Muhend

MUḤEND, TAMEKTIT TAMΓEWWEΓT

1 160

Ig tsreḍ tenbaṭ kra n unaẓur neɣ amyaru da t-tessemɣur meqqar ur iswi awed tamuzunt. Da t-tesgufsu1 s gar arrazen2, terẓem-as tifelwin n tiliẓri3 d tɣamsa4 ard yiɣil is imeqqur. Ig issadem afus d uḍar i tenbaṭ, da ittuɣul amm yismex-nnes. Amm ufecku-nnes acku izzenza-as iman-nnes, ifk-as iɣef-nnes. Ass g iss tfukka tawuri-nnes, da t-tzerrey g ubrid amm kra n umuḍin ur ilin asafar. Maka, ig itlef unaẓur neɣ amyaru s tenbaṭ, imel-tt s ufus i wiyaḍ af ad asen-issken udem-nnes n tidet, da t-tettettu tut medden ard t-ttun, ard sselkun tawuri-nnes sserkun awed tamektit5-nnes. Amek ? S tiliẓri d tɣamsa-nnes tikucamin.

Inaẓuren d yimyura s tutlayt tamaziɣt ur akw gin yiwen. Llan winin tidet, winna immuzɣen, issemɣuren idles d tutlayt-nnsen s twuriwin-nnsen, ar awed ttnaɣen mgal n tenbaṭ s tebɣest6, ilin diɣ inaẓuren d yimyura izegzawen immuzedren, ittemran g Usinag Ageldan7 d Umexzen zund izabben. Kud ttettan g uyenna yufan amm yimudar8, ttellɣen afus d uḍar ufan. Widdeɣ ayed iggudin tigiriwin-ddeɣ g tmazirt-nneɣ. Widdeɣ ayed iseḍren timmuzdert ɣef yidles amaziɣ allig iwraɣ wudem-nnes.

Maɣ allig d-uwiɣ awal ɣef uya? Aseggwas aya ttxemmameɣ g yat tedyant i-ibrin. Ur nniɣ ad ɣifun aggugeɣ kigan. Ad qqimeɣ ɣas da g Unẓul Ugmiḍ9. Aseggwas izrin, isra yan unaẓur ameqwran ur ǧǧin iknin dat tenbaṭ. Tt-yugin. Ur ǧǧin iffir iswingimen-nnes. Ittyassen s tẓuri-nnes, s temɣwer n wul-nnes d s yimenɣi-nnes azegdan ɣef yidles amaziɣ. Ur ǧǧin iffir udem-nnes, iles timelsa ur igin tinin-nnes. Ilula d amaziɣ immet d amaziɣ.

Iddeɣ isra Muḥend Ameẓyan, ur d-iseqsa g twacult-nnes awed yan uneɣmas n tiliẓritin timazdarin n Merruk amm 2M, Tamezwarut neɣ awed Tamxezniyt TV (Tiss 8t). Maɣ allig neẓra tiliẓritin-ddeɣ xwlant awal iddeɣ mmuten kra n yinaẓuren (ur nniɣ ad bedreɣ ismawen-nnsen)? Maɣ allig ur tsawel awed yat degsent ɣef Muḥend? Maɣ allig gant ammi ur illi, ammi ur ijṛi umya? Maɣ allig tent-isenbuttel10 Muḥend? Maɣ allig as-ggwdent? Maɣ allig ur gin yinaẓuren yiwen g useksew n tiliẓri d « yineɣmasen »-nnes imkinna aksulen yinaẓuren-ddeɣ yiwen dat tmattant?

Ur lliɣ mgal n awed yan unaẓur neɣ amyaru. Riɣ allalen11 n umsawaḍ izayzen12 ad akw gen win medden. Ad ɣifsen akw siwlen min tudmawin.

Awed Igellin n umedyaz Buɛezza n Musa, iddeɣ immut aseggwas-a g Xnifra, awed yan ɣifes isawlen. Ammi ur ǧǧin ikki. Ammi ur ǧǧin iɣewwiɣ13 mgal n tenbaṭ, issefru tidet i yimezdaɣ. Seg mayed tsul tmazirt ddaw uḍar n Fransa ayed yukez tasertit-nnes, yirir-tt g tmedyazin-nnes.

Ad uɣuleɣ s aseqsi-nu. I maɣ? Acku Muḥend ur ǧǧin ičči seg uɣrum n Umexzen. Ur ǧǧin yumiẓ kra n warraz-nnes. Yugi ad yumu g temlellay-nnes, g yikerkas-nnes. Muḥend islatef ɣef tsertit n uwanek14 ameṛṛuki, yugi-tt. Yugi asinag-nnes akucam. Ur ifesti. Isawel, isɣwayy g wudem n tenbaṭ. Aɣuyyi n Muḥend, sellan-as kra ger Yimaziɣen, tsella-as awed tenbaṭ. Tefra-as-t awed nettat iddeɣ t-yaɣ ka. Ayennaɣ dɣi ag da tekkat ad t-tsettu i medden, ad t-tger ɣer ibgez n umezruy15. Ayennaɣ ag ur ɣifes isawel awed yan «uɣmis» ula « tiliẓri » n tmurt. Ammi ur llin yinaẓuren iburzen16 g tmazirt, ammi ur degs iregzen. Kigan g « yineɣmasen » ssadmen afus n tenbaṭ, gan isemxan-nnes.

G tesga yaḍen, nniɣ diɣ yuf diɣ is ur ɣifes sawlen. Mayed ira ad yini ismex ɣef tlelli, ɣef tẓuri, ɣef yizerfan, ɣef Muḥend ? Amya! Imedyaten ggudin. Nannay ussa izrin Tamxezniyt TV tsawel ɣef Yigellin n Bujemɛa Hebbaẓ tenɣa tenbaṭ s yiwes n kra n « Yimaziɣen » ittyassnen illan dɣi g Usinag Ageldan. Asenɣi n wul ayed tga tejmilt-ddeɣ takucamt ittugan i umeɣnas Hebbaẓ. Kra n umaynu ur illi ɣef tedyant17-nnes. Sawlen ɣifes af ad t-gren ddaw ufus-nnsen. Ad kksen azal i twuri-nnes skireksen ɣef medden.

Da ssirimeɣ ad d-nekren yimeddukkal n Muḥend. Ad d-fafan, ad akzen mayed illan. Mek ur nessemɣur nekwni anaẓur-ddeɣ aɣ-d-izrin agerruj18 ger yifassen, awed yan ur inni ad t-issemɣur. Iqqen-nn ku yan ad d-iger afus-nnes af ad nessufeɣ isem-nnes d twuri-nnes seg tillas g tra tenbaṭ ad t-teffer.

Muḥend iqqen-nn ad iqqim g wulawen n medden iran tilelli, ittnaɣen ɣef yizerfan d tmust19 tamaziɣt. Muḥend ikka idder d amɣewweɣ. Iqqen-nn tamektit-nnes ad teg tamɣewweɣt. Isemxan issiwid, ur aɣ degsen iddi ka. Ad ddun ad qewwden nitni d Umexzen !

Iwa mayed tennam ?

A. Azergi

Amawal:

– [1]: Corrompre
– [2]: Prix
– [3]: Télévision
– [4]: Presse
– [5]: Mémoire
– [6]: Courage
– [7]: Institut royal
– [8]: Animaux
– [9]: Sud-Est
– [10]: Déranger
– [11]: Moyens
– [12]: Publics
– [13]: Se rebeller
– [14]: Politique de l’État
– [15]: Poubelle de l’histoire
– [16]: Courageux
– [17]: Affaire
– [18]: Trésor
– [19]: Identité

Tasghunt Idles

View all contributions by Tasghunt Idles

1 Comment

  1. Iri Amsebrid December 23, 2014 at 14:53

    Nnan yimezwura a Mas Azergi : ” Idda wa’fa izri-d iγed ”. Iddeγ nn-taγ Tmaziγt afassen yumsen irkan cebbren g tmazzagin n timuuzdert, ayd, kullu mag nn-illa kan umeγnas aḥurriy, udren-t ttun-t is akw ikka tudert!. Maka, imkinna tennid ddren g wulan n imeγnasen iran tilelli i wgdud Amaziγ mag nn-illa. Gwma-nneγ Muḥend idder g wulanwen itterin tilelli. Tiktiwin issudan unuγen-nnes ddren-tt ara g tmektit n umezruy!..Ar ttalseγ i ywaliwen n Dda Lwennas : ” Awah awah a tuğğal, ruḥen-aγ yergazen ur nuklal!..” qqimen-d γas ayt tiḥḥuẓẓra !. Yedder umenγy !…
    Tudert i ymazighen n tnumi d uẓẓiḍer!.
    Ayyuz i Mas Azergi!.

Leave a reply

Your email address will not be published. Required fields are marked *