Aksel AẒERGI

TAMATTANT N UGELLID

0 121

Lḥu Azergi Aneγmas d umyaru. Issafeγ-d sin wungalen “Aγrum n yihaqqaren” d “Iγed n tlelli” d yat teswit n umezgun “Is nsul nedder” netta d Σumar Derwic.

Ur sar ttuγ ass-nnaγ. Tessawi tafuyt γer aγelluy d yennayer γer tgira-nnes. Nek beddigh ammas n tasukt. Imiq, isteγ ususem amm tegnut. Inker uγuyyi. Ngin wasuken s wulli tisiḍaṛin isdey uγyiys. Rwasen-t medden ikjem yizem. Ssnekren-t ageḍṛuṛ. Sfadin-t akal s iḍarṛen gezmen ifexsa d ifurusen s ijenway-nnsen isemmaḍen.

Ffγent-d wallen nnsent. Ifassen teγwma tafuyt, ar kerrzen ifs n ugezzay d uters γef waggayen iswan s imetṭi. Awal ittebbey g imawen izmummḥen, itteffeγ-d inneqqerḍ amm tguta yerkan, ixemjen. Da itferfiḍ γef wakal amm uslem urta-t ukiren imejjan ibeddan, illuẓen aneγmis.

Immut ugellid ! Idder ugellid !

Mmγin-d yizlan amm yirden agensu n uters d ugezzay γzan waskaren γef wudem, sun s imetṭi d-runt wallen …

Sγwayyeγ : Imetṭi n umdaz midd win ungaẓ ?
Ukiγ s tuzzalt n umxezniy iksan ulli tγwebbez kigan n tikkal g udmer-inu. Tebḍa ul-inu γef sin. Sfaffin-d idammen izegzawen seg tfekka-inu, γwmen afus n tuzzalt. Nniγ: “Amgwer walli, afus ayed ibeddlen !”

Zzakerreγ iberyan n wul-inu γer taddart. Ur ssineγ amek tteggeγ ad idireγ s uzgen n wul neγ min tasa. Amek tga tudert tar ul ? Ur rriγ ad isineγ. Ldiγ-d ifilan d tissegna, ar gennuγ ul-inu irwasen tabarda … Ddmeγ ar gennuγ tibardiwin, da tent ttekkureγ s walim ssxemjen wuggaden n iγwyal isiḍaṛen, zzenzeγ-ten-t i medden iweḥlen seg iselsa, irin ad idiren tudert n iγwyal. Ran ad uγulen amm iγwyal ! Ran ad gen iγwyal. Ur ḥmilen medden ula idles-nnsen. Ḥemlen taγyuliyt, tiqqaṛ, imezran, assenker d tiqqwit n teγwyal. Gniγ ul-inu. Ssaγuleγ-t amm tbarda, maka ur riγ ad t-zzenzeγ. Ur riγ ad t-keγ i awed yan.

Beddiγ ammas n medden ittrun, yuggan iγef i tfekka n umnukal temger tmattant. Awed g tmattant γwmanas udem ad as-zlen tawerγi. Takerrust tteddu. Nezγen-tt iysan iderγalen γef ubrid isselkamen γer tmeḍlin. Abrid issa s iγsan n iregzen ittunγan. Nezγen medden ulawen-nnsen, ddun deffer n tkerrust tageldant, ar kerrzen udmawen d idmaren-nnsen, sfuffind izlan, ttin i tkerrust iγwman s idammen.
Beddiγ γas nek. Ul-inu ar ikkat. Aḍu n walim ar id-itteffeγ seg wanzaren. Tenyuddu teγyuliyt g idammen-inu amm yisiḍ, iriγ tawtemt. Yusy-i waḍu yejjan n tfekkiwin iclulfen γer iγṛem n tmegganin.

Nniγ-asent :
– Immut ugellid!

Ullant γef iγiṛ-inu amm tazzanin. Kud allant sswant alim s tkareγ idmaren-inu. Γas kḍant aḍu n uγyul digi yzedγen festent, kksent iselsa nnsent …

Ffγeγ-d seg γursent. Seg talkiwin, nnant-i :
-Uγul-d tayeḍ tikkelt. Ttun-aγ akw medden allig naγul negra aseṭṭa.

Uteγ-asent s iγef !

Inγa-i wul-inu. Uγuleγ γer taddart ad sgunfuγ. Timegganin ssuḥlent-iyi ifadden ur zmireγ ad beddeγ …

Nniγ g iγf-inu : Idder neγ immut ugellid ! Ad iddu ad iqewwed ! Rtiγ-as ad iγus g uzerdab usar ixessin.

Lekmeγ-d taddart. Ur zmireγ ad aliγ γer afella. Uran-iyi ifadden. Usiγ tabrat illan g tqedduḥt n tebratin ar ttaliγ telγu telγu allig-nn lekmeγ afella.
Mγerdeγ γef tadawt. Ssiqqeγ aṛadyu. Sellaγ i umnukal ar isawal i ugdud. Awal-nnes idus ar issergigi igidar n taddart. Uzneγ afus γer idmaren-inu. Ig akw azeggwaγ s idammen …

Ajenwi n umxezni ibbey-i ul, ibḍat γef sin !

Nekreγ, seksuγ γer asuk seg usfaylu n tgemmi. Ẓriγ medden da ttrun, ar teddun deffer n tkerrust n ugellid immuten. Nek iγf-inu isul-nn g tgemmi n tmegganin. Tawengimt-inu tsul ar ttini : Ad iddu ad iqewwed … Ad iγus g uzerdab … Idder neγ immut … Ur i-iddi ka !

Xnifra, awilan n 1999

Tamawalt :

Tasukt : ruelle / Angaẓ : la souffrance / Timegganin : prostituées / Azerdab : Le grand feu/ Isiḍ : la rage.

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *