Yu d Baba

Imeεṣi n mayes

0 56

Udmawen:

  1. Iccu (arba imeεṣi n mayes )
  2. Mma n Iccu (tameṭṭut iḥennan )
  3. Aṭbib (wanna igan lεamaliyya i Iccu )
  4. Rima (tarumit iεawnen mma n Iccu )

Nnan tella yat lqist γef wanna ur iṭaεen lwalidin-nnes, tga yat lmejriyt iḥeqqan. Lqist, tεawed-aγ-tt yat trumit nna izedγen g Lmeγrib teg nettat tafransist.

Tarumit, isem-nnes Rima, iwa, ayedda teqqis s tefransist araγ-t nekkin s tmaziγt.

Tenna Rima: “Ḥaḍreγ-as i lmejriyt-ddeγ yan ṣeḍḍis n yiseggwasen aya.” Tenna:”Tella yat takat g beṛṛa n Merrakec, diges yat tmeṭṭut tsul tmeẓẓiy. Imik, yili γures yan yicirri γures zund semmus n yiseggwasen.”

Icirri, isem-nnes Iccu, imessus kigan, ittebla, acku ur d-inkir γef bbas, walu mayed as-ineqqren imejjan.

Yan wass, inker Iccu, arba amessas, yali s yan useklu illa dat taddart-nnsen, imik, icceḍ-as-d uḍar, iḍer-d, ikcem-as yan ukeccuḍ g yat tiṭṭ iεmu-as-tt.

Tusi-t mayes tawi-t s aṭbib ad t-yiẓir mayed inna ad as-yini. Tγer-d i labilans, tawi-t s ssbitar. Inna-as uṭbib: “Han arba-ddeγ teεma-as yat tiṭṭ, ur yad inni ad iss iseksiw.”

Tenna-as tmeṭṭut: “Iwa, is illa kra n usekkin yaḍen ad t-nessker? Inna-as uṭbib: “walu mayed as-nessker, γir mek trid ad as-tked yat tiṭṭ-nnm!”

Tenna-as: “Mreḥba, arba-nu iεezzan ayd iga, qenna ad as-keγ kullu mayed γuri illan.”

Inna-as uṭbib: “Hat llant kra n tewriqin, ilazem ad tent-tsenyad, idd kemm ayd iran s lxaḍer-nnem ad as-tked tiṭṭ-nnem i Iccu.”

Tsenya-as mma n urba tiwriqin.

Tenker terḍel-d iqariḍen n lεamaliyya. Ig-as-tt uṭbib, ikkes-as tiṭṭ i tmeṭṭut, ig-as-tt i urba-nnes.

Izrey yimalass, ijjey urba, iga labas, llant-as wallen, ar iseksiw, teqqim mayes bla yat tiṭṭ.

Walayenni mayes ur tri ad as-tini mayed ijran ula tra ad as-tini idd nettat ayd as-ikan tiṭṭ-nnes. Ur as-tenni amya afad ig labas, afad ur diges iqqim lḥal, d netta isul imeẓẓiy ur d-yiwiy acḥal.

Iwa zrin wussan, izri wayyur, izri wiss sin, zrin yiseggwasen. Ar ittenjaḥ Iccu g tγuri, yaγul ixater, walayenni yaγul ixater diges lkiber, yaγul isxater iγef-nnes, ur irḍi ad yannay awd mayes. Ayeddeγ as-laḥ yat tiṭṭ i mayes, ur iḥmil ad ẓares iseksew. Yaǧǧ-tt, ur da diges iseqsa, ur da as-issaγ isafaren ig tt-yaγ kra. Yuǧǧa-tt, tgellint, ammi ur tgi mayes.

Imik, yan useggwas, inker Iccu itahel, yawi yat trumit, imun ides s Fransa, bla ad icawer mayes.

Izrey useggwas, yaru ides icirran. Izri mayes g Lmeγrib, ur da diges iseqsa, ula as d-yuzen idrimen.

Walayenni nettat tgellint, da diges tseqsa, da tettinig ineγmisen-nnes, da tettnada tilifun-nnes, allig tt-tufa, tsiwel-as, nettat thenna, netta iswa-as wul.

Ar yan wass, tenker mayes, tenna ad teddu s Fransa ad tiẓir iwis Iccu acku taγ-tt tγufi-nnes, wahli ayeddeγ ur t-teẓri.

Iwa, tenker theyya tiwriqin ad d-tekk γur urba-nnes. Tumeẓ lviẓa, teddu ar tettnada allig tufa ladris n Iccu, teddu tεayen taddart-nnes taf- t-inn idda s twuri, taf-nn icirran-nnes ayd illan, ur tessin mayed asen-tettini ula mas asen-tsawal. Teqqim g yimi n taddart ar tetteqqel s Iccu.Tezri yat tizi, urta d-iddi, imik, han tarumit, taǧǧart n Iccu, tadda aγ-iqqisen lqist-ddeγ, tezri γef mma n Iccu, tenna-as ad tekcem s γures ard d-iddu urba-nnes.Tarumit tessen tamaziγt acku γures wahli n id lehri g Lmeγrib.

Tedda teqqim γures, teqqis-as kullu mayed as-ijran d urba-nnes dda ur irin ṭṭaεt-nnes.

Kammla ar as-tetteqqis, han kra ar asen-d-itteddza tiflut, hat iwes Iccu. Iwa ikcem s γur trumit isellem γef trumit, inna-as i mayes: “Mayed aγ-trid? Yam nezrey-am-nn tamazirt? Nezrey-am-nn Lmeγrib teṭfured-aγ-d awd s da? Mayed trid?”

Tenna-as mayes: “A arba-nu, taγufi-nnek ayd i-inγan ayennaγ ami d-nḍuγ lebḥer uteγ-d iberdan af ad i-tinit may k-riγ! Waxxayt a arba-nu, tezhit kullu lxir ak-giγ tettud is k-id-ssegmiγ allig tellit g uyeddeγ g tellit dγi??”

Ṣafi, tammeṛ mma n Iccu i yimeṭṭawen, ar talla. Tenna-as i trumit: “Is teẓrid, is tannayed imki-ddeγ i-issker urba-nu nna d-ssegmiγ, dγi inaker-i?”

Temmater-ten trumit ar tettεejjab. Inker Iccu iffeγ, iεayen taddart-nnes, ur ikkul ula iḥeccem, ula issiwed-t Rebbi.

Tenna-as mayes i trumit: “Nekkin, dγi, ddiγ ad uγuleγ s tmazirt-inu, ur γuri mayed tteggaγ daddeγ, ddiγ ad kecmeγ akal, ddiγ ad mmteγ, ur yad illi mayed riγ g tudert-ddeγ.”

Temmater-tt trumit, ar tseksiw Tamara-nnaγ g tella, teqqim diges, iwa, tenna-as: “Γir qqim γuri yan sin wussan hat awd nekk γuri tawada s Lmeγrib ukan nmun.” Tenna-as: “Waxxa!” Teqqim mma n Iccu γures allig zrin wussan-nnaγ s sin, tmun d trumit s Lmeγrib.

Allig nn-tgula, tasi yat tewriqt tamellalt ixwan, turu lqist-nnes nettat d urba-nnes Iccu, d mayed as-ijran allig as-tka tiṭṭ-nnes ad iss iseksiw. Tek-as tawriqt-nnaγ i trumit.

Zrin kraḍ wussan g Lmeγrib, tddu trumit ad tiẓir mma n Iccu, taf-tt-nn hat walu γes Rebbi, temmut, udren-as yad.

Tenker trumit, tasi tilifun tγer-as i Iccu, tenna-as: “Han mayek temmut, addu-d hat tezrey-ak yat tebrat! Ur nessin mayed ak-taru, tenna-i ad ak-tt-keγ s afus-nnek.”

Zrin sin wussan, han Iccu idda-d s Lmeγrib, yawi-d ṭumubil-nnes d tmeṭṭut-nnes d tarwa-nnes. Tek-as trumit Rima tabrat.

Irẓem-tt yaf-nn diges kra n yiwaliwen idrusen. Tenna-as diges: “Hat ṣamḥeγ-ak a arba-nu g kullu mayed i-tgid! Dγi, riγ ad tisined idd allen-nnaγ s tseksiwed, yat digsent hat tinu ayd tga!”

Σad ayd as-tεawed trumit kullu mayed as-tεawed mma n Iccu γef tiṭṭ dda as-tka iddeγ as-teεma tinnes g tamẓit.

Iccu, ṣafi, idda ad immiεḍer, ikcem-t-id kra, iḍer s akal, ur yad iγiy ad ibedd acku garden-as yiḍaren. Iwa, imkidda ur iṭaε mayes, awd netta tarwa-nnes ur diges tḥenna: Ddan yicirran-nnes aγulen s Fransa zrin-t g lḥalt-nnaγ g illa.

Iwa, wanna ur iṭaεen lwalidin-nnes, ur tenni tarwa-nnes ad t-tṭaε awd netta.

Yaru-tt: Omar AIT SAID seg tγremt n Yimgunn

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *