RAKUDA, ALΓWEM N SLIMAN

0 108
Buba Azegzaw

Buba Azegzaw

Buba Azegzaw: Anaẓur d umyaru. Issafeγ-d kigan n iḍrisen s tmaziγt g iγmisen d tesγunin g Meṛṛuk.

Kud izzuγruṛ yettirir. Sliman ur da isuggur deffir-as. Dat-as ag tella tnezruft tameqrant mm-igida iεerrcen. Ddunit. Ḍar-as lliγ nek, alγwem-nnes. Yan g ukabar. Afella n tadawt-inu tqeεεec yat trumit tgellint ur da tsawal wala trurad ineγmisen. Tfesta ar tsuggur s tafuyt d tnezruft d nek ar ttetter rebbi-nnes i wγlay n tafuyt ad iḥlu. Laḥ azgu laḥ isignew laḥ… yan wass isskern iγef-nnes mek nna ira.

Lliγ g meẓẓiyeγ ur iyi-nnin hat ad geγ asnay i yirumiyen. Ur ssineγ. Ddiγ-d s iγef n lεerg am kull ileγwman. Iεejbi lḥal. Ar snuyeγ irumiyen d trumiyin. Ar ttelmadeγ lexdemt iliγ tawuri. Ur ssineγ mayd ttinin. Ar ttelmadeγ cwi cwi alliγ giγ alγwem n irumiyen. Amezwaru. Isem-inu yaγul iga : Rakuda.

Yeḥla γuri ad ssexlaεeγ tirumiyin. Timeẓẓanin. “Au secour..!!” da ttedduγ s ttawil. Cwiy nedheγ. Cwiy ar reggweleγ amm g lakuṛs (la course). Ar ttehḍareγ ar ssduwwareγ iγef ammi riγ ad tent-qerrceγ. Lehḍert u ṣafi. Tarumit-lliγ n Ḥmad Rra tga tahulandit. Yat terbatt yeḥlan awed g zzin. Llah iεemmerha selεa. Talnin-nnes zegzawent yessentel-tent yan wazzar n tamimt. Zzin ar yetteddu. Nek dda ur igin amdan teḥla γuri ajjenn akw icemkaren-ddeγ n gidu.

Tsul tella afella n tadawt-inu. Riγ ad ids hedṛeγ cwiy tessumeγ-iyi tadawt. Wa tamukrist-aya. Medden mec gwden da ssumuγen s ubeẓẓid. Tamara safi. Nniγ-as bennaqs !!

Sliman isul ar yetteddu ar yettirir. Ur t akw igi ṛebbi. Ur yessin mayd ijran ḍar-as. Zund kul id bu ileγwman, ur yessin g iles-nneγ γas “utecc!!” dda ur igin awal. Iḥla γur medden ad iγilen idd is ur nessin walu nekweni ilγwman. Ar ttefraḥen ad ilin abda afella n kull lxalayeq yaḍen. Amdan yessker i uqeṛṛu-nnes taḍfi n tudert xef tdiwwa n ileγwman.

Qneγ imejjan kud yettirir Sliman. Meqteγ irir-nnes. Ugar n 10 n iseggwasen a-ya yettirir ‘la même chanson’. Wah! bezzaf. Kud yettirir yettisil γas i wawal-nnes. Agerḍ-nnes iga γurs wahli a lḥal. Tawargit ag nn-yella mad igenna mad uress. Beddeγ! Isul ar yettedu. Tḍer lexzant s akal.

Ur akw d-yawiy acḥal is nek d tarumit nsul ḍaras. Yedda. Iγley-nn talεregt. Iḍaṛṛen-inu γzan akal. Tarumit afella n tadawt-inu ibbiy degs lḥiss. Teggwed ffγen-tt idammen wala tγiy ad d-tessufeγ taγuyyit tγer-d i Sliman.

“Pliz.!!” Nek ur mmerxiceγ

Tafuyt tedda teγley. Yeṣfa uγlay-nnes ur igi imci seg wahli. “pliiz..” walu mayd am-isellan a benti. Tcebber tesγer xef thawitt. Iḍarren-nnes ar ttergigin. Nekk myareγ medden yetteggwden d wida yettergigin. Llah yexliha marka.

Riγ ad as-sawleγ iniγ-as:

” Ad ur teksuḍ-t walu a madame, hat ur telli ḥetta yat tmukrist. Nekk hat ur da ttsettaγ medden. Hat ḥeṛmen. Nekk giγ “vegetarian” beεda. Do you understand ? “

Nniγ day ur yenni ad as-yaf lḥal mec as-sawleγ. Ad teffeγ ixef-nnes. Wah alγwem isawalen tamaziγt d tnegliziyt. Wiha!! Ur riγ awd ad sgiwteγ id steriotypes γef ileγwman. Festeγ nniγ mar ad yakwi Ssi Sliman. Inchallah, nnan-t igiyyaḍen.

Tarumit-inu iceqqa-yas lḥal. Ssneγ is da talla mac ur riγ ad ẓars nn-suggreγ. Ur tessin idd ad tall mid ad tayell mid ad teffeγ tagerrawt-nnes. Nekk wellah ar digi teqquma tgellint. Ur ssineγ matta tmaḍunt degs yellan. Medden gan “très fragiles”. Kerheγ ad asen-tini alγwem ad iyi-igan kan “Post Traumatic Stress” nγedd ka n tmaḍunt tasikulujit yaḍen.

Wa Ssi Sliman. Nniγ-as gri d ixef-inu. Matta bu yileγman tgit. Bu ixxan (haca ssamεin). Idd nekk ad ilaq ad ak-sslemdeγ tawuri. Hiyya nek giγ Bu Medden g udγar n key Bu Ileγwman. Ẓẓmer ! Zeεfeγ acku usiγ anezgum n tamalayt n Tnezruft. Mayd γifneγ ttinin irumin. Ur riγ ad iniγ nek γas alγwem ur iyi-igi ṛebb. Urdd ccγel-inu.

Nniγ diγ ad as-nn-sawleγ i trumit iniγ-as: “Cuf a madame. Nekk ur am-riγ γas lxir. Wellah. Nek a
madame xedmeγ g ssiyyaḥa (tamalayt) ugar n 14 n useggwas. Seggwat Sliman. Ssneγ kulci. Ssneγ akwed awal-nnem d wahli n ilswen yaḍen. waxxa da d-ttraran id Sliman iqariḍen xef tdiwwa-nneγ. Ar ttsettan
tiγrad-nneγ. Ur asen-kriheγ walu walayenni han kemm ar ttiẓird s talnin-nnem. Dγi ur kem-yeṭṭas awed maεlem. Γas qqim trankil.”

Ẓund ammi teγra g tektay-inu. Γaleγ is iyi-tenna: “A Sidi Rakuda, nek ur dd tin ixef-inu. Waxxa nek ur giγ talγwemufubitt, key da tqeṛṛact, da tesfuẓẓuḍ-t, ar tessutuft xef wudmawen n medden. Ul-nnek yengal ar
ttiεeqqilt i lεar…

“Uhu a madame. Ssurf-i. Γas tiḥellal d lekdub d txendallasin ayenna. Tetkwarem-issen. Amdan ira ad yaf kul lxalayq. Yessmeg akw aytmas daccen a yilγweman. Amdan ira afella afella. Ira ad igeld. Nenna-as waxxa a sidi γas ddu. Nboykotta-t. Ur nri ad as-nsawel. Acku kwenni ur tesliḥem. Ur nri ad awen-nsawel ar awen-nesseflid ar nsawal geraγ. Iceqqa-awen lḥal acku ur tessinem mayd γifun nettini .Wasa darneγ tilluγma-nneγ, tamagit-nneγ taleγmant tuf-aγ tudert. Ur da nettiksiḍ ḥetta yan. Ar nxeddem d medden waxxa gan “lxaṭar” a madame. Da γerrsen s ijenwiyen. Gan iγeḍḍaren. Ur tessint acku ur ǧin tgit talγwemt. Tessent nnik maγ ur da tγerrsem i aytmatun ar ten-tesγusem s lbaṛud.”

Tbeddel tṛumit n ṛebbi tuγal tger yat tγuyyit allig mneqqren igudar. “Au secour!, help!, help!!” Cwiy han Sliman yiwi-t-id uzwu amm lciḍ. S tarula as-d-ireggwel, kud tγewwat tṛumit. Teffeγ ixef-nnes. Nek ur ssineγ mayd as-sskareγ. Ccγel n bnadem ur as-ssineγ. Neγed awed ur riγ. sneγ idd is nek ayd iqann ad amẓeγ ameεraḍ d treggam. Mac nniγ mec ur as-sneεiteγ i Sliman, mec ur t-sseγriγ ass-a hat ur giγ Alγwem Amhari Abaylal Camelus-Dromedarius bu laṣel Acamelidae Aqbuṛ Azedgan.

Kud d-yettikmir smmectageγ iḍarren d ixef ur tt-iwiyeγ g taqqurt n tṛumit. Nedreγ s wawal-nneγ nniγ-as :“sugger is tedderγelt?”. Lliγ g ira ad yameẓ lexzant ssnaleγ-as ixef-inu ad nn-iεreq. Iεawd yeddud. Ar d-ittikmir s ttawil.
Yeẓra s talnin-nnes yat tfiγra taxatart taγwezzaft tazurart mi ukleγ ixef s yan uḍar akelγ-as adis d tgejjimt s wayeḍ. Ffγen-t idammen s tasa. Yaγul ikkes-d taγruct seg tama n tṛumit ar d-yettenmili ssekreγ-as abrid yeldi-tt-d, iger-iss, yakel-as ixef allig as-sellaγ tesswiẓẓey. Iger-iss diγ s ttisaε. Ar tt-yekkat allig temmut. Ar d-yettali Sliman s ttawil. Ssneγ is yukez lafut-nnes. Yagel-d allen ẓari suggreγ-nn. Mnaqarent talnin-nneγ. Iḥeccem, yader tinnes. Issen is giγ tireft i twaγit. Tifiγra ur tessin lehḍert. Da ttqerrac ar tneqqa.

Uǧiγ-as lexzant neg demi-tour. Tafuyt tedda teγly seg wahli. Taṛumit teẓra kulci. Tessen, telmed. Ur yad da ttergigi wala teggwed. Ar nettegez s kraḍ idneγ s ttawil. syafaγ idd is liγ atig waxxa medden tgezzul-asen tzikert n tmektit da ttettun deγya.

* Rakuda : Alγwem s tjappunit

Yaru-t: Buba Azegzaw

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *