Σumar DERWIC

MEDZAT ALTU !

0 117

Medzat ! Ferḥat !
Midd g id Ferḥat ? Seg Ferḥat Σebbas ar Ferḥat Imaziγen Yimula, ur illi yisem neγ amyag (verbe) nna γef nsiggel. Ferḥat a winna d tinna issummen adif n tussna seg tesdawiyin d yiγerbazen ixataren n utaram (occident)!

Ar tteṭṭḍen allig ssalin ifadden uten akw timaẓẓagin s tiqqar zund ur ğğin degsent lmiden uḍuḍ. Imir-a, da ten-nettinniy ar akkan tibiγutin i terbatin d yirban n seḍḍis n yiseggwasen mek nettu tinin d winin kuẓ n yiseggwasen. Ur da aneγ-ttinin ani seg d-uwin neγ d-sγan akweffa illan jaj n tbiγutin-nnsen (biberons). Nekwni, ur nkukir ad nini nwis nufa timaẓẓagin tinebzagin n tussna iẓman n utaram, neṭṭeḍ segsent seg temẓi-nneγ ayenna nufa ad nsemyaf iselmaden ifransisen d yinamuren. Maca, ur neṭṭif abrid ar tizwuri n id tamraw (quatre-vingt) g aγ-d-sdin Yimaziγen n Jerjer g Dzayer iddeγ tga γursen tafsut. Ur nessin, akud-nnaγ, γas ad nettales i tezlatin n Yidir d Jamal Σellam d Lwiza d Meksa…atg

Nerna kra n wakud, nesnaγes is d-nekkusa tirra. Yih ! Tiddeγ mi neqqar Tifinaγ ! Maca, matta tγawsa mi nγiy ad tt-neg s tirra-a ? Kra n tussna, mayed nessen ? Nessen tayri n tussna zund inelmaden n uγerbaz, nessen awd ad naru ismawen-nneγ : Widdeγ as nn-iqqen ad nessenta (commencer) !

Akud-nnaγ ay neẓra nwis nla ismawen. I may mi ffullsen yismawen-a innefrurγen ?

Irura-yi-d kra γef tuttra-nu, inna-yi-d seg ḍart yiγef-inu : Ahya ! Ad ur tesselwiγed imenγi n yismawen acku nitni as ittaley umezruy : Sniγes γas tilawt-nnek mimek tga s umgaru n yismawen, issatem kra kra. Id Muḥsin d id Walid kksen ilila (trône) i id Muḥemmad d id Σli nna ten-ikksen yad i id Yidir d id Meqran. G tesga yaḍen, yuley uzal n Siham d Najwa, ittuttey win Faṭima d Rqiyya nna issedrasen anaγiz n Tuda d Ziwa d Tlayetmas. Amedya n walmessi neγ akw iγrem aya ! Win twunak neγ iduba da aneγ-d-ttazzalen γer yiles yismawen n Yirumiyen iwtan γef winin Yifiniqen. Idda-d yisem n Yiwindalen iwet γef win Yirumiyen. Yusa-d yisem n Yibiẓanṭiyen yakel γef win Yiwindalen mar ad d-ilkem yisem n Waεraben isettuttin win Yibiẓanṭiyen. Nnarẓemen-d yismawen n Yifransisen d Yiṣbenyuliyen ẓmin isem n Waεraben allig mnennayen msasan ad mmefkan talwit γef tadawt n yismawen yaḍnin.

Ferḥen yismawen imsasan iddeγ ẓḍaren ad ẓmin yiwen yisem nn-ikkan ar ittemyak-kas aliγ (fond) n wasif n Nil netta d win Yifarawnen. Isem-a ittuẓmin iga-t win Yilibi-yen neγ Imaziγen. Isem-a inmala ad imyar tudert n uẓmay fellas izdin seg wakuden iqburen. Ttwagna γefsen – Imaziγen- tbarda n umezruy acku ur rin ad tt-gnun γef wiyeḍnin : Tasustant n umezruy tga zund tin tsertit, mek ur da ttarmed ad tt-tged g wiyeḍ qad tt-gen digek. Day, ferḥat ay icenga n yisem amaziγ ! Seg mecta aya tmedzem, asels n tsertit-nnwen d wanect nna igzem n yiγedda n ugdud amaziγ amgun. Walli ibedren tanekra neγ areẓẓum n yimi-nnes telsem-d tizibbiwin (cuirasses) nna tḍefsem tamẓem-d isawaḍen tgem akw imariren n tezlit awen-innḍeḍen g yilsawen :

A Rebbi ssider-i taγyult-inu
Ad ttafaγ mayed ttnuyeγ !

Yaggug ubrid-inu,
Ayyur ay nn-watseγ.

Tamedyazt-a tmareγ g yimeẓẓaγ n tinna d winna ur ta yukizen tixendallasin d wuf-firen nna mi ssemran warraw n Dinna G Lliγ Ur Illi Γas Nekkin, willi d-ffeγnin g te-glay n Ugmuḍ Anammas, sguṭṭent fellasent tyuẓaḍ-nneγ agensu n yiγerban zurnin n yiγerman n uzaγar-nneγ ibḍan γef yigedlan. Medzat tezdim is idwel Uẓru iga ayenna as-tettrem ad t-ig. Ṣefru d Yimuzzar d Yifran da kwen-seḍṣan s tγara n tutlayt-nnsen tamsedrart, maca walu aγilif γas ad walu isem neγ awal n Umaziγ tili-awen talwit n tudert n yiselman. Ferḥat altu s usḍiḍey n uγenfif (canabis) yudfen idammen n yimezdaγ n ugafa n tmurt igan tarwa n Yiznaten d Yikwtamen mi yuwey uṣemmiḍ n ugdez aberrkan tikarḍiwin n tmust-nnsen waxxa sulen ṭṭfen tamatart n tutlayt ine-grasen. Medzat diγ tezdim tesgulum-nn amdaz-nnwen i tarwa-nnwen d yiselmaden-nnwen ur yad kwen-iṭfaren acku ssnen is degsen tennḍeḍem. Medzat kud ur ta d-ibeddi ufgan amakay izemren ad yini wahi i unkas n yisura n Yimiṣriyen d tesfifin-nnsen asen-isettun i yimezdaγ-a tamara n tezlatin-nnsen d wumum n ufrak-nnsen.

Ad yini ufgan-a uhu i yikabaren n Ugmuḍ Anammas d-iswaren arway aneγrum s yisem n twuri d tamunt d tdusiwin tiγerfanin. Uhu i usemdez d uḥeẓẓer i tukkerḍa n udabu s yisem n tegrawla neγ s win tkasit tanesγant (religieuse) neγ akw win umussu aγelnaẓri.

Ferḥat ternum seg mayed ur ta issin Umaziγ ad iseggem tirra-nnes γef iẓgiga (lignes) n tefriwin t-ittzawagen s yiḍ d wass !

Yaru-t: Σumar DERWIC

Unuγ n Muḥend Ameẓyan SΣIDI

Unuγ n Muḥend Ameẓyan SΣIDI

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *