IREM AFELSUF : TIZLIT « AMALU » N UNAẒUR AYYUR

0 143

Aksil Afersig: Ilula-d g usammer. Imγur g ufrekla, g iγra. Iγra g tesdawit n Imtγren, iγley s Fṛansa ad ifukk taγuri-nnes g yinagrawen isenselkamen. Aksil issker asmel n Afersig.com g itturu ineγmisen n tsenselkemt d tγellist.

I winna ur t-issinen, Ayyur iga yiwen unaẓur seg usammer. Aγewwaγ g uswengem-nnes. Ilula-d g Tbesbast, g izzrey temẓi-nnes, allig da isεurrum awin-t imarawen-nnes s Fṛansa. Meqqar iffeγ amazir, Ayyur yumeẓ s iẓuran-nnes, s idles-nnes d s tmagit-nnes. G tsurifin-nnes timezwura, ar isseflid i yinaẓuren imaγnasen: Xalid IẒRI, NBA, MELLAL, MEΣTUB, … A-ya ifeka-yas yiwet twengimt ifafan. Asselku, assitem n tmagit tamaziγt g Meṛṛuk d Tmazγa amun g usfafa, amun g uγuyyi n wayyur. Issafeγ-d 3 itwilen, itkaren s iwaliwen, iwaliwen iquraren. Idrus mayd ittakzen mayd ira ad degsen yini.

G umegraḍ-a, mer nufi, nra ad akw nekk γef tezlatin n Ayyur. Maka ur aγ-ifukk, acku idlisen ayd d-yusan mk nra ad akw nekk attayen i tγensa n wayyur g tezlatin-nnes.
G wuṭṭun-a, nusi-d yiwet tezlit igan tafelsuft. Ayyur ur idd γas iwaliwen iquṛaren ayd ittini. Gan awd ifelsufen. Tizlit «Amalu», tetkar s iwaliwen, tufes s yiwen waggwa g tmmutter teskiẓufriniyt n ufgan amaziγ.

Mniγ g waman, annayeγ amalu-new degsen
A wi-ssen mayd ti-yaγen ur yaγ g digi.

Mniγ, d-iddan g imna, iga yiwen umyag ittegensasen amarur[1] d tkerkas. Da d-ittrara tafekka (tawlaft) n umdan. Imna, iṭṭef aha s tisit (miroir) igan tizi γur tmeṭṭut. Tisit tumeẓ s uzriri, tafekka, tiẓilt d tayri. S yiwen wawal yaḍen, nγiy ad nebder: tamagit g tmeẓla (identité dans la différence).

Γur Platon (Plaṭun), “tisit tga tala n tγawsiwin imyajayen iwer- inn tilawt. G useksew amezwaru, tisit tetkar s tγawsiwin ar tssikiz aredla maka ur tegbir amya” (Ennéades, III, 6, 7) [2].

Amyi n Narcisse (Naṛsis) da d-issekan akrad n tudert g beṭṭu. Narcisse da irezzu ad yaf tamunt-nnes tamezzawrut, ad ismun sin izgenen t-ilan, nna tebḍa tisit. G imyiten itraren tella twargit n Narcisse g wungal n “Alice au Pays des Merveilles” n Lewis Caroll d “Orphée” n Jean Cocteau. Degsen, yufa Narcisse ad ikcem s tisit isellwu tawargit-nnes.

Γur Lacan (Lakan), tadra tabeṛṛant n tussena n tewlaft n ufgan ittuṣka γef wayeḍ. Isemdya s mma ig tenna i memmis “hat key a-ya” (g tisit). Aseksew n wayeḍ, ur illin γur Narcisse, ayd isskaren asileγ n nek imzireg (moi indépendant). Tarat (phénomène) n tisit, tssada kigan n ssmex γur imyura. Maka g umata, afgan d tewlaft bḍan g tesga n umeggay (sujet) d tγawsa; munen g tsekra n nek imzireg.
Ayyur ur ibdir tisit, maka isawel γef waman igan amm nettat. Tawlaft g tisit teglugel, tin waman da ttemhiqqiy nnig taṭṭanganin ar tent-ttnuy.

Awd tawlaft g waman da ttemectag, ard ur tgi i yikez. Da ttesriw ar tteqmar, awd ar ttenfruṛuγ. G wawal yusey udem amezwaru n umyiwen (première personne du singulier), nna ika i ufgan amaziγ iga. Ar iseksiw aman yiri ad yakez iγef-nnes, amalu-nnes, tawlaft-nnes. Maka iṛmey ad yakez idd netta “A wi- ssenen mayd ti-yaγen ur yaγ g digi”.

Nγiy ad nini n wis ira ad isiwel γef tmagit n umaziγ inbaṛan, ur tsul tssen mayd tga. Ur taγ g yiγef-nnes. Amm mi ira ad isiwel γef teskiẓufriniyt n ufgan amaziγ.

Tamagit tnnefruṛeγ, amaziγ ikkucem, irremuma ddaw tkendawt, tawda d ussitem. Ur yukiz iγef-nnes. Ira ad t-yakez, maka tawlaft-nnes da ttemhiqqiy agensu n yiwen umaḍal g ur ibaḍ, g ur yufi ad degs ibaḍ meqqar ira. Mek yuzen afus ad isbedd aman yales-asen asmhiqqey.
Tizlit-a, u γas ini tasetna-nnes ttuṣka γef tmagit n ufgan amaziγ. Ar tteḍus tadra n waṭṭan amaziγ.

G ugenses umyiy, is ur id Wiyha ayd ikkan attayen i umeggay yaḍer taγawsa!

[1] : Amarur d-iddan g waman n marur.
[2] : Bronislaw Paszkowski g “L’expérience du miroir ou Le sujet entre être et doute”

Tamawalt :

Irem: essai / Aggwa: fardeau / Amarur: illusion / Azriri: maquillage / Tiẓilt: beauté / Tameẓla: différence /
Tala: source / Tilawt: réalité / Aredla: tout / Gber: (v) contenir / Amyi: mythe / Akrad: incapacité /
Tamezzawrut: primitive / Azgen: moitié / Atrar: moderne / Sellwu: réaliser / Tadra: origine / Asileγ:
formation / Imzireg: indépendant / Tarat: phénomène / Ameggay: sujet / Taṭṭanga: vague / Sriw: élargir /
Udem: personne / Amyiwen: singulier / U γas ini : à vrai dire.

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *