Mayed ur issinen Yamna ?

0 36

 

 

 

 

 

Yiwen useggwas nekren-d kra n iregzen g Tinejdad, awin assas ɣer agmam (quartier) n tmegganin (prostituées) tama n ugdez. Usin tirgax d imegwran. Ddmen ar sdiddiyen timegganin. Nnan-asent : « Ilaq ad teffɣemt tamazirt acku tsexsṛemt-aɣ icirran !»

Itsen tikkal, da d-tteddun s yiḍ, ar ttedzan ɣef tfelwin af ad ssiwden timegganin. Zrin itsen wussan, rulent kigan degsent s Aqeddar g Tinɣir. Tiyeḍ aɣulent s azaɣar. Gwdent ɣef iɣfawen-nnsent.

Maka g ugmam n tmegganin tella yat tmeṭṭuṭ yukzen amuḍin yaɣen iregzen d-ittaggan agmam af ad sxuben aḍu i tcirratin. Isem-nnes Yamna. Tenna-asent : « Wi nekkin ayed issnen mayed tten-yaɣen ! Asafar-nnsen, ɣuri ag illa.»

Yiwen wass, tannay takabart n iregzen tekka-d abrid ɣer taddart-nnes. Izwar-asen-d yiwen ufeqqih. Rulent tcirratin, reglent tadderwin-nnsent ar tettergigint s tawda. Yamna teffeɣ-d ẓarsen. Tbedda ammas n tasukt dat tkabart. Qqimen ar tettemseksiwen amm iyḍan.

Tuta Yamna afus g ikecci-nnes teldid yat talugt (carnet) tameẓẓant. Tasi-tt s igenna amm ukenyal (drapeau). Γas annayen-tt duyen, uɣulen ɣer deffer. Ammi d-teldi amrig (arme).

Tmel afeqqih s uḍad, terẓem talugt, uɣulen diɣ iregzen ɣer deffer amm iyḍan tekcem tawda, tenna-as :
— Keyyin azakuf (homosexuel) ayed tgid. Trid ismawen n iregzen k-ittnuyen ? Haten tyarun da ! Mek ur teffiɣed dat-i ad ak ten-iniɣ.
Inna ufeqqih :
— Tikerkas !
Tessen idd tikerkas, maka ur as iddi ka. Tga ammi ur as tsella, tmel yan urgaz yaḍen s ufus, tenna-as :
— Keyyin, ku tigira n umalas …
Tbedd.
Ternu, tenna :
— Trid ad ak iniɣ mayed da tesskard ? Talugt degs akw mayed da tetteggam.
Tmel iregzen yiwen s yiwen s uḍad-nnes azurar. Tenna-asen :
— kulci izemmem da a yixendallasen !
Mseksiwen iregzen, nnesrurmen amm iyḍan. Sseknan iɣfawen, reẓmen i tirgax. Tesfestant Yamna.
Tenna-asen :
— Ad awen ggalleɣ ur d-ttuɣulem, akkaɣ talugt-ddeɣ i jadarmiyya ! Ad awen sswin tisent. Icentan. Tarwa n tmegganin !

Ggzen-dd tmegganin seg tadderwin-nnsent. Nnant i Yamna s yiwen imi.
— Amek tgid allig ɣifsen tessend anect-nnaɣ ?
Tenna-asent :
— Wi, ssneɣ-ten. Tiwengimin-nnsen rekkiẓent amm imawen-nnsen, berrkinent amm wulawen-nnsen. Da degsent qqareɣ amm udlis.

Tekcem s taddart-nnes, tsers talugt. Imiq, terẓem-tt, ar teskikiy taṭsa. Awed yat tifert degs ityarun. Tura.

Aksil Azergi

Tagged with: ,
Tasghunt Idles

View all contributions by Tasghunt Idles

Similar articles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.