NBA

NESSAR TINAṬFATIN AKW D TMARẒAGIN

0 74

 

 

 

 

 

 

 Addag ilkem uzmez n wukus n uzemmur da d-nkettey tizlit n Taṭfi n uzemmur nna nessar nek d yigellin n Nba Saɣru ; is tga akud n tassast d tareɣdemt, da d-nkettey tizlit n Ulac Smaḥ nna nessar nek d Nba d Uleḥlu ɣur d-nugem anya.

Nessar d Nba yitsent taṭfiwin ur ittekksen g twengimt zund umu g yiwet tdeggwat tanaẓurt g yiɣrem n Teɣzut n Ayt Ɛeṭṭa, tawuri nna tessudes Tmesmunt Aẓnig (Oasis) tezrey g umdaz d taymat maca tsegrures yiwet tiwent nna nniɣ amɣar n Teɣzut iddeɣ as-nniɣ : Ifsey ugraw azeddag, amɣar, iga-t ubergag ; ammerẓa yaɣ asarag, ansa yugey tilelli !

Iɣal yigellin idd netta ayd utiɣ s wawal !

Akud nna g tesmar twuri, nemmegraw nek d unaẓur-nneɣ Nba, ar itteḍṣa acku iɣwḍef i uyenna yaɣen amɣar d ubhaḍ n yimannayen llanin tasga-nnes.

G tama yaḍen, g yiwen waddad yaḍen yugin ad i-issgunfu tawengimt, riɣ ad d-ssektiɣ yiwet twaɣit izemmem umezruy amaziɣ s uzerdix ungal. Tawaɣit ikkan ɣef unaẓur ameɣnas Nba telkem-i-d tesserfu-i zund tiqqedt g wul. Yaɣ uya n wafa g yiɣrem n Nba, Mellɛeb, ayenna ikka yigellin n Nba da iferreg i tɣawsiwin n tmeskaniyin tteggan yifeddamen n tmazirt. Usin-as ayt tgemmi-nnes akw ayenna iffer awin-t s kra n umerdul sskemḍen-t. Iddeɣ snaɣsen yimeɣnasen n yiɣrem ayedda yaɣen ssnekren taɣuyyit ɣef yigellin n Nba d ayt tgemmi-nnes, ar ttinin gan akw ixendallasen ikennaden. Ur zzgin awal g yiɣrem maca zuzzren-t g tesdawiyin d tmesmunin.
Ur as-yuwis i Nba ɣas imeddukkal-nnes illan g Dades d Mgun meqqar ur zmiren ad kksen timaryin n tesdawit n Ugadir g lan afud.

Nekkin, iqqima digi waddad n yiwen unaẓur ifkan afud i Umussu Adelsan Amaziɣ allig izgel irin yismunen-nnes ad t-ssukkfen g unrar n tɣensa d usfafa. Nadaɣ ineɣmisen allig ufiɣ taɣbalut n uzgal n Nba: Netta a ɣur da srusen akw ayedda illan n yicenyalen imaziɣen d yisiraten g ttyarun yimesɣerten n tmeskaniyin, ɣas netta ayd iffren afa d tirrgin g tgemmi-nnsen ! Imeɣnasen kksen anezgum acku ur ggwiden i mayed ittyafan ɣursen ; da gganen fsisen wulawen-nnsen. Maca imeggura-ddeɣ ayd nn-ufiɣ zeglen gen ixendallasen nitni ur irin ad amsen iɣed n tɣensa zrin-as-t i Nba agensu n tgemmi !
Rnu-as, Nba ur igi yiwen unaẓur afessas s iɣiy Umussu Adelsan Amaziɣ ad izerreḍ acku ila atig axatar ɣur wahli n yimezrawen d tmezrawin d yifeddamen d tfeddamin g mani tekkid.

Nemrara awal nekkin d yitsen yimeɣnasen n Umussu Adelsan Amaziɣ n Yimteɣren akzen tamukrist kersen yimeddukkal-nnsen s unnemrar. Nniɣ-asen ad gen ussisen n uswingem –acku gan imezrawen umsiden- ad stin ger Nba ameɣnas ittulumsen s uzgal d txendallast d Nba igan anaẓur ɣur uddur d udɣar g wulawen n widda d tidda issnen atig-nnes, maca ur wala illi wakud n umsawal d ussikez n tama tamezgalt n tidet.

Anniɣ tifelwin n Umussu Adelsan Amaziɣ meslent rareɣ amussu n uswingem-inu s tesga n tmesmunin.

S umdaz d taṭfi as nusey nekkin d yinemɣuren n Tmesmunt Tamettit Tadelsant TILELLI taɣtest n ussemɣur n Trabbut n Nba Saɣru g Tizi n Yimnayen.
Nemmedraw amdaz nekwni d Nba g yiwet n tdeggwat ur ittwattun mi han yimezrawen d tmezrawin mi gedlen yinemɣuren-nnsen ammezday d yiwen umarir ur yuklalen ad ilku neɣ ad yatem zund afraḍ.

Seg twaɣitin-nnaɣ d yitsent yaḍen ayd ukiɣ d waṭṭan yaɣen imennebḍen n Tweɣni Tanamurt n Umussu Adelsan Amaziɣ ; aṭṭan isulen da ineṭṭed seg tsuta s tayeḍ, walu mayed isniɣisen tirut n waggas.

Ɛumar DERWIC
Aẓru n Ayt Wasif g 01 Nuwanbir 2968
13 -11- 2018

Tamawalt :

Ha : être présent ; Tihawt : présence ; Amha : présent (n. et adj.)
Han : Ils étaient présents)

Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Nba