MAYED AΓ D-YULIN G ISRAYIL ?

0 43

Kigan n « yimeɣnasen imaziɣen » da ssemɣuren Israyil. Γalen is illa uwanek-ddeɣ g tesga n tmentilt tamaziɣt, is ɣures ɣudan Yimaziɣen. Tkaren agratsa s wawal ɣef Yisrayil d wudayen imaziɣen. Mer sawlen ɣef tmizar-nnsen anect nna sawlen ɣef Yisrayil is akw ittyassen uxub n waḍu g ddrent.

Maɣ allig da nettbedda d medden ur ǧǧin idneɣ ibeddin ? Imenɣi inger wudayen d Yizakaren ur idd winneɣ ayed iga. Ur aɣ degsen iddi ka. Aggugen ɣifneɣ. Ur idsen neccar awal ula akal. I mayed aneɣ-yuwin ẓarsen ?

Amezruy n wudayen-lliɣ ikkan Tafriqt, lumar Imaziɣen degsen, winneɣ ayed iga. Neccar-t idsen, maka ɣuri yan useqsi: “Maɣ allig ur ǧǧin nsella i awed yan g wudayen-ddeɣ mi nettini gan Imaziɣen, ad isiwel ɣef waddad g ddren Yimaziɣen, ad imel s uḍad tanbaḍt isarsen ifadden-nnes ɣef yidmaren n uɣref amaziɣ ?”. “Maɣ allig festan nitni iddren g tmazirt tagdudant, g zemren ad siwlen, urun min ad ttugren ɣer akurmu? Maɣ allig ur da ttemmectagen ?”

S uzegzel n wawal : Acku, ur ɣursen mayed sskaren s Yimaziɣen ula s tmaziɣt. Ssarden ifassen-nnsen ɣifsen. Iwda.

Timmuzɣa tga amm yisenser. Kksen-tt iddeɣ nn-gulan tamazirt-nnsen. Ur yad asen-teffullis i umya.

Iddeɣ d-kkiɣ Israyil mnaleɣ d kigan n wudayen imerrukiyen g llan yineɣmasen, imyura d yimariren ittyassnen kigan. Amata degsen, Merruk d tmaziɣt ɣas ikettayen iqburen ayed ɣursen gan. Taɣufi. Hill. Yiwet tɣawsa ayed ran wudayen : Talwit d Yizakaren. Ran ad idiren g tegmat nitni d waǧǧaren-nnsen. Ur zgilen. Ka yaḍen ur asen degs iddi ka. Da ttakin is nmalan Izakaren ugar n ka n ugdud yaḍen, acku ttin-asen g ku tanila. Ar diɣ ttirin kigan tanbaḍt n Merruk, acku sulen ɣalen is asen-tefreg tgelda n Merruk mgal n Yinaziyen, netta tezzenza-ten s yiɣfawen amm wulli. Γursen, Merruk degs Izakaren. Imaziɣen, ddaw Yizakaren ag llan.

Yitsen ger wudayen d-mnaleɣ rwasen imxezniyen. Γursen tiwlafin n Muḥemmad Wiss Semmus d tin Ḥasan Wiss Sin g tgwemma-nnsen d yicenyalen n Merruk. Ammi llan g tmazirt. Da ssan atag, gen seksu, sfuglun awed s tfugliwin tinamurin n Merruk. Ur ilaq ad asen-tinid kra n wawal ur iẓilen ɣef ugellid neɣ ɣef Merruk.

Yiwet tmarirt d-mmegraweɣ g Tilabib tenna-i seg Tinɣir ayed tga, maka ar tsawal tigelgelt (ddarija). Iddeɣ nemrara awal, tenna-i: «Ḥellu teqqima yitsen yiseggwasen g Tgemmi Mellulet urta teddi s Israyil ɣas af ad telmed tizikert. Ur tri ad isinen idd tacelḥiyt ayed tga.» Tenna-asen ad lemden tizikert acku ur ɣursen mayed sskaren s tcelḥiyt g Yisrayil.

Ur idd acku kra n umezraw g tesdawit n Tilabib neɣ Urcalim yaru kra n udlis ɣef Yimaziɣen, as ira Imaziɣen. Tirzi tga takadimiyt. Ur tgi tameɣnast. G Yisrayil, ur telli awed yiwet tmesmunt n wudayen-ddeɣ mi nettini gan Imaziɣen, ur da nettiselli i yimesli-nnsen, acku stin awal yaḍen, tamust yaḍen, tamurt yaḍen. Ur yad gin ayetmatneɣ.

Kra n « yimeɣnasen » aɣulen gan amm yirban imeẓẓanen tessemdaz tniɣit ɣef Yisrayil mgal n Yizakaren. Ammi da ttgannan ad asen-tini Yisrayil « Ayyuz-nnun ! Iregzen ayed tgam !» Imalasen ayed zeddin awal ɣifes ad tinid tella tmazirt-nnaɣ g Tfilalt neɣ g Fazaz. Ad tinid nettat ayed igan iɣrem-nnsen ɣef ur ǧǧin sawlen. Uǧǧan timizar-nnsen tekcem tbaxxa n yislam d tɛurrba ddun ad nnaɣen ɣef yiwanken ilan ifadden, ur innemrin g mayed ɣifsen ittnaɣen. Israyil tɣiy i yiɣef-nnes. Tla tarwa-nnes ɣifes ittnaɣen s ugari d uswingem. Teggelgeḍ tbuɣlu s udrim d tektiwin. Γures mayed igan ka. Maɣ allig ur ǧǧin temmectig ad tsiwel ɣef Yimaziɣen-ddeɣ temzey tgeldit taɛalawiyt ?

Imaziɣen ur gin udayen ula gan Izakaren. Imenɣi inekren gratsen ur aɣ degs iddi ka. Aggugen-aɣ. Ur aɣ-d-yuliy umya g udida ɣifsen nessenkar. Ku yan iseksew udem-nnes g tisit-nnes is ur t-ittakez. Ar mek ur t-yukiz, hat taɣawsa yaḍen ayennaɣ. Awed yan usafar ur inni ad t-ijjujey, meqqar ittuskar g …. Yisrayil.

A. Azergi

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.