Unuγ n Muḥend Ameẓyan SΣIDI

TAẒURI TAMEΓNAST SEG YIWEN USEKSEW AFELSUF

0 44

“Taẓuri ur da tgeddel awd yiwet tγawsa γas tinna igeddlen tilawt, af ad aγ-tger mnid n tilawt-a”.

   S wawal-a, inna Hunri Biregṣun wis nγiy ad nakez is tga tẓuri yiwen g yifeggagen iferrgen i tilawt mnid n yimγarqecbuten iddalen tidet. Aya γef tẓuri s umata, maka ur idd yiwet ayt tga. Gguten yigwemmaḍen g tẓuri, nekwni qad nsiwel γef tẓuri tameγnast, tenna yusin aggwa.

   Taẓuri tameɣnast tga yiwet tiremt tamaynut, d-iffeɣen ḍart umgaru amaḍlan wiss sin. Tlula-d ayenna d-nekren waggagen ad farsen tiẓuriwin mnid n yidabuten iɣrudanen.

   G umata, izalen ɣef ittnaɣ unaẓur da tteddun mnid n win udabu. G ugama-nnes, iga aɣwewwaɣ, iqjer, ur yadduz tamara n uzemz. Maka imgalen-nnes, da t-reddun, acku da isemẓiy taẓuri g wana asertan. G useksew-nnsen, taẓuri tga igwemmaḍen, d tmeɣnast da tsemmuzdur anamek n wawal. G useksew-a, inaẓuren imeɣnasen da smuqqulen asniɣes-a g yiwen yiɣmer yaḍen. Taẓuri n ufulki da teddal tamara n uɣref illuẓen ar tesskan tawant.

   Γur Jan-Pul Sarṭer, igiten-nneɣ gan akw imeɣnasen acku da ttnaɣen ɣef yizalen-nneɣ; ayenna mi ran gen-t. Ku igi ɣures atig-nnes, seg tesga g t-id-iseksiw bab-nnes. Awd g winna ur iẓilen, ɣur umeggay gan imeɣnasen.

   Iseksiwen-a ifelsufen kan yiwen wujjuf i tẓuri tameɣnast ad taɣ amaḍal, ku yiwen d ma ɣef ittnaɣ. G umedya, da nn-nettafa snat tẓuriwin timeɣnasin, maka gant tinemgalin g useksew, ar ttnaɣent mgal yiwen udabu.

   Ad d-nuɣul s tẓuri tamaziɣt ilqaqen. S ugama-nnes idrusen dat win yiɣerfan yaḍen. G umata da nettafa, inaẓuren d-issufuɣen tamust ddaw yiɣed iɣwman s yimeṭṭi n wagim d uzgen n tkerkas. Meqqar tga tameɣnast, ur tennuli adabu tt-iẓelgen.

   Dda Muḥand AMEẒYAN SƐIDI iga yiwen unaẓur amaziɣ iburzen, ameɣnas, anazbay, abaylal, .. Awd yiwen g yirbiben-a d-yusan i twuri n Dda Muḥend acku ur ikki tasga ɣas i usesksew-nnes. Amm yigider itturun s yimeṭṭi n yiẓri-nnes igebbun ulawen. Imek nnan Jan Pul Sarṭer d Plaṭun, anaẓur ur da ikellu bac ad iẓil ɣur udabu. G yiwunak iɣrudanen, taẓuri da tettuksa, da tettumatar, da tettuẓmay ad ur tt-yakez umata. Winna tt-iḍfaren da ttuḍfaren. talwat n unaẓur tga aman n marur.

   G tekwla n Dda Muḥand, iggudey umyag “Zbu”. Amyag-a, iga yiwen ɣur yinaẓuren n umaḍal. Usin-t akw yiɣerfan, arun ɣifes g tsekla. Maka, tamentilt yusey ur taɣ g tiyeḍ. Kud ittnaɣ d udabu, kud ittnaɣ d yinelmaden, imeɣnasen d yinekraf ad d-akin, kud ittnaɣ d tudert. Ur ili ɣas talẓa.

   Tikwla d-izrey Dda Muḥand ɣubent g useksew amm bab-nnsent. Yalfus ad yili yiwen wudus iɣiyen ad asent-ik azal d watig ad ttuɣrent, ffɣent-d ad ttuyissnent acku imḍel Dda Muḥend ɛlulunt tekwla-nnes.

Muḥand, tusid talẓa

teẓrid agdud irẓa;

amata ibbey anẓa

Klu, taklut tɛezẓa!

Key tusid aẓaẓa,

ka γas da ittγeẓẓa

g unelli-nnes ag tellẓa,

tawda, adabu is inẓa

 

ΣEDDI AHIDI

Nis (Fransa) g wass n 24/06/2968

 

Tamawalt:

 

Tilawt: réalité

Aggag: intellectuel

Agama: nature

Amgaru amaḍlan wiss sin: deuxième guerre mondiale Igi: acte

Aɣrudan: totalitaire

Talẓa : pinceau

Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.