Caca

Tamettant n Caca, amyaru amɣewweɣ

0 107

Llan kigan n medden iɣewwɣen ɣef yidles icenti bezzezen icenga ɣef ugdud Amaziɣ, ar senbuttulen wiyeḍ, awed ammas n Imaziɣen, s tayri-nnes ad idiren d ilelliyen. Zerrḍen s izagluten n tmettit d winin ddin. Ran ad urun ayenna ran, inin ayenna asen-nnan wulawen-nnsen. Γewwɣen ɣef temettit-nneɣ mi irẓa yislam g tεurrba ifadden. Caca, amyaru d umedyaz immuten ass n wahad 30 yunyu izrin g Hulanḍa, yiwen seg medden-ddeɣ. Yamu g yan wana n medden irẓan akw iṭabuten, ssireden ifassen ɣef ddin, ugin ad knun dat awed yan, innan uhu, iriren, urun af ad seḍren tabarda ran ad asen-sselsin icenga n ugdud Amaziɣ.

Igellin n Caca, ilula ass n 15 g ɣuct 1955 g Ikebdanen, yat tmazirt inmalan i yiɣrem n Naḍur g Arrif. Isul imeẓẓiy iddeɣ tduy tegrawla n 1959 g Arrif g nɣan iserdasen n Hasan wiss sin timiḍḍa n yirifiyen yugin ad knun i uwank n Meṛṛuk. Angaẓ d-tesselwa menɣiwt n irifiyen g wul n Caca, tettemra degs aha. Yugi ad ittu. Yukez. Yannay udem n tidet n uwank ameṛṛuki.

G Nnaḍur g ikka ar iqqar g tesnawit Mḥend Ameẓyan, iddem ar ittirir, ar itturar awed amezgun. Iseggwasen-nnaɣ awed ag ikcem amussu n izelamḍen iradikaliyen « Ila al-amam » (er dat) iran ad isḍer tanbaṭ n Ḥasan wiss sin. Isgadey tawuri tasertant allig ittuhraḍ seg tesnawit acku yugi ad yirir g yat tfugla tunṣibt ittugan g Nnaḍur.

Iggwed ad t-amẓen imsulta, ad t-nɣin neɣ t-gran g ubniq, yuɣul iffeɣ tamazirt, iddu s Hulanḍa.

G Hulanḍa, irna g tɣensa d g imenɣi ɣef izerfan n medden g tmurt n Meṛṛuk. Ikcem kigan n tmesmunin, iddem awed ar itturu s tutlayin Tamaziɣt d taεrabt. Ur da ittwar. Kigan n tmizar ayed ikka, ad imlal d Irifiyen itnaɣen af ad d-raren ɣer tudert, ken azal d wuddur i tikti n Tegduda n Arrif.

Tirra n Caca amm netta. Da ttiqiqent s tidet. Siḍent, acku lellint. Iḍrisen-nnes uhnen i tɣuri, maka mesden amm ijenway. Kigan n medden ur ukizen mayed ira ad yini igellin n Caca. Ur ɣiyen ad akzen tiktiwin-nnes. Ggwden seg digsent. Ar asent-reggwlen. G iḍrisen-nnes, iṭabuten da ttacckan. Da ṭṭaren s iberyan. Idlisen-nnes gan amm inurir ixataren n tlelli. Da d-ssikiyen wenna ten-iɣran, slellin-t.

« Caca, urta ukizen medden mayed akw ira ad yini », ayed inna yiwen g imeddukkal-nnes, Mḥend Abeṭṭuy g yiwt tesgilt (émission) tga Amaziɣ TV ɣef igellin n Caca. Iɣewweɣ, ammi d-ilula ngum akud-nnes. « Waqila ur nnin ad akzen medden mayed ittini ad zrin 100 n iseggwasen ɣef tmettant-nnes », ayed irna Mḥend g wawal-nnes. Ger idlisen yaru igellin n Caca llan : « Raẓ, tuɛaryent, d tarewra zeg yiṭan» (1995) « Reẓ ṭṭabu ad d teffeɣ tfukt » (ungal/1997), « Ajḍiḍ umi yitwagg celwaw » (tinfusin /1998) « Cway zi tibbuherya εad war twid » (Tinfusin / 1999), « Abrid ɣer yezran » (2000), Aṛaji (2016), « Tuf teqqen» (ungal), Tayri n tayri (ungal), Tarwa n umaḍal (Isefra).

Issafeɣ-d Caca awed 4 n idlisen n isefra s taεrabt.

Fsis ɣifs a yakal.

A. Azergi

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *