Aksel AẒERGI

NIKṬAMMIR !

0 80

Ikcem-d ɣer afagu n umitṛu, tabennist (bouteille) n waman g ufus, ar isḍiḍiy s waḍu n uɣisim (alcool). Iɣwejdem, issiɣ i wagiṛṛu. Indeh umitru. Inna-as-d yan uterras iqqiman tama-nnes :
– Megdul (interdit) takemmayt g ifaguten n umitṛu !

Imel-as s ufus anazal (logo) ittemran g teflut n ufagu, irnu, inna-as diɣ :
Daccen azref igdel takemmayt g idɣaren izayzen (endroits publics).

Irura-as :
Ur ssineɣ ad ɣreɣ ! Dac-cen mak id yuwin s awal ! Seksew dat-ak kud urta k-sedderɣileɣ a yicenti. Memmis n tmeggant ! Ad iffeɣ kra n wawal yaḍen seg imi-nnek ak-qqu… Qewwed !

Isseknu iɣef amm igdi iggwden.

Festan akw imessukal, awed yan isawlen. Ibedda umitṛu g usebded-nnes wissin, iffeɣ uterras, iddu yali g ufagu yaḍen. Isawel bu tbennist, inna :
– Inεel ddin Fransa-ddeɣ !

Irẓem tabennist n waman itkar s uwiski, iswa digs, inna :
– Tamazirt tameggant ay-a ! Ilaq-as kan urgaz idusen, izemren ad t-inbeḍ, irar-as udem ɣer abrid inmen.

Dat uterras, iggawer yan urgaz awessar. Timelsit-nnes tzeddig, iɣef-nnes imellul s ibe-nẓaren, ibbeẓ udem g uɣmis “La voix du Nord”. Ku tikkelt g isawel uterras, yasey allen, iseksew ẓars.

Inna diɣ :
– Tenɣa-yaɣ tmazirt-ddeɣ. Izerfan n twetmin, izerfan n zzwamel. Izerfan n iyḍan. Tur-a nnan-ak ran add ssufɣen yan usaḍuf ittaǧan zzwamel ad myawalen. Iwa ur idd tameg-garut ay-a ! Ran tur-a tametti-ddeɣ ad degs nebḍent twetmin d imegganen. Iwa ixxan aya ! ha !

Mseksiwen imessukal, imiq ku yan ibbeẓ diɣ iɣef-nnes, kra g udlis, kra g uɣmis. Itsen ar seksiwen ɣas iḍarren-nnsen, susmen.

Isawel diɣ, inna i urgaz iqqiman dat-as :
– I mayed tennid keyyin g tmara-ddeɣ tungalt iwtan tamazirt ?

Iseksew degs uwessar, ifest ammi ur as isella.

Inna-as uterras :
– Waqila awed keyyin tegrid tawriqt i ukabar anemlay (parti socialiste) g tfernin-ddeɣ timeggura. Kwenni ur da ttakzem awed iɣef n tissegnit g tsertit n inemlayen (socialistes). Tessend wi-nnaɣ mayed msen ? Tannayed mayed aɣ tessker Martine Aubry da g Lil (Lille) ?

Inmala ɣer argaz awessar, inna-as tama n umeẓẓuɣ :
– Winnaɣ, hat ad awin tamazirt-ddeɣ ɣer arwas !

Ifesta uwessar. Yusi aseksew ɣer aterras, iwwet s uqerru ammi as inna “Ukzeɣ mayed tennid. Awal-nnek iga tidet”.

Iɣwejdem diɣ, inna :
– Awed awal ur tezmirem ad tsiwlem ! Mek teddam imki, imiq ad awen sselsan iselsa n twetmin, inin awen ad tteggem abeẓẓid s uɣwejdim. Ad tuɣulem ammi tellam g tmura tiskundinaviyin. Awi hat arwas as teddam. Ferru n tmurkist-ddeɣ n Fransa, iga-tt yis-lam ! Ccariεa ayed igan asafar i umuḍin-ddeɣ … ɣas ccariεa.

Γas inna awal-ddeɣ ameg-garu, iduyed urgaz awessar, inker, ismutter aɣmis-nnes, yazen afus ammi t-iqqes ka ɣer trufa-nnes, ildid kra n tɣawsa tameẓẓant isetmer-tt g umeẓẓuɣ-nnes azelmaḍ. Ibedd umit-ṛu, inna umɣar :
– Yah, druɣ ayed zegleɣ asebded !

Iggez min ad iseksew ɣer aterras iṭṣan amm kra n unfal, inna :
– Nekkin isawalen i uḍerḍur ayed ixiḍen !

Iswa g talbennist, iggiwer, inna-d i uwessar, inetlen ammas n medden :
– “Nique ta mère” a yicenti. Memmis n tmeggant ! Irnu-as diɣ kigan n treggam ixemjen.

Iseksew ɣer imessukkal, inna-asen :
– Iwa mayed tennam ?

Awed yan as iruran. Iqqim ar isgengim netta d iɣef-nnes amm kra n iwdanen yucckan mi qqaṛen g tmizar-ddeɣ “Tasuta n Niktammir”.

Yaru-t: Aksel AẒERGI

Unuγ n Muḥend Ameẓyan SΣIDI

Unuγ n Muḥend Ameẓyan SΣIDI

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *