Homère

Is kkan ssnen Imaziɣen tamedyazt n Umir (Homère) ?

2 92

 

 

 

 

 

 

Wenna iɣran adlis « L’Illiade et l’odyssée » n Umir (Homère), amedyaz awgrik isawlen ɣef imenɣi n Ṭerwa (neɣ Ṭruwad), ad yaf, lumar g « L’Odyssée », kigan n ineɣmisen d-issenkaren azzar ɣef uqerru, senyuddun targagit g tfekka. Ad as-yaf taḍfi meqquren i tsekla tawegrikt. Aḍris n « L’illiade » ittyarun 800 n useggwas ngum talalit n Σisa, tella degs 15 337 n tiwent, ibḍan ɣef 24 n tmedyazt. « L’odysée » nettat degs 12 109 n tiwent ibḍan awed nettat ɣef 24 n tmedyazt. Asif ingin n tmedyazt.

Adlis-ddeɣ ittyarun s tegrikt yiwen g tirsal tixatarin n yidles d tɣerma n Uruppa.

Ad ssektiɣ ngum yan usekkin : « L’illiade » da isawal ɣef imenɣi ger igriken d imezdaɣ n Ṭerwa. Imenɣi-ddeɣ izdi 10 n iseggwasen. Umir da isawal ɣas ɣef useggwas ameggaru, win tḍuri n iɣrem n Ṭerwa. Ad diɣ ssektiɣ s usegzel amek gan igriken allig kecmen iɣrem-ddeɣ. Ur is d s tdusi n imrigen, maka s txendallast. S tkendawt. Sbeddan ayyis n ukecciḍ, skecmen iregzen-nnsen agensu n udis-nnes yuran, awin-t ar imi n iɣrem n Ṭerwa, flen-t. Iddeɣ d-nekren imezdaɣ, skecmen-t s agensu. G yiḍ, ffɣen-d igriken iffren g udis n wayyis, reẓmen ifelwan i yimeddukkal-nnsen. Imki as teḍra Ṭerwa. Adlis-ddeɣ da awed isawel ɣef wasaḍen izedɣen amezruy amm Acil, Ulis, Minilas, Ajaks, Agamimnun, Nisṭur, Hicṭur, igmas Paris d Priyam bab-nnsen, agellid n Ṭerwa. Min ad nettu Ilin (Hélène) ɣef akw inker imenɣi-ddeɣ.

Adlis wiss sin « L’Odyssée » netta da isawal ɣef wuɣul n Ulis s tegzirt ɣef iga agellid, tin Iṭak, d mayed ɣifs ikkan n tedyanin d xub n waḍu acku Pusiḍun (Posidon) d Zus ur rin ad tt-aǧin ad yuɣul s tmazirt-nnes deffer n imenɣi n Ṭerwa. Ig nn-inmala tagzirt-nnes ssnekren-d azwu, ssiɣen-t-inn kan tegzirt neɣ kan wakal yaḍen. 20 n useggwas ayed ittettey. G tgira yaɣul-d ɣer tgeldit-nnes Iṭak, ineɣ inesbaɣuren iran ad awlen tameṭṭuṭ-nnes Ppinilup (Pénéloppe), awin-as ayla d tgeldit-nnes.

Iddeɣ ɣriɣ adlis-ddeɣ, ufiɣ-nn Ulis isawel kigan ɣef Libya d ilibyen. Inna is gan imekrazen n wakal, ilin actal iggudin, isinen awed ill, ar ssaɣen ar zzenzan d igriken d igduden yaḍen. Maka ayenna i-yuwin ad aruɣ iwaliwen-ddeɣ idrusen tgat tɣawsa yaḍen. Itsen id bexxu illan g tmucuha tiqburin n imaziɣen, llan awed g «L’Odyssée.» Iddeɣ d-isselkem uzwu Ulis i ugafa n Merruk, tumeẓ-t Kalipṣu (Calypso) igan illis n Aṭlas, tezdeɣ yan ifri. Tekref-t ssa n iseggwasen. Tra ad tt-yawel, maka Ulis yugi.

G udlis-ddeɣ illa awed Bexxu bu yiwt tiṭ. Isem-nnes Pulifim (Polyphème), memmis n Posidon. Ila anect n yigenna, izdeɣ yat tegzirt netta d imeddukkal-nnes (amm netta) g ifran. Iddeɣ d-ilkem Ulis tamazirt-nnes, ikcem s ifri-nnes itter-as ad ig anebgi-nnes, iqbel bexxu iran ad tt-ittečč. Iqqen imi n ifri s yan iselli ur iɣiy awed yan (ɣas netta) ad isemmecteg, iddem ar ittetta g imeddukkal-nnes ku ig d-ikcem. Bexxu iga ameksa ɣurs izamaren izuraren d tiɣeṭṭen. Ulis, ittyassnen s txendallast-nnes, iccwa yan igejdi ixatren, yusi-t netta d imeddukkal-nnes, bbeẓen-t g tiṭ n uwaɣzen iddeɣ ira ad diɣ ittec yiwen degsen. Isettemra imeddukkal-nnes ddaw inuguḍen n bexxu, issufeɣ-ten i yifri. Bexxu aderɣal, netta, iɣwejdem g imi, ar izzruy inuguḍen yiwen ḍart wayeḍ af ad ur ten yaǧ ad ffɣen. Maka taxbarjiyt n Ulis tuger tinnes. Iffeɣ seg ger ifassen-nnes, yameẓ il. Iɣiwel ad yuggug ɣef tegzirt-ddeɣ.

Γur imaziɣen, da ttalsen is nn-gulan kra n imessukal yat tmazirt, inker yiwen degsen yagel tissufra g illa wučči-nnsen g yisek n wayyur af ad isgunfu. Iddeɣ-d fafan seg unuddem ten-iɣedṛen, afen-d ayyur idda. Inna-asen yiwen umusnaw degsen « asekka nuɣul-d g tizzit amm talliɣ g d-ngula akal-ddeɣ, ad d-naf tissufra-nneɣ g wansa. Asekka-nnes afen-tt. Maka ččan ayenna d-uwin, nekren ar tnadan učči, uten-nn ɣef yifri n Bexxu bu yiwt tiṭ. Ttren-as anebgi n rebbi. Isekcem-ten. Amm g udlis n « l’Odyssée », iddem bexxu ar ten-ittetta yiwen deffer n wayeḍ. Aɣulen sermen iɣef i yan igejdi, ssiɣen degs afa, sedderɣlen bexxu. Γersen i yizamaren, lsen ibeṭṭanen-nnsen, ffɣen. Netta ur idmi is zrin ddaw ifassen-nnsen. Bexxu isnaɣsen tadersi d wumum n inuguḍen, inna-asen : « akw ma kwen yaɣen allig tamumem imki !»

G udlis-ddeɣ illa bexxu yaḍen. Iga-t bu ssa n iɣfawen. Γur imaziɣen, ɣurs 7 n iɣfawen. Timucuha ur myaɣent maka bexxu-ddeɣ illa. Ičča-as i Ulis 6 g iregzen-nnes af ad yiɣiy ad tt-yaǧ ad izrey g yan yil ɣef inbeḍ. Ku yimi yusi argaz.

Yiwen useqsi i-izedɣen seg mayed ɣreɣ idlisen-ddeɣ : Mani aneɣ d-kkant tmucuha-ddeɣ ? Umir inna tamedyazt-ddeɣ 3 000 n useggwas aya. Is d Imaziɣen ayed issnen tadyant n Ulis asin-d degs timucuha-nnsen ɣef sawleɣ, midd Igriken ayed yusin aya ɣur Imaziɣen. Ad ur nettettu izdayen iggudin ikkan ger imaziɣen d igriken g wakud aqbuṛ. Aseqsi-a ad iqqim yugel.

Ayenna ilan azal igat uzday-ddeɣ iqqiman g yidles. Idles-ddeɣ ilaq ad tt-naru, ad tt-nesbuɣlu. Netta ag illa yimal-nneɣ.

Aksil Azergi.

Tagged with: ,
Tasghunt Idles

View all contributions by Tasghunt Idles

Similar articles

2 Comments

  1. Ahmed Skounti August 9, 2019 at 22:10

    Ayyuz a Lḥu ɣif usmyaɣ n idlisen n Umir d tmucuha n Imaziɣen. Han mayd ukzeɣ nekkin: timucuha n yill agrakal d cigan n tin umaḍal smunent imdanen s mas llant nɣedd g ka n tgezzumin digsent illan. Ayenna mi ttinin imusnawen n timawt (oralité) : les motifs. Amm bexxu bu yuwt tiṭṭ, bu 7 n iɣfawn, …
    Maca, txeṣṣa twuri ɣef uya…
    NB. Kalipsu tssekty id Ɛica Qandica…

    • Tasghunt Idles August 9, 2019 at 23:47

      Tanemmirt. Llant awed tiyeḍ g “l’âne d’or” n Afulay. Tigellint n Nedjima Plantade (anthropologue) texdem kigan ɣifsent. Tasekla-ddeɣ taqburt ilaq ad ẓars nuɣul. Ad tt-nɣwes. Meqqar tetyaru s tlatiniyt tinneɣ ayed tga. Taɣ digneɣ. Da degs ttafaɣ iɣef-inu ig da qqareɣ idlisen-a.

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.