzem ffelat-i ad rareγ γef yiman-inu s tutlayt-inu!

Mek diγ tennid, a mass-inu anezzarfu, nwis ur tessined tamaziγt iqqen-k-inn ad i-treẓmed acku ur tezmired
ad i-tzerrfed g uyenna ur tessined!

Ur yad da isseflid unezzarfu i Umγar Muḥa u εeddi… iftel-as-d kra n ungaẓ d ukemmer, izzga tiγimit n wass-nnaγ, iftu ad iswingem g tezmezt g ittales asezref n Umγar Muḥa.

Taggara, ifka-yas i Muḥa amedyaz tilleli tamagalt…

Igwelmimen g wacur 18 cutanbir 2945/ 01- 10- 1995

14px;”>Tamawalt :

Uṭṭifen : les détenus / Amaluf : le prévenu/ azawraγ : pâle / Amessiḍen : greffier
Ihen : tente / Tikwta : frontières / Tilumas : accusations / Tamrilt : l’heure / Akurmu : prison / Ixittan : les
peines / Taktert : charge / Imiẓgi : forestier / Igensasen : représentants (pl : Agensas) / Iẓaga : crier / Tiwan :
vers /Lumen : surtout / Amesku : le bien (lxir) / Uẓyiren : opprimés / Tasetturt : cercle / Agdez : marché /
Igimmir : chaleur / Agdez asuynan : marché hebdomadaire / Tikurebyin : babouches /Isskels : enregistrer/
Turagt : autorisation / Iẓakkwen : Moineaux /Tadbelt : administration / Tazmezt : date /Izzga : arrêter.

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.