Reẓ ṭṭabu a dd-teffeɣ tfukt

0 20

 

 

 

 

 

 

Ijjen zeg ungalen n mass CHACHA, iffeɣ-dd x wexxam usezregg IZAOURAN di Hulanda. Day-s 293 n tefray zi lqedd ameẓyan. Deg uɣlaf-nnes nettaf CHACHA iqqar manaya :
« Aydud wer yiwiḍen ad ireẓ ṭṭabu deg iles, ɛemmars ad yegg ṣurif ɣer zzat. Mayenzi di lqis-u, yedwel d iless i yetteggen alli, wer yeqqim ca d alli i yetteggen iles.
Ṭṭabu, maci yexs ad yini ɣir tu niɣ tin, Ṭṭabu yexs ad yini, merra mayen idewlen ixeṣṣ wer yettwiqqir. Waxxa netta yettwaqqar cwaycway, niɣ deg ul.
Awal x taqqut wer yexs ad yini, ixeṣṣ bnadem ad yettfekker zeg weqḍuḍ ; d tarezzut n twikkest i manayu.
Awal x ṣṣulṭa, wer yexs ad yini ɣir lmexzen, yudef di-s ula d lmujtamaɛ, lwalidin, mayen dasen-yennḍen d mayen wer yettwiqqiren.
Awal x lwalidin, amci/wer yelli di lwalidin, d awal x yiǧ n lmentuj, i dd-yeǧa ttaxelluf.
Leḥya, wer yexs ad yini, qqen tiṭṭawin x mayen yellan, nett labud zzi-s ma ad yili. Leḥya, malla teqqared min yellan, cekk tettsedḥid zzi-s, tetticced-as lewqer-nnes. Leḥya, yetteggen liḥya, wer yettɣimi d leḥya, yeddaggal d ṭṭabu, ineq bnadem.
Bnadem sennej i kulci, sennej ula i yexf-nnes. Malla tedwel dinni ca n lḥajet snnej-nnes, iddaggal d ḍḍaḥiyya n yexf-nnes. Ittegg ṭṭabu d sselḥ deg ufus-nnes, ineq zzi-s ula d wen yeqqar ixleq-it-idd, mamek mma yexs ad yili, wu i xef yeqqar, aqqa yexleq-it. Ddin, lexmi yeddaggal d ssiyyasan ixelleq ṭṭabu, ineq llah, ittcewweh-it, itterra-t d lmunster. Ineqq merra mayen yellan d asebḥan, irezzu mamek i t-ɣa-yerr d aɛeffan.
Bnadem, i yettexsen ad yili bnadem sennej i bnadem, wer iḥemmel bnadem, ikerreh bnadem ad yili d bnadem.
Bnadem, maci d wenni i yexsen, yettwala ṭṭabu ɣir di ḥedd nneḍni. Bnadem d wenni i yettwalan, ixeṣṣ-it, ad yettwala ṭṭabu ula deg ixef-nnes, malla yettwala ṭṭabu deg unneḍni. Mayenzi bnadem, wer yettwili lḥajet, al ɣa-yakid-s yaka nett zi tyimant-nnes, deg yixef-nnes.
Ṭṭabu, wer yettili d ṭṭabu, al ɣa-yedwel bnadem zeg ixef-nnes d ṭṭabu, yeɛdu ṭṭabu, yegga i ṭṭabu ṭṭabu.»

Xalid Buyeɛla

Tagged with: , ,
Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.