Asafar LIHI

SEMMUS N ISEGGWASEN UR ANNAYEΓ TIFA

0 158

Asafar

Ilula g useggwas n 1989 g Tizi n Imnayen, Asafar d inerzi g tdidaktikt n tutlayt tafransist g Tmesna (Rabat). Isnulfa g tizwuri n 2009 « Asirem Amaziγ », taγmist n imezraw imaziγẓriten n Tmesna. Ar awed itturu isefra s tmaziɣt.

Ur idneγ teγri g tesnawit xes kan wussan drusnin temmutey. Taγul s Tmesna i baba-nnes twuri, zzenzin tigemmi, ffγen Tizi-n-Imnayen. Awilan ayed da nn-ttagga unẓul maka γur bbaḥellu-nnes g Ufrekla ag t-inn-tezzruy. Meqqar tedda s wugar n semmus n iseggwasen-aya ur tt-annayeγ da ttamẓeγ ineγmisen-nnes, tameẓ winu. Tara, illis n εettis ayed itteddun ingeraγ, da γures d-ttekka awed ar kraṭ tikkal g useggwas, tawey azul ig tedda, trar-t-id ig d-ttaγul. Segmi ayed ddiγ s tesdawit ayed bbin ineγmisen n Tifawt smi ur iqqimi umazan ingeraγ, tuwel Tara.

Aya illa faysbuk (Facebook), da ttγimaγ mmenḍreγ iwenniten-nnes γef tewlafin n ka n imeddukkal. Ku tikkelt iniγ ad as-azneγ tabrat. Yan wass neccebγ-as g uwennit, trar-d, ur ides sawleγ xes tamrilt, geγ ides ad nemnala g ka g isasuten n Sswisi. Zrin wussan i-ibḍan d temnilit γef nemga zund tiwusa d iseggwasen. Ddiγ ad mnaggareγ d yan umdan kkiγ ssneγ. Ass-a awed udem-nnes ur γuri illi g iγef. Aγenzur, allen tixatarin d wazzar iṭṭfen s tẓuγi hil ayed kettiγ. S uzegzel, tatkut.

Yusa-d xla umhad maka fafaγ-d zik. Ur d-telkim tizi giγ d Tifawt allig druγ iga iγef-inu amellal s iciban. Ffγeγ-d g tesdawit ruleγ allig mmekluγ g Lqamra. Imi g tesdawit ssardeγ, udem g tisit mniγ. Kerḍeγ azzar, cicceγ tujjut, geγ ad sikkeγ ccita n teγwmas i tmuwwa sellas i ufud-inu irgag s lvibrur n ttiliγri.

– Alu !
– Wi, Σeddi !

Awiyha-new nettat, rareγ-as:

– Tifa, mani-kem
– Mani-k keyyin
– Nek, ha-yi g tesdawit. Mandi g tellid ad nn-dduγ
– Lliγ tama n lina, aγerbaz-ddaγ n tsegda.

Asin-i iḍaren-inu ar dinnaγ, kkseγ-d lmucwaṛ allig sefḍeγ udem, tegra-i-d g ubrid yat tidi tasemmaṭ. Ig seksuγ da, ig seksuγ s dinn ar ttinigeγ Tifa walu-tt. Uγuleγ γreγ-as, afeγ-tt-nn awed nettat imkinnaγ. Tekka ddaw ddilit n imi amajjyal n uγerbaz, tentel. Ur inni ad tt-yinniy xes unna ikkan tama-nnes. G uεraq annayeγ-tt-nn, uteγ-as s ufus. Nemyasay g irbi amm nga imeddukkal netta semmus n iseggwasen-aya neγ ugar ur iwti imi-inu winnes. Imkilliγ-nnes, ur tzur ur tqermim, ur tγwezzif ur tgwezzil, azzar tebbi-t. Timnilit tamezwarut tga xes id ‘’is tεeqqald i’’, ‘’i mani’’, ig as-nuley i wawal ig as-neggez ar γur usasu n ugharam asdawan. Neggez s usasu tasellumin, tagey ad nγwejdem. Seksuγ ẓares tennay-i: ur ḥmileγ dinna g iggudey bnadem.

Meqqar tekka g Tmesna iseggwasen isul diges εari, izdeγ-tt. Ur teḥmil adγar g iggudey bnadem, tenna-ak.
– Awey-aγ kem s dinna g drusen, ruriγ-as
– Xes itkar da bezzaf !

Tawey azmumeg g imi-nnes, tsiwel:
– key ayed i-iγran raεa mas i-ttawid !

Suleγ da swengimeγ s mas tt-ttawiγ, tut-i s ubaqqis, tseḍfur-as:
– Ad nezdeγ dγi da, mecctegaγ !

Urguγ-iss s usasu n usbitaṛ n tarwa, netta ag da ttedrasen medden, yizdig awed.

Umẓeγ taqhwat, tameẓ Tifa iẓem n uleččin, yameẓ-aγ akw diγ wawal seg ufella . Ur ssineγ mantur ayed ḍrant tillas. Tizwuri g nsekkiwes kiγ-as i Tifa udem, γwejedmeγ mnidas, smi ikkes γifi yan ugḍiḍ sster. Xes ad isεič iger-i-id lberḍ. Qqimeγ imkinnaγ allig i-tesmattey Tifa aseggiwer s tama-nnes. Dinnaγ adwal ayed ufiγ ad sniγseγ tifiras-nnes, da dikes ggareγ tiṭ, tger-tt-d digi tecceḍ. Mer ur as-d-γrin εniγ ayt γursen qqad nenes g usasu. Tekkes afus-nnes g winu, tesseγley lmunṭu, muneγ ides ad tameẓ Ṭramway ur ta tt-inḍiw.

G ubrid, nemseεrag ifassen, yagey awed yan ufus ad islelli wayeḍ, neqqim imkinnaγ. Knuγ ar γur umeẓẓuγ-nnes nniγ-as ka tuγul tesserul tafust-nnes. Ur as-giγ xes ad tt-nn-tesgulu tarufa, amẓeγ-as tazelmaṭ Awed yan isawalen, ayenna ur gin ifassen ! Γur Ṭram sgulaγ-tt-nn, akreγ-as tasudemt, yuwet tgujilt, inger imi d tqujjin. Dinnaγ urguγ s uγaram asdawan allig čiγ ka suγ ka, γwbbzeγ altu g temsirin-inu allig da i-d-qqaren imeddukkal s imensi. Kamla griγ leqejj amezwaru g imi ar tsinṣig ttiliγri. Ssneγ id nettat. Mani-k a bexxu ayed i-d-taru.
Rareγ-as, aγaram a tarir. Tekk dinnaγ, ig ur nemmeγri snat tikkal kraṭ g wass ur aγ-teεni ka. Uhu ! ur da zziγ nettemγra xes ig nra ad nemyinniy. Ussan yaḍen tibratin ayed nettemyazan.

Imalas tteqleγ ad i-id-t-ini mnala-aγ-nn Maṛs nγed Jupitir · maka tceqqa, Utt Merγad. S Uyaf Lman inu bu snat id nniyt γreγ-as g iḍ γur tis mraw. Ssnekreγ-tt-d g iḍes ur i-igi Ṛebbi. Ad igen ka iqqim ka ! Nniγ-as riγ a kem-inniyeγ asekka ar tekkat ka ar tzeggel ka. Ḍart wallas ar tteqleγ s tririt-nnes, walu. Taǧ-i, zund εenwa, allig kejmeγ s tesdawit teγri-d, bbiγ γifes. Urss mayed diges teγra, da as-qqareγ ard uḥleγ walu mayed i-id-iruran. Kud γifi ttebbey tiliγri as-qqareγ. Tin muc γur εzizen imeẓlag-nnes. Dduγ, teddu, tegmer twaγit tsenyuddu ingeraγ isaffen γbanin. Taγufi-nnes ur i-taγ maka mer ufiγ inniyeγ-tt. Yiwen wass, ḍart uyenna tugey ad d-ttrara i tebratin d tγuriwin-inu n ugratsa akw d tiliγri, γreγ-as s wuṭṭun n ttiliγri n umeddakwl-inu. Ar ttini: “tuttut … tuttut” imiḥ tasey, nniγ-as alu, tebbey γifi. Amya ur t-ukizeγ. Aγuleγ iγef-inu allig da seksiweγ ḥejji. Ur as-giγ maγef i-tnexxal imki.

Uteγ-tt s urekkil taγ-nn tiγmert, ig d tt-d-thezza tmektit ig tt-isγwebbez uzεaf allig ur yad ssineγ mani g nn-teffeγ Tifa. Tura taγul imkilliγ tga, tameddakwelt yuccekan semmus n iseggwasen neγd ugar. Nek s Legza yat tdeggwat, hu-tt nettat d mma-nnes ar ttettint. Bbiγ ẓares abrid hat ur yad nettat d mma-nnes. Tagẓiwt d igan zund mma-nnes Tara. Aserdas tuwel idda s Limarat izri-tt-d γur ayt Tifawt. G uyenna ukzeγ, tules-as Tifawt ka s mi ur i-tenni xes yiwen sin iwaliwen tenzeγ. Zund i-tenna, ha-k ayennaγ. Seksuγ s Tifa ar tteḍsa, geγ ad as-siwleγ tebbey-i awal g imi!

– Asekka g usasu-lliγ. Tγaled i sur i-tenγi, nek, tγufi-nnek a bexxu !
– Qqim g wawal-nnem, s uḥmaq ruriγ-as, sucku mek ur nn-teddid qqad am-nn-sqibbeγ tiflut.

Teḍfur Tara, sicckentent-i taṭṭangiwin n medden ingin g Legza. S usekka-nnes, tizi-lliγ, ansa-lliγ. Gulaγ-tt-nn ssudmeγ-tt g imi. Innay-i ssudem-tt. Aqqeγ-as afus s Hilṭun. Meqqar iγwezzif ubrid ur ides ukiγ, mud-inu ad nn-ngulu. Iwri-nn i wallen n medden, ad tes-asiγ g irbi, siwleγ-as g umeẓẓuγ. Ttiliγri γifi tebbey ttuγ-tt, tibratin ur i-id-truri ur ǧin tent-uzineγ ass-a. Awed awal naẓum-t, tafekka ayed isawalen. Asemmi, issergigin tuγmas iweta-t unerγi n jaj yafes tiγmert.

Tizwuri da ttiriγ ad as-iniγ, da kem-ttiriγ, teqqen-i imi xes ad festeγ. Ur baḍeγ greγ-as-t-id ar diγ tteḍsa, tessen is ur t-swengimeγ. Ittex i-t-tenna akzeγ id nniyt, as-t-tenna, zwiqeγ diγ nettḍsa meqqar. Babbeγ-tt, gneγ-as g irbi. Ur illi g urti n Hilṭun xes nekwni d yat tjappuniyt tazurart da ttgafay i yat tebridat tserreḥ-as-d. Nemγama g irbi, ig as dikes qqimiγ ig i-teqqima dikes, ar nettemseksiw allig γifneγ d-ibedda yan uεerrim.

Iqqim isemmeṛ, ar digneγ d-iseksiw, allen-nnes g tinneγ, allig γwejdmeγ g udγar, tγwejdem Tifa g wayeḍ εad ayed inzeγ iddu, inna-aγ-d: llah ihdikum. Ur as-giγ xes ad iεreq, mḍerraγ s Tifa ad as-ssikzeγ ad ur teggwed, tettel-i tiqrucca nerdel, neqqim g wakal allig da d-qqaren altu ayt taddart-nnsen. Teggal ttγima, nagur yat temrilt muneγ ides ar γur Ṭṭram, teddu. Teg ad taley kkeγ ḍaras. Aḍar-inu d winnes ar γursen g tgemmi, teggal-i kejmeγ. Ḍart imensi irar-i-id bba-nnes.

Yuweḍ umhad ayelliγ, dduγ allig ḥaḍreγ i usarag n Tifa d tfugla n tukki n igerdasen g uγerbaz-nnes. Lḥasul ur nemyannay, ass-nnaγ, xes kan tusdidin. Nettat ttnaγa d tefriwin ad teddu s beṛṛa, nek tuwey-i tesdawit. Sin imalasen ag nn-nemyannay, teddu tγufi ad aγ-tneγ. Nemga turtit n Hilṭun, tezwuri-nn.

Ur i-tgi xes ad γwejdmeγ nemmesnay-tent, timečaḥ maci lbunyat. Da i-tečencaf ard iddu ad yakuf wazzar, amẓeγ-as s teγwmas ancucen ard i-terẓem. Mṛaḍa mṛaḍa han aεerrim lliγ ibeddad γifneγ ar aγ-isawal xes s teεrabt, lfusḥa. Hal hada sulukun yurḍi llaha wa rasulahu, igen s tmaziγt kan amm, is iγuda wya tteggam γur allah d umazan-nnes, ayed aγ-inna. Suleγ uwiγ g iγef-inu id lajeṛ ayed itnada, nekreγ ad ides mzarayeγ, ffγen-d kkuẓ n amm id netta g tseggwin-nnes. Mḍerraγ s Tifa ffγen-tt idammen. Selleγ i ka deffir as ttiγ hat yiwen bu tamart ayed iccwun tajenwiyt. Tis sa tuweḍ, ammas n tagant nella diges. S tḥiliyt kkseγ-d ayenna akw γuri illan, aselkim, ttiliγri d kan idrimen maka ugin-ten. Ikkes-d umezwaru-ddaγ ka n tefrwit allig dikes iγra kan leqwran γef zzina d lfeḥca wa lmunkar, isdiddy-i adwal:

-Qqad kwen-nessiwel γef ssunna n Allah d umazan-nnes, neγ awen-nsafeε accad ard teḍrim, teddum testeγfrem i ṛebbi.
Ggwdeγ ad asen-iniγ hat ssenen ayt tgemmiwin-nneγ is nga imeddukkal, is γureγ simraw d kra, iseggwasen.

Mraraγ awal d iγef-inu, inniyeγ ajenwiy, serḍeγ aledduy g imi. tenḍu, Tifa tenna-asen:
– Utat-aγ ad ur aγ-tessiwilem ! Max mayed akw nga d mayed tγalem akw is t-tgam?

Terdel tesxef, ruleγ ẓares isers-i unna yumsen digsen taẓult i wallen, tuzzalt g ugerḍ. Ar i-semrujjuεen amm takurt, igr-i wa i wa-nn. Ur ksuḍen awed yan. Iwet-asen bu taẓult abeqqa, bedden yiwen ḍart yiwen amm iserdasen. nniγ-as:
– Accad aγ-takkam s sin ad t-amẓeγ xes nekk.

Irul-d ẓari ikkes-i iεban, isγwejdem-i. Inna-ak waccad γef tadawt-inu aḥafiḍ. Ittex ur wala irγi lḥal ar ttaylalen, s tleqwzin, idamen g tdawt-inu d ku titi. Ar ttakiγ d waccad allig ur da ides-ttakiγ, mud-inu Tifa ad ur tes-ggwin. Unna iṛmin g ayt tmira, isers-i iferγusen γef wudem neγ isatef g imi yiny-i: axzaka llah. Waddaγ issiḍinen igula-nn snat tmiḍiwin, timiḍi-inu d tin Tifa. Ku ig issaneḍ mraw n ljeladat imek as-qqaren irul-d iger-i aman n jabil nγed lxell i tadawt. Angaẓ zund da γifek itferraγ ka uzzal ifsin! Da ggareγ aγuyyi, mḍerraγ s Tifa, nniγ tameggarut-inu. Ḍart uyennaγ ẓriγ g usbitaṛ is yumes waccad s-ikkaten s teskert. Ran meqqar jjiγ ad iqqim uzmul, ad ten-d-kettiγ kktiγ-d zzina d leqwran d Ssaεudeyya d igidu. Sersen-i g uεdil leqwran, asin aselkim d uyenna dikes illan, ddun.

Nek s Tifa ha-tt tunef-d allen ur ssineγ imek as-giγ ssudmeγ-tt ibedded diγ bu taẓult γifneγ. Ammud n isefra yarun s tfinaγ ayed yufa g uεdil, ikkes-t-id, dati issekmeḍ-t. Inna-yi s tmaziγ:
-Tifinaγ tinneγ akw ayed tga maka itkar ucerwiḍ-a s lmuxalaft ccerεeyya.

neqqer-as aluqqid. Adreγ i wallen xes ad iffeγ tamanneγ. Icenti yannay Tifa tfafa-d ! Ikkes-i-tt g ufus, amẓen-i wiyeḍ. Ar tt-ikkat s iḍemsan allig ingi wudem-nnes s idammen. lfajira lexwra, ayed as-inna, iger-tt-d.

Mayed tteggaγ mayed ur tteggaγ, γreγ-as i bba-nnes yawi-tt. Ass-nnaγ s assa, semmus n iseggwasen ur annayeγ Tifa.


Tamawalt :

Tasnawit : Lycée / Awilan : l’été / Aseggiwer : chaise / Smi : acku, par ce que / Awennit : commentaire / Asasu : Café / Tatkut : rousse / Tasegda : Architecture / Tarufa : la poche / Tafugla : fête / Agerdas : diplôme / Tiskert : l’ail.

Yaru-t: Asafar LIHI

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *