IKKA-TT-NN YIWET TIKKELT G TMAZΓA

0 135

-1-

Isares Ilayetmas Ag Wassu iɣef n tuzzalt imesden ɣef uqecmir yad issammeɣ s waman, iddem ar ikkat s yigilem ɣef tuzzalt ibeddan amm uɣanab. Kud treggwel ɣef wudem n uɣulid tessefru awal itturu. Ig iggez, ig yuley amm tweṭṭuft. Iddeɣ imda, ibedd, ayerri-nnes ar isissiy s tidi. Yaru s tfinaɣ : «Agdud n yifesti». Isares Maksen Ag Yufitran, ibeddan deffer-as, afus-nnes ɣef yiɣir n Ilayetmas, inna-as :

– Nra ad neffeɣ ifesti. Ur nri ad nidir g tmeḍlin. Nekwni agdud n wawal, n uktay. Nra ad nili. Mer nri ad nfest neqqim-nn agensu n yiɣrem. Nesseknu iɣfawen awed nekwni ard naccek g yibgez n umezruy.

Imdez Ilayetmas iddeɣ isella i wawal-ddeɣ, inna :
– Tidet!

Isares tagust afella n uqecmir, izdey titi irfan allig ibḍa ɣef sin, inna Ilayetmas ibeddan ar t-iseksiw :
– Ufiɣ amek! Ferru n tmukrist ur aneɣ-ittaǧǧan ad nennuddem kigan n yiyyar aya !

Igra tiɣri, ffɣen-d akw yimezdaɣ n teɣremt idrusen. Llan ɣas s tam. Kuẓ n yiregzen, yat tegẓiwt d kraṭ temɣarin tiwessarin. Isawel, inna :
– Ku awal gedlen nuru-t ɣef yiselli, ad ur sar ittusfeḍ meqqar ɣifes kkan yinegyan, izwuten d yinuẓir.

Zemren ad aneɣ-nɣin, maka iwaliwen ittyarun ad ddren g wul n yiselli ar tigira n umaḍal. Awed yan ur izmir ad ten-isfeḍ.

– Tikti tazedgant, maka drusen yiɣallen ggadin yiwaliwen ilaq ad nuru, ad ggzeɣ ɣer iɣrem ad d-ssnekreɣ wiyeḍ, ayed tenna Tidir Kel Agelmus.

– Siwel i umzil ad am-ik tuzzalin d tgusin. Xiram icenga! as as-irura Ilayetmas.

– Ad dduɣ iḍ-a!

– Ad idem muneɣ ard nn-telkemd akeccum n waqqa, uɣuleɣ-d.

Ass-nnaɣ, nekren, ddmen ar ttnadam iflila idusen, iɣiyen ad asin aggwa n yisekkilen. Zrin yitsen wussan, ddmen tawuri g Waqqa mi ttinin tur-a : Aqqa n Yiwaliwen. Yitsen yiseggwasen hilli aya, drusen medden issnen is illa waqqa-ddeɣ. Tur-a, yaɣul iga azduɣ-nnsen. Ffɣen-d tadderwin-nnsen, flen igran, iɣbula n waman, tifunasin, actal, iserdan. Zrin akw ayenna ɣursen illan, alin ɣer adrar. Ur sar ttun ass amezwaru. Ass n ugelladus. Ittyaru g wulawen-nnsen. Igzem amm uzwar ɣef yiyerriten-nnsen, s wuzzal azeggwaɣ.

-2-

Tagezzayt_02

Ass-nnaɣ amxib, inker-d yan ugelladus ur ǧǧin ikki amm netta. Agelladus n yigidu d wakal azeggwaɣ ilan aḍu n tkendawt d yidammen. Ass-nnaɣ ayed isra umnukal n yiɣrem. Yaɣ uneɣmis aqqiwem akw n udrar ammi yaɣ wafa alim. Ggzen-d akw yimesdurar seg iɣerman-nnsen af ad inniyen udem n umnukal tikkelt tameggarut. Timiḍiwin n yimezdaɣ ayed d-iddan seg mayed igan tamazirt. Gen-d ikabaren amm yiweṭfan ɣef yiberdan, amẓen aɣaras ɣer azaɣar. Amnukal Kawsen Ag Yufitran ittyassen g mayed igan tamazirt s tigzi-nnes. Ul-nnes imeqqur. Inegbawen ɣures as da tteddun. Tettyassen taddart-nnes, tifelwin-nnes reẓment aha. Ka iffeɣ, ka ikcem.

Ixater wudem-nnes, ig uɣdim. Iga awed anezzarfu issnen azref aqbur n tmazirt, ar ittekka ger medden s umesku. Kawsen iwessir. Γures ugar n 90 n yiseggwasen. Immut g usgwen-nnes. Igna ur d-inkir. Idda g talwit. Ass-nnaɣ ayed d-gulan. Uress matta ubrid ten-id-islatfen. Gan kraḍ. Lsan timelsa tumlilin irruyen. Tikerziyin ɣef yiɣfawen. G testawin, uglen tikubiwin. Ufan-d imezdaɣ imekday ɣzan timḍelt n umnukal. Tiwetmin ttint i temḍelt g ɣerden amɣar ɣef tesga tayeffast. Ifassen d yiḍaren ketmen. Iga g temḍelt-nnes amm teslemya g udis n mayes. Sarsen g tseggwin-nnes kigan n tɣawsiwin mi ɣalen idd ad ɣifsent ibedd g umaḍal yaḍen. Dlan yimezdaɣ timḍelt s yiflila, qqnen-tt s waluḍ. Kud as ttheyyan timḍelt ttirirent twetmin s unnuɣjef. Beddan yinabagen g tesga, mmatren imezdaɣ n yiɣrem ar ttwaɣen s ungaẓ. Beddan allig ffɣen medden timeḍlin, nmilin ɣer yitsen yirban itturaren, nnan-asen:

– Mayed imes urgaz isran?

– Amnukal n yiɣerman n udrar. Amɣar uɣdim. Fsis ɣifes a akal!

– Tzemrem ad aɣ-temlem ibergemmi-nnes?

Mseksiwen yirban, inna-asen yiwen:

– Ur ɣures ibergemmi! Azduɣ-nnes irwas win akw yimezdaɣ. Taddart-nnes tbedda g uwerz n udrar. Ad nn-tafem acenyal aberrkan ibedda ɣef tduli-nnes.

Ddan. Munen d ubrid ɣer taddart n memmis n umnukal, Maksen. Iddeɣ nn-gulan, ufan-nn-diɣ tiwetmin ilsan iselsa iberrkanen sulent da allant g yimi n taddart. Abanuq-nnsent iṛmey. Udmawen n yimezdaɣ wraɣen. Allen zeggwaɣent s yimeṭṭawen.

Beddan, inmala-d ẓarsen yan urgaz, inna-asen:

– Azul!

– Azul a mass! Nekwni d imeddukkal n Kawsen Ag Yufitran. Kigan n wussan ayed nezzri ɣef yiberdan. Nedda-d ad t-niẓir, ad as-nsiwel nsew seg uɣbalu n tmussni-nnes. Nenurez-as aɣ-yawes ad naf areẓẓum i kigan n tmukrisin-nneɣ, ayed as-inna umezwaru s txendallast.

Isawel wiss sin, inna ammi ur issin aḍu:

– Ngum, mayed ijṛan? Maɣ allig akw iman yiɣrem dat tgemmi n umnukal?

– Amnukal ayed isran, ass-a ayed as-nuder!

– Igellin! Nekwni d-iwtan iberdan af ad ides nemnala! Ig ur tri hat ur tri!

Knan. Sarsen ifadden ɣef wakal, asin urawen ɣer igenna ar sgengimen s kra n tutlayt ur ittyassnen, imiq, sikken ifassen ɣef wudmawen-nnsen, ssudmen iɣfawen n yiḍudan-nnsen, inin : « Amin!»

Beddan, nnan :

– Tur-a, ilaq ad nemnala d umnukal amaynu.
Iddeɣ beddan dat Maksen, memmis n umɣar, ildi-d umezwaru takwemmist n yiɣsan n tiyni seg waqrab-nnes, ibzer-ten ɣef ugertil. Immater-ten, imiq, ismutter-ten.

Ildi-d wiss sin takwemmist n yiɣsan imeẓẓanen, ibzer-ten awed netta ɣef ugertil amm umezwaru. Immater iɣsan, iseksew ɣer udmawen n yimeddukkal-nnes, ismutter-ten. Amnukal iggawer datasen ɣef tekḍift, ur yukiz mayed sskaren ula mayed msen, inna-asen:

– Mayed temsem? Mayed tram?

Isawel umezwaru, inna:

– Sawlen yiɣsan. Tessend mayed nnan? Keyyin ayed igan ameggaru g yimnukal n ugdud-ddeɣ.

Inḍu-d wiss sin, inna:

– Tasuta tameggarut!

Inna wiss kraḍ:

– Agdud-nnek ad ireẓ, ad yaccek g tillas n umezruy!

Ibedda Maksen, inna-asen:

– Ffɣat dati!

Iɣra i yiserdasen iḍufen tigemmi-nnes, inna-asen:

– Ssufeɣat-ten i yiɣrem! Ur riɣ ad inniyeɣ udmawen-nnsen ula sellaɣ i yikerkas-nnsen!

Ttin-asen yiserdasen, ffɣen, inna-as-d yiwen degsen min ad d-iseksew:

– Nsul ad d-nuɣul ! Aẓur-nnek ad izel! Ad yaccek!

Manen idsen yiserdasen ar ufuɣ n yiɣrem, flen-ten. Munen d ubrid. Kud tteddun ttiriren izlan neɣ kra yaḍen. Awed yan issnen mayed da ttinin.

Seg wass-nnaɣ ayed tennegwdem tudert n Maksen d tin yimezdaɣ n yiɣrem. Ur issin mani ɣer ittrara aqerru. Tamettant n babas tessergagi akal ɣef itteddu, terwi awed tudert n yimezdaɣ t-innemyaren. Ur issin is iɣiy ad yili tawuri irwasen tin babas. Ur issin is izmer ad ismun imezdaɣ ddaw tenbaṭ-nnes, isellin i yiwaliwen-nnes. Innuɣjef, iqqim g taddart-nnes. Ur yad da itteffeɣ, ula immegraw d wudmawen n tmazirt-nnes. Ku ammas n yiḍ, iduy-d yiselli i wawal n yibeṛṛaniyen as-innan: « Aẓur-nnek ad yaccek … ad yaccek! »

Izri yad yimalas ɣef tmettant n umnukal iddeɣ d-isman Maksen udmawen akw n tmazirt d yimɣaren n yiɣerman yaḍen. Inna-asen:

– Imalas d-iddan, ad nefren amnukal amaynu. Ad imun ugraw n wudmawen d yimɣaren akw n tmazirt. Ku yan issiweḍ-nn aneɣmis i yimezdaɣ n tmazirt-nnes.

Nekren yimɣaren min awal. Nnuɣejfen iddeɣ sellan aneɣmis. Maksen ittyassen s teɣdemt d tigzi-nnes. Ur illi umnukal amm netta. Maka ur iri ad ikkusu bab-nnes. Ira ad ikrez igran, ikes ulli, issker ayenna akw sskaren yimezdaɣ. Ira ad ig amm nitni, yiwen degsen. Yiwen ammas-nnsen. Ur iri ad ig amnukal, daccen, ilaq ad iggann mek ira ad ig amɣar n tewsitin n Kel Awraɣ. Ku mraw n yiseggwasen da ttasin amɣar g yiwet g ssat n tewsitin. Mek ira Maksen ad ig akeswat n tmazirt, ilaq ad iggann kigan n yiseggwasen. Aya, ur t-iri.

-3-

Tagezzayt_04

Sbeddant teswitin n Kel Awraɣ amɣar amaynu. Tezdey tudert, maka tmessus. Amɣar ur ɣures afud, imessus, iṛmi. Ur izmir ad yini « uhu » i awed yan. Ar meggren medden imendi iddeɣ d-igula yan urgaz awessar iɣrem. Ilsa timelsa tumlilin. Aqerru-nnes imellul s yibenẓaren. Areksen-nnes bbin s twada. Kud itteddu ileddey deffiras yan uɣyul amedhuc tečča tfidi, ssentutren-t yizan. Igula-d, iwates taddart akw taxatart g yiɣrem, tenna g izdeɣ umɣar amaynu. Igula-d imi-nnes, iknu allig issadem akal. Skecmen-t yimezdaɣ ɣer agensu. Ičča isew min ad yini awed yan wawal. G yiɣrem, inejda akw d-igulan, zemren ad ddun ɣer taddart n umnukal. G tesga-nnes tayeffast, illa udɣar g ɣiyen ad ččen sun sgunfun. Anabag d-igulan netta ira ad imnala d umɣar amaynu. Nnas-as yimḍifen:

– Ad yili asekka tifawt. Tezmerd ad tensed da.
Asekka tinniyed-t.

– Waxxa !

Asekka-nnes, ikcem s ɣur umɣar. Ibedda unabag datas, inna-as s txendallast:

– Gulaɣ-d assnaṭ tamazirt-nnun. Kigan n yiseggwasen aya ttedduɣ ɣef yiberdan. Tur-a, riɣ asgunfu. Riɣ ad mmteɣ g talwit.

– Tudert tazegrart ayed ak-nessarem a mass! Mayed trid?

– Riɣ hill ad iniɣ yan wawal!

– Ayed t-igan?

– Tamazirt-nnun tzeddig, tẓil. Medden-nnes ṛwan. Riɣ, mek tɣiyed, ad i-tfeld ad zedɣeɣ da. Adɣar amm wa ag riɣ ad mmteɣ!

– Llant tadderwin yuran g yiɣrem. Ad ak-nefk taddart tzedɣed graneɣ. Anṣuf-issek!

– Tessemdez-i tekti-nnek a mass, maka, nek ur riɣ taddart. Nek d abudrar. Da i-sseqnaḍent tadderwin. Riɣ ɣas imiq n wakal. Anect n thiturt-inu hill. Nettat ayed ɣuri. Nettat a ɣef da ttẓallaɣ. Nettat ayed igan azduɣ-inu.

– Sers tahiturt-nnek g udɣar trid!

– Riɣ inurir!

– Ameẓ adɣar g yinurir tsersed degs tahiturt-nnek! Ur illi uɣilif!

Ikcem usurdu yiwen g yinesɣuma n umnukal, inna-as:

– Inurir tkaren s yimendi d walim. Imezdaɣ da serwaten. Taflest teffeɣ medden. Argaz-a, ur t-nessin. Ur nessin awed isem-nnes. Ur nessin tamazirt-nnes. Ur nessin mayed ira. Awed yan issnen mayed iffer g wul-nnes.

Isawel uwessar, inna:

– Hilal! Isem-inu Sidna Hilal Lḥijazi Lqeḥtani. Abuhaliy ayed giɣ. Da rezzuɣ ɣef tmussni g mayed igan tamazirt!

Inna umnukal:

– Argaz iwessir. Ira asgunfu. Ur izmir ad yasi takuba. Ur nezmir ad nrar tuttra-nnes!

Iffeɣ unabag seg taddart n umnukal, ildey aɣyul-nnes ɣer inurir, azmummeg axendallas ɣef wancucen. Isares uwessar tahiturt-nnes g yinurir allig iẓẓulla. Ig ibedda, ig iktem, ig iɣref iɣef-nnes i wakal. Ttin-as yirban ar degs ṭṭeḍṣan. Iɣwejdem, immater irban d yimezdaɣ iserwaten irden, ar imerrey ifassen.

Γas ḍrant tillas, ildi-d uwessar tuzlin seg waqwrab-nnes, iddem ar ittebbey ahitur axatar ɣef ittgiwir ku ass. Ubuy-nnes inem. Ifilan-nnes sdiden, lqaqen ammi ira ad ẓarsen ignu aqidur. Ku ifilu ibbey ikres-t d ifilu yaḍen, izditen. Ar isskar tizikert. Telɣu telɣu allig akw ibbey ahitur.

Tifawt, ufan-t-id yimezdaɣ issatey agatu issker s yifilan n uhitur-nnes i yinurir, i yigran illan dat taddart n umnukal. Awed ibergemmi n umnukkal ittey-as ugatu. Ufan-t-id ibedda, aceddad azegzaw ittel i yiɣef, takuba tebbeẓ g wakal datas. Iga ɣef yimenɣi. Nnan-as:

– Matta uya?

– Ayla-nu!

Ṭṣan yimezdaɣ, nnan-as:

– Mayed ak-t-ifkan?

– Amnukal-nnun!

Iffeɣ-d umnukal seg taddart-nnes, inna i uwessar:

– Is tennefled? Akal-ddeɣ ur igi winnek. Assnaṭ ayed d-tgulad tirid ad aɣ-tawid tamazirt!

– Ur ukireɣ! key ayed i-ifkan adɣar g yinurir g zemreɣ ad serseɣ ahitur. Ahitur-inu imeqqur. Yuwey akw anect-a! Daccen iɣrem-nnek winu ayed iga. Tefkid-i-t awed netta.

Ṭṣan yimezdaɣ. Amnukal netta yuki d tkendawt n uwessar. Iggwed ɣef yimal n tmazirt. Awessar isers afus ɣef ulammas n tenbaṭ d ɣef yinurir itkaren s yirden n yimezdaɣ. Min irden, ur izmir yiɣrem ad yidir. Ad yaccek. Ad ineɣ laẓ imezdaɣ.

– I yirden-nneɣ!? Tesɣwayyed yat temɣart.

– Winu, llan ɣef wakal-inu!/p>

– Dɣik, nekwni, ɣas isemxan-nnek ayed nga. Nekwni nekrez, nesswa, nxub, nemger, nesrut, key tgulad-d assnaṭ, ur tlid ɣas tahiturt, ukwan tawid-aɣ azgen g yiɣrem d yinurir, iwa tenfel aya!

– Awal d awal!

Iseksew uwessar axendallas ɣer amnukal, inna-as:

– Ku yan yameẓ g wawal-nnes. Nek umẓeɣ g winu. Γiyeɣ ad ɣifes mmteɣ!

Tduy yat tmeṭṭuṭ, tenna, allen-nnes ḍufent abrid:

– Matta wi?

Tmel i yimezdaɣ akabar n yiregzen d-izdin tawada ɣer inurir, deffirasen yat tkabart yaḍen n yiregzen ɣef yiysan iberrkanen.

– Imakren ! Isɣway umnukal.

Isawel yiwen g yimnayen d-iggzen seg uyyis-nnes, inna i uwessar:

– Tikkelt-a, druɣ ayed akw tuwid iɣrem!

Ildi-d takuba yugel g testawt-nnes, inna i yimezdaɣ:

– Ku yan ikcem ɣer taddart-nnes. Wenna d-inmalan irden-nneɣ ad ittuneɣ!

Inmala-d umnukal, inna-as:

– Matta twuri-ddeɣ tamessast!? Tram ad aneɣ-tawim tamazirt? Tameggarut aya!

Inmala ɣer aterras yumẓen takuba, inna-as:

– Uɣulat ɣer tmizar-nnun!

Ur as-isawel uterras. Yusi takuba ɣer igenna, ibbey-as agerḍ s yiwet titi. Iḍra uqerru n umnukal ɣef wakal, iwlellu ddaw yiḍaren n yimezdaɣ iduyen.

Tger yat tmeṭṭuṭ taɣuyyit, tenna:

– Tenɣid amnukal!

– Yiwen umnukal ayed illan, isem-nnes «Allah». Yiwen umazan ayed ɣures, isem-nnes : « Muḥemmad.» Winna yumnen s « Allah » d umazan-nnes ad nejmen. Wenna ur irin ad issen yamen ad iwlellu yiɣef-nnes ɣef tmurt. Aya ayed igan tabrat-nneɣ. Sidna Hilal, tur-a, ayed igan amɣar n tmazirt-ddeɣ. Ku yan ikcem ɣer taddart-nnes.

Isawel-d yiwen yaḍen, aberrkan n wudem, inna:

– Iregzen ad qqimen. Ilaq ad sruten smuttren irden. Ilaq awed ad lemden taẓallit. Ad ten-nessufeɣ seg tillas g ddren, nmel-asen abrid ɣer imeglel d tudert izeddigen ddaw ucenyal n yislam. Tiwetmin ad kecment ɣer tadderwin, ad ur tteffɣent. Ad dlent iɣfawen-nnsent

Ldin tafekka n umnukal aglen-tt g yan useklu. Idammen-nnes ar smiqqin amm uzger ittuɣersen. Nnan-asen : « Wenna iffɣen abrid ad t-nezzwu. Amnukal ad ig amedya! ».

Yuweḍ wammas n wass, isellin yimezdaɣ i yan g yibeṛṛaniyen ar ittirir nnig tgemmi n tenbaṭ s kra n tutlayt ur ssinen. Mnalan akw, gen yiwen tama n yiwen ammi beddan g uḥidus, ddmen ar ttinin kra, ar kennun, ar ɣerrfen iɣfawen-nnsen i tmurt amm yinfalen. Imkinnaɣ kigan n tikkal. Ur izriy wass-nnaɣ allig gran iɣrem ddaw ufus-nnsen. Gulan-d yineɣmisen imezdaɣ. Kigan n yiɣerman ayed ittyamẓen ɣas s txendallast. Imezdaɣ n yitsen yiɣerman nnaɣen kigan n wussan allig rẓan.

Zrin yitsen wussan, tbeddel tudert g yiɣrem. Tuccka taṭṣa isru uzmummeg. Tiwetmin ur da tteffɣent. Tenna yurmen ad teffeɣ ur tedli iɣef-nnes da as-ttebbin azzar, neɣ tt-utan s waccad ammas n yiɣrem ard teg tazeggwaɣt s yidammen. Yitsent, gran-tent g tuna ɣzan g yinurir, raren ɣifsent akal allig ur d-iqqimi ɣas iɣfawen, ar tent-kkatent s tekwnennay allig mmutent g ungaẓ. Aɣulen yiɣfawen-nnsent amm kra n ugummu ixemjen. Idwel yiɣrem amm kra n ukurmu ameqwran g akw ttyamẓen yimezdaɣ. Wenna isawlen igganzer.

Ur ssinen yimezdaɣ matta tunant taberrkant iwtan iɣrem-nnsen seg mayed immut umnukal. Awed Maksen, ur ssinen mayed t-yaɣen. Is ittyameẓ neɣ ittunɣa. Kigan n yimezdaɣ ayed iɣalen is ittunɣa ar yan wass. Igula-d yan ukabar n yiregzen iɣrem ar seqsan medden ɣef Maksen d yidɣaren ittekka, akzen is ur ittyameẓ. Maksen iɣewweɣ ayed nnan i medden. Issker yat tkabart, ar ittebbey iberdan ɣef yinekcamen. Kigan degsen ayed inɣa. Maksen irwas iman n tmazirt. Mek t-umẓen, neɣ t-nɣan, ad yaccek usirem g wulawen-nnsen. Iweḍ n yinekcamen ɣer tmazirt yufa-d Maksen iwer-inn i yiɣrem. Yamu yiba-nnes g mayed irẓanafud i yimezdaɣ. Netta, ɣas netta ayed iɣiyen ad ten-ismun acku awal-nnes ila azal. Netta ayed ran ad ig amnukal.

Kigan n yineɣmisen ayed d-yuwḍen imezdaɣ. Kigan n tegẓiwin, n tmetrag ayed uwin yinekcamen ɣer tmazirt-nnsen. Ar tent-zzenzan g ugdez n tsemxin. Ur da ttawin ɣas tigẓiwin iẓilen. Yitsent tikkal, da awed ttawin imetrag d yicirran imeẓẓanen. Sellan i uneɣmis, nekrent tmetrag n yiɣrem ar tteggent tigezzayin ɣef wudmawen-nnsent. Ggwdent ad ttyawint. Sellan is ur da ttawin ɣas timetrag mi izeddig wudem, id tar tigezzayin.

-4-

Tagezzayt

Zrin kigan n yiseggwasen ɣef yimezdaɣ. Ur ǧǧin ɣifsen kkin amm nitni. Ittugdel-asen awed wawal. Yan wass, nnan yineckamen i yimezdaɣ:

– Ku imalas, ad nekkes kra n yiwaliwen seg tutlayt-nnun. Ad nger wiyeḍ g wansa-nnsen. Ur d-usin. Da aneɣ-segrurusen imeẓɣan. Ilaq ad nezzdig tutlayt-nnun. Ad tuɣul amm waman n teɣbalut. Zwaren s kigan n yiwaliwen ttinin yimezdaɣ ku ass amm: azul, timensiwin, tanemmirt, tifawin, tilelli, tameṭṭut, tayri, tilelli, idles, aẓawan, tanbaṭ … ku imalas, kksen tazdemt tameẓẓant n yiwaliwen. Gedlen i medden ad ten-beddren. Wenna mi sellan inna-ten, nɣen-t. Gedlen awed ismawen n ayt tmazirt. Irban d terbatin d ilulan seg wass-nnaɣ ɣursen akw ismawen ibeṛṛaniyen. Semxuzzan iɣrem. Ammi tekksed agdud tgerd wayeḍ g udɣar-nnes. Maka wenna d-illwan ikka ddaw.

Tennegza tudert n yimezdaɣ. Tiwetmin ur zmirent ad ffɣent. Ur ɣiyent ad irirent. Ur zḍarent ad ajint aḥidus ula sawlent i yiregzen. Yan wass, tenker-d tezmert-nnsent. Ukint is ilaq ad ilint tawuri-nnsent. Is ilaq ad nnaɣent. Tamettant n yat twessart ayed ibeddlen tudert-nnsent, ayed degs issaɣen timessi. Iddeɣ temmut Tin Ifsan, irin-t twetmin ad tt-ssirdent, ukint d tawda iddeɣ as-kksent iselsa. Tamektit n yiɣrem ayed ittyarun ɣef tfekka-nnes. Tercem akw iwaliwen gedlen yinekcamen ɣef tfekka-nnes. Seg yiḍaren ar agerḍ. Llan yiwaliwen g mayed igan adɣar. Γef yifassen, ɣef tadawt, ɣef taɣma. Tafekka-nnes taɣul amm kra n udlis g ttyarun awed izlan d yinẓan n yiɣrem. Tafekka-tamektit. Ukzent twetmin is ur tezmir awed yat degsent ad akw tegzem iwaliwen-ddeɣ ɣef tfekka-nnes ɣas nettat. Γures timeddukkal. Daccen ur ta temmut, nettat s yiɣef-nnes ayed istin ismawen n tegẓiwin tt-issiriden. Usint-d iɣanaben d tafriwin allig akw arunt iwaliwen igezmen ɣef tfekka n twessart. Behḍent. Ulsent tirra i yiwaliwen kigan n tikkal. Bḍant iwaliwen, mmefkant awal. Ku yat ad tegzem amur-nnes ɣef tfekka-nnes. Ssardent tawessart, ssadment-as aqerru, ttlent-tt g uɣudwu-nnes. Γrant i yiregzen, asin-tt ɣer isemḍel. Ur ssinen yimezdaɣ is udren, ass-nnaɣ, i yan imiq seg yiman-nnsen asen-yuker ucengu. Asekka-nnes, ur ta tneqqir tafuyt ayed teffeɣ Tlayetmas iɣrem. Sulent tillas dlant akal. Tettel tafriwin g ttyarun yiwaliwen n twessart i taɣma-nnes, tenker ɣer adrar. Tumeẓ abrid ar teswingim g temɣart izzrin iseggwasen n uɣilif af ad tḍuf tamektit d yidles n ugdud-nnes ittleqqafen iman. Iddeɣ nn-telkem Tawrirt n Uẓru Zeggwaɣen, tannay imeddukkal-nnes ar tt-tgannan. Tesselkem-asen tafriwin, tezdem-d tuɣul-d ɣer iɣrem.

G taddart, tenna i twetmin yaḍen:

– Tur-a, nekkwenti ayed igan iman n uɣref-ddeɣ. Ḍufemt iman-nnkwent! Ku yat tusi ɣef ubeṭṭan-nnes tamektit-nneɣ akw. Nekwenti ayed igan timḍifin-nnes. Ilaq awed ad nerzu ɣef twetmin yaḍen. Iwaliwen ittugdalen, ku ass ggadin. Ilaq ad neswingem g kra n ubrid yaḍen … Tanekra! Ilaq ad nekren yimezdaɣ, ad griwlen mgal n ucengu aneɣ-igedlen awed awal.

– Amek? Iregzen knan. Iɣfawen-nnsen tečča-ten twekka d tẓallit n ku ass. Waqila ur sar nkiren. Maksen d tkabart-nnes drusen, aggugen, ur ɣiyen ad d-nmilin iɣrem, as as-trura Hennu Ult Tamzilt.

– Nezmer nekwenti ad nesḍer tanbaṭ n yinekcamen.

– Da nezzdig tamezgida ku kraḍ wayyuren. Tikkelt d-iddan, nezzdig iɣrem seg yinekcamen.

– Ssefru!

– Ad asen-nessiɣ afa. Ad ten-negli agensu n tmezgida amm yiɣerdayen, nger-asen afa.

– Sselkem tikti i Maksen. Ini-as ad d-issenker imeddukkal-nnes akw g yiɣerman yaḍen.

– Tamezgida ad tirid imalas d-iddan. Ilaq ad nerfu!

– Asekka, ad nn-ilkem uneɣmis. Ass n sem d-iddan, ad neslelli akal-nneɣ neɣ nekkefruri.

Mseksiwent, nekrent.

-5-

Tagezzayt_01

Igula-nn uneɣmis Maksen d yimeddukkal-nnes issenfin g yiɣiz, nekren. Ku yan degsen yameẓ yat tnila ad d-inada imrigen, issenker-d imezdaɣ. Igula-d wass n sem, nekrent twetmin. Ku yat tles afaggu-nnes, ffɣent-d seg taddart n Tlayetmas g mmegrawent. Usint anasen d tseṭwin, nekrent ɣer tmezgida. G ubrid, ufant-d kigan n twetmin yaḍen. Drusent tinna issnen mayed illan g yiɣfawen-nnsent. Reẓment tamezgida ddment ar tt-zzdigent. Ur d-igula wammas n wass allig kemmlent. Iddeɣ ffɣent uɣulent ɣer tgwemma-nnsent. Kecmen yimeẓẓilla ɣer adɣar, ffɣent-d diɣ allig ɣifsen reglent tifelwin iddeɣ ddmen taẓallit. Agensu n tmezgida, mnalan akw wudmawen n yinekcamen. Sarsent tazedmin n yisɣaren dat ku tiflut, ssiɣent-asen afa. Inker waggu ɣer igenna. Yannay Maksen aggu, iggez-d seg udrar, izwur-d i tkabart-nnes. Inker uɣuyyi agensu n tmezgida nn-ilkem wafa. Tečča tmessi igertal, tečč winna ɣifsen igan taẓallit. Awed yan d-iffɣen ass-nnaɣ seg tmezgida ičča wafa. Gan akw iɣed. Kigan n yiregzen, imezdaɣ n yiɣrem ayed inejmen acku ur ddin ad ẓẓallen ass-nnaɣ. Nnant-asen twetmin-nnsen ad qqimen g tadderwin.

Mnalan akw yimezdaɣ n yiɣrem dat tmezgida ikemḍen. Inna Maksen :

– Ass-a win tlelli. Ku yan ad yawi ayla-nnes. Wenna mi uwin yinekcamen kra n wakal neɣ kra n tgemmi yaɣul-as-d ass-a.

Mneqqrent teɣwratin g yigenna. Medzen yimezdaɣ, ur ta ukizen mayed ijran. Tiwetmin kksent ifugga-nnsent d tmelsa irruyen lsant, ssufɣent-d ifassen-nnsent g recment iwaliwen akw gedlen yicenga. Udmawen-nnsent gan akw tigezzayin. Ur izriy yimalas allig sbeddan yimezdaɣ amnukal amaynu. Stin Tlayetmas. Tamɣart tamnukalt.

Zrin yitsen yiyyar, gulun-d kraḍ yiregzen ittlen g tmelsa tumlilin iɣrem. Nnan i yimezdaɣ iserwaten imendi: Nra ad niẓir amnukal. Nuwi-d asɣan amaynu. Abrid n tazedgi! Ur asen-isawel awed yan. Nekren ẓarsen yirban imeẓẓanen, ar ten-kkaten s tekwnennay. Aɣulen tiɣwerdin-nnsen, ar ttinin kra s wawal-nnsen. Kra n yiwaliwen irwasen asdiddey.

Yaru-t: Aksel AZERGI

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *