Iɣiz n Iblis

Iɣiz n Iblis

0 145

Amyaru: Laḥbib Fouad d amyaru d unaẓur. Issaɣul kigan n idlisen s tmaziɣt amm “Le petit prince” n Saint Exupéry d “Rebelle” n Meεtub Lwennas. Iga awed amedyaz.

Iɣiz n Iblis: Tullizt yiwin Arraz n Said Sifaw (1996)

Ass-a, teɣli tafukt ur d-kciment wulli ! Aɣulent-d tnezdamin seg udrar, ẓẓgent tsednan tifunasin-nnsent, kecmen medden tadderwin-nnsen awd yiwn g imeẓyanen ur nn-iqqimi beṛṛa. Ameksa d twrutt n wulli ur d-lkimen!

Γur tin wučči, da d-ttgulant tiɣṭṭen adrar n nnig yiɣrem, ar d sgnunnuyent iselliwen seg deg-s, ar yetsuḍ umeksa tabja-nnes ẓun d asen-ittini i medden han ulli da nn-tturgunt, af ad asent-gren itnan.

Ur yelli ma yufen ɣur Markus asinṣeg n umeksa adday d-isuggez ulli ad tent-issekcem i tɣuniwin. Seg uɣlay n tafukt ay da d-yeggar itnan ɣer imi n iɣrem ad yesmuqqel tiɣṭṭen d yizamarn… Ku-yiwt tessen taɣuni nnes, akw d yiwt ur da tkeccem taddart ur igin tinnes, yiwt deffer n tayeḍ ar adday yessusem iɣrem. Awd-yan ur ǧǧin as teddi tili-nnes, amksa d argaz axatar yessnen takessa zik. Uccen yeǧǧiwn tiwtal g umredul, ur as-iḍri wul ɣer izamaren n medden… Yefka ṛebbi tuga d tfunasin, tezher ddunit!

Maca isegwwasen-a imggura, ur yad teqqimi tmazirt zun d zik!

Assa, ḍrant tillas, ar yetteqqel Markus ɣer ulli g imi n iɣrem, ur d-uwiḍent! Yemyar aqqur n izamaren imeẓẓanen yettinign yemmat-sen, d iɣuyyan n icirran d yeggarn itnan i wulli. Yameẓ Markus ixf s ifassen zun d-yuki d kra… Markus ur ɣurs ulli, ɣas ultmas a ɣur da yessa aɣu yeč udi adday t-ira. Maca tiɣṭṭen n medden gant ẓun d-tinnes… Da-s ttekksent taɣufi, settunt-as tamara n imɣizen (mines) g da d yesmuttur s tufra kra n iselliwin n taẓult ad ten yezzenz…

Sul Markus yumẓ ixf s ufus, han medden ar d-tteffɣen sg tadderwin-nnsen ar saqsan ɣef umeksa d wulli. Yekker uɣuyyi d udida! Ksuḍen (avoir peur) medden ɣef wulli-nnsen. Llan winna ɣur ugar n mraw n ixfawn n izamaren d win tiɣeṭṭen. ffɣent-d tsednan ar saqsant s uɣuyyi ɣef umeksa d izamaren. Yenna yasent yiwen urgaz:

– Ameksa nessen-t! Ur ǧǧin as tucki yiwt tixsi! Argaz yessnen takessa zik, seg temẓi-nnes. Maca yerwas is as tent kksen imakren, gren-tent g lkamyyu awin tent ɣer temdint ad tent zzenzen! Aya ar yettili ku asggwas adday d-tenmala tfaska!

Nnant-as tsednan:
– Ay d ur neẓri! Maca ayen akw tennid yezmer ad yili seg ma ur-ta nannay amkesa d izamaren!

sawel-d yiwn ubucir (enfant) yenna:
– Nniɣ awen yčča-tent wuccen, ur d-izri yiwt!

Yenna-yasen Markus:
– G ubrid inw ɣer yiɣizen, ad inigeɣ amkesa d wulli, fkat-iyi-d sin medden ad nessara adrar aɣulid s aɣulid!

Kkan adrar iḍ nnaɣ, ur ufin amya. Ur akw ssfelden i waqqur n wulli. Yeggez Markus s iɣiz ad yinig kra n islliwen.

Tifawt, ɣur yiley n wass, yuli-d Markus seg yiɣiz, udem d aberkan, yeggez ɣer asif ad yessird tidi d ukeffus n taẓult. Seg udrar ad nn-iẓra ulli g wasif… Druɣ yufeg s umdaz, ar yettini:
– Nsant wulli g wasif?! Ur ssineɣ ma yaɣen amksa! Maca ulli ssnent abrid ɣer iɣrem, zemrent ad nn-awḍent meqqar ur illi umeksa! Kra yaḍen aya!

Ar nn-ittenmili Markus ɣer tasga n waman. Yerna kraṭ tsurifin, ybedd ar yesmuqqul ulli ur akw da ttemmectagent. Yerna kra n tsurifin yaḍen, yenẓu degsnt bezgnet hezzant iḍaren s igenna, yekk-d uklaffu imawen nnsent ar ɣifsent ttettin yizan izegzawen. Ameksa yekkucm g udɣar, yerwl yils seg imi-nnes, ur yezmir ad isawl. Ur yad yessird Markus akeffus, tagel twengimt-nnes ybedd g udɣar ẓun-dd igjdi ar yettini:
– Matta tmara ddeɣ diɣ ɣifneɣ yaru ṛebbi ? Mayed as-nessker allig ukan aɣ-izuzzer ger medden? Neẓẓulla naẓum ur da nttaker d ur da nesskar tinna xxanin!

ul Markus da ytteddu yaɣul ger umeksa d wulli, han kuẓ n medden n iɣrem uggan-d ɣef wasif. Sin deg-sen usin ijenwiyn gan ɣef imenɣi. Wiyaḍ, umẓen aqeccab s tuɣmas, ajellabi ɣef iɣir d uɣruc g ufus:
– Matta uynnaɣ a Markus?! Yak labas?!

– Taquryant taberkant a Muḥ! Ur sul yeqqimi ma yaɣ-ittaɣen! Teggez-d tmara fell-aɣ, mmutent wulli, yekkucem umeksa, nesteɣfer-as i ṛbbi ntayeb-as! Yenna-yas Muh:
– Ṣaḥa a ṛebbi ṣaḥa! Ur-ta nettu tin iyaziḍen allig han tin wulli… Ur d-sul yeqqimi ɣas tinneɣ! Nkerat a medden hat texwla txamet-nneɣ, ur yad yelli ma ɣef nzeddeɣ!

Ar yttetti Ḥeddu ger wulli, ar tent-itteggwer s uɣruc-nnes… Sulen itsen izamaren ddren, maca ur zḍaren ad bedden ɣef iḍaren nnsen, iɣawel ysikk-asen ajenwi. Iddu yaɣul-d ɣer umksa akucam d imeddukkal-nnes, inna-yasen:
Yerwas is ččant kra! Maca asafar as-gran ijadarmiyen i tmurɣi, ur yad yelli g tuga n umerdul. Kraḍ iseggwasen zrin ɣef uya… Mmutent wulli ussan-nnaɣ, maca ur yad da tent inqqa ulmu n ugdal… Yenna yasen Markus:

– Swant kra! Ẓriɣ iselman g wasif ruran tadist s ignna asin-ten waman. Aman n wasif zegzawn ẓun degsen irin n luzin! Sawlen-aɣ imesdawn d-iddan seg Tinmel ɣef uya, aman d yeggar luzin da neqqan tuga nɣen ulli d ma yellan… Luzin n taẓult yella-nn tama n imɣizen. Ad neddu ad nẓer!

Ggafin irgazen i wasif ar imɣizen, ufan-nn yiwt tergwa tameẓẓant n waman zegzawen tekka-d ger iɣuliden… Imɣan ur llin tiseggwin n tergwa-nnaɣ, tezlef tuga akw n tama-nnes! Munen d ifilu n waman zegzawnin allig ten-in -ufan da d-tteffɣen seg yiwn uqadus d yekkan luzin! Yenna-yasen Skku:
– Xlant wulli s uzerdiɣ n taẓult! Yenza ddaw wakal n tmazirt-nneɣ, tagur-aɣ-d nekwni tmara yneqqan ulli! Ur yelli kra n usselki yugren wa! Akal-nneɣ yenger! Tudert terẓag! Nerrẓa g tmazirt-nneɣ! Yernu ar yettini:

– Nsul ur nettu asafar n tmurɣi aɣ-yenɣan ulli, d tagant n urgan yakufen, allig han azerdiɣ da yanɣ-ixellu izamaren! Baraka a ṛebbi! Yiwda!

Yenna-d Markus:
– Maɣ ṛebbi a da d-itteksen taẓult n ddaw wakal!? Maɣ netta a da tt-yessiriden? Neɣ netta ay da s-d-igan i yirin aqadus s asif!? Awi aǧat-aɣ-nn g wawal-nnaɣ! Hat bnadem aɣ-yessekren tinna-aɣ yaɣen… Bnadem a Muḥ! Netta ad aɣ-iqqden tasa ay ameddakkwel! Yernu ar ittini:

– Ma nesskar? Ma ur nesskar? Urupa ur sul da tessaɣ taẓult yeccaren d wakal, tra taẓult zeddigen! Acku azerdiɣ- nnes ar ynqqa imɣan yexlu taddagin ar yessukuf tudert g isaffen d iɣbula… Iwa hat da tt-ssiriden da, ar tt-yettazen Uṛumi ɣer Urupa, yger-aɣ-d nekwni azerdiɣ-nnes s asif. Aẓrdiɣ yenɣa iselman d wulli! Yessn ṛebbi ma da d-tteksen ddaw wakal… Nekwni ur nẓri ɣas azerdiɣ!

Markus ur ǧin yessin tiddukliwin n ufrag n taganin neɣ tinin ugama (nature), maca ar yesseflid ineɣmisen da sawalen ɣef Grinbis (Greenpeace) d imenɣi-nnes ɣef taluft n yirimen inukliyirn (essais nucléaires) n Fransa g yill apasifik… Yessfeld i tdukliwin n tudert da ssuturent g medden ad akzen tiɣri n imɣan d imudduren… Markus, yukez tiɣri n tdukliwin n tudert. Yessen atig n waman d win wakal.

Yelkem-nn wawal medden, yezri unɣmis seg yimi ɣer amẓẓuɣ. Smunen Ayt Kraḍ Ixsan yiwt tdeggwat agraw meqquren ad sawln ɣef taluft n luzin asen yenɣan tudert. Ynna yasen Muḥ:
– Ad nessker agdud ɣef wakal-nneɣ, nawi arraw d tsednan ɣer tasga n imɣizen, nsbedd ixamen-nneɣ dinn, nɣr-d i tdukliwin n imezdaɣ imzwura n wakal d ineɣmasen akw n ddunit ad ẓren sissenen taluft-nneɣ i medden. Ad nger tiɣri sya d sya, yeqqan ad yili kra aɣ-yessflidn! Ad nessuter ad yeqqen luzin, neɣ t-iwin iwr-inn i udrar-nneɣ. Ad nsawel i Grinbis d tmesmunin akw n izerfan n umdan d tinin imudduren (animaux), ur nenni ad nezziḍer i tmara taderɣalt ɣifneɣ yaru ṛbbi… Ur ɣur-neɣ yelli kra yaḍen ɣas akal d wulli! Ma mmuten nemmut! Ass g ur neẓẓig tiɣṭṭen d tleɣwmin da yaɣ-ttennegza tudert ar nreẓẓa seg tmizar- nneɣ ɣer tinin medden… Nekwni neṛmi ! Nra ad neqqim g idraren-nneɣ, nekwni d wulli-nneɣ tasga n isaffen d taganin zeddignin…

Bedden akw irgazen ar swingimen g ugdud n taẓult, s umeẓẓan d uxatar, tiwetmin d temɣarin. Nnan ad munen g yiwn ugdud, ad ssidren izerfan-nnsen ger winin medden neɣ mmuten… Imesdurar ur zḍaren i gar tudert. Nnumen imenɣi ɣef wakal… Ur da ten-issiwid awd yan ig asen- ittuyakkas wakal.

Yenna-yasen Sekku:
– Ad isinen medden is nella! Nsul nedder g tmazirt -nneɣ… Ur tt-nzzenzi i awdyan. Akal-nneɣ ur da ynezza! Uǧan-aɣ-t-id imzwura, ad t-id-naǧ i warraw-nneɣ! Ur nezmir ad aɣ-yaɣ uzwar n wakal! Ad asen-d-naǧ i warraw -nneɣ akal zeddigen, akal yzḍaren ad ysekker imɣan d iskwla (arbres), ur dd akal yuḍnen s yirin n luzin allig ur yezmir ad yefk amud… Yernu ar yttini:

Tamazirt teɣra-yawn! Akufent taganin n urgan d tinin idgel, mmuten iselman g isaffen. Ur yad sulen izenkaḍ g yimerdal, yenɣa-ten uberrani! Ẓer is sulent kra n tewtal neɣ tisekwrin da ttettint g igran-nneɣ! Maɣ allig ur yad da sgergurent tmallwin ɣef isekwla n wurtan?! Tiqqet teḍfar tayeḍ, hat dɣi ad ur yad ttafam awd aman zeddignin ad ten-teswim!

Yenna-d Markus:

– Ma sul ur kwen-yaɣ?! Ulli mmutent, asif yegra-d islman-nnes, igdaḍ ur yad llin, tagant n urgan takuf! Telkem tuzzalt adif! Tessnem akw is Aṛumi ad ysskren ayen kwen-yaɣen. Ig sul tram ad tilim ɣef wakal d waman n imezwura, taǧem-ten-id zeddign i tsutiwin yaḍen, kkerat amm yiwen urgaz tmunem g yan ugdud meqquren, ar tinim s yiwen imi: Ad yidir ugdud-nneɣ! Nnan akw s yiwen imi:

– Ad yidir ugdud-nneɣ! Nnan-d wiyaḍ:

– Ad yidir!

Kkrent teɣwratin d udida, yekk wawal taddart ɣer tayeḍ, yelkem-nn uneɣmis idraren akw n tmazirt. Tifawt n was-nni, awed yiwen ur nn-iqqimi g iɣrem. Ddan akw Ayt Kraḍ Ixsan ɣer amrdul yellan tasga n luzin d imɣizen. Iwin arraw-nnsen, awin tifunasin, ixamen, ikḍifen, ikeccuḍen, awern d uyen akw ɣursen yellan… sskeren yiwen ukabar meqquren munen d ubrid. Wenna ten-iẓran g uɣaras, ad yini amussu n warraw n Sidna Nuḥ… Akabar meqquren! Tisednan bubbant imeẓẓanen, iwessarn ɣef iserdan, ikḍifen d yisɣarn ɣef ileɣwman. Tawada amm ta, ur ǧin telli ɣas g tenfusin n zik, tinna tteqisent temɣarin tasga n walmessiten iḍan n tegrest. Ar ttazzalen icirran sya d sya, iga was-nnaɣ ẓun d tafaska meqquren ɣursen.

Asey aḍar sers aḍar allig n lekmen agdal. Sersen iserdan isektar-nnsen, sbedden irgazen tixamin. Yeqqim Markus ɣef yiwen islli. Dat-as, yemma-s ugment wallen-nnes imeṭṭawen, tenḍef tasa-nnes tgellint. Imi-nnes ur degs tuɣmas, yefreɣ ẓun d teqqes-t tzizwa. Tenna-yas i Markus:
– Ssukfen argan! Iwa tudert taberkant aya! Ur ǧin ssineɣ is sulen llan medden g thamajit. Maɣ ma yasen-gant taddagin n urgan?! Argan d tudert-inw! Ass-a ur ɣur-i ulli, ur ɣur-i argan! Tudert-inw tennegza! Nek ur lliɣ ma ur ɣur-i ulli! Ur ddirɣ ɣas s urgan d ukeffay! Ass-a hayyi mmuteɣ! Awiyat-i ɣer isemḍal! Adrat-iyi… mmuteɣ!

Akal ila atig (prix) meqquren ɣur ayt tmazirt. Ur yelli wakal ɣur laḥ aman… Akal da yetmun d waman-nnes… Aman n tmurt-a yenger-ten luzin!

Baba-s n Muḥend argaz axatar yessnen amezruy n tmazirt, yamu g imenɣi n Tassawt. Tanzruft akw tella ddaw ufus-nnes. Ur as-teffir akw d yiwt. Netta ayed yusin kuẓ n tfelwin, yara fellasent s isekkilen n tfinaɣ:

– Asif-nneɣ ur igi zzebbala!

– Tusim taẓult taǧem-aɣ-d azerdiɣ-nnes!

– Argan d tudert-nneɣ!

– Ur da yenezza wakal-nneɣ!

Tadeggwat (le soir) ɣur uɣlay n tafukt, da d-tteffɣen medden s igedman-nnsen sbedden aḥidus dat txamin, ar ttasin izlan ɣef taluft n yiɣiz n taẓult… Ar ttinin timedyazin d tmawayin ɣef temɣwr n udrar n Atlas. S yiḍ, da sskaren yat takat meqquren ar dgs sserɣan igdman-nnsen, yeqqim uḥidus d izlan ar ɣur tin-yiḍs. Ku tadggwat ar d-itteffeɣ uḥidus.

Tifawt, da tteddunt tcirratin add awint tuga i tfunasin, neɣ da ttedunt add agment aman seg teɣbalut n ufella… Kra n irgazen da ttnayen tiserdan-nnsen ddun ad ẓren Aṛumi yellan ɣef imɣizen ad as sawlen ɣef taluft nnsen. Muḥend d wiyaḍ da tteddun ɣur lqayed d ijadarmiyen ad ssutren areẓẓum n tmurkist n luzin. Sekku n Ayt Kraḍ Ixsan yella-nn g Rbaṭ (Rabat) da yrezzu ad ysawel d tenbaṭ meqquren, d tdukliwin n izerfan d tinin imzdaɣ imezwura n wakal… Yenna-yas Muḥend i lqayd:
– Ad deg-k ybark ṛebbi a lqayd, seg wass g yella luzin g tmazirt-nneɣ, ur yad yelli waḍu g ilǧigen n tmurt. Igran g nkerrez ileǧigen da ssan s waman n wasif, aman n wasif deg-sen azerdiɣ n taẓult, aleǧig deg-sen yeswan ur yad da yettili aḍu yejjan! Tessent is ur da nezzenza ɣas aman n ileǧigen. Ssuq n Urupa ur yad da ɣur-neɣ yessaɣ, acku aɣulen rekkiẓen waman n ileǧigen-nneɣ! Nekwni hat nettusslka g tmazirt, yettuyakkes-aɣ wakal, yenger wanu n luzin aman n wasif. Nemmut! Izerfan-nneɣ ur llin! Ur deg-neɣ tt-yiwi akw d yiwen, nga ammi ur nelli! Matta uya a lqayd?! Ini-yasn han Adrar n Taẓult da yessutur tudert! Wah! Ayyur ay nbedd ur deg-neɣ yseqsa yiwn! Nessifeḍ tibratin sya d sya, awdyan ur aɣ-d-iruri… Hat nggwed ad ɣlin idammen i medden, ad ur yad zziḍren i uya, ad yekker imenɣi d lbaruḍ! Yenna-yas lqayd:

– Γas ad ur ttawḍem awed yan! Ad as-nsawel i Uṛumi ad yettawi irin n luzin-nnes iwr-inn i udrar-nnwen, nẓer ad yefru izmaz ɣif-s yellan. Γas ad ur tessemɣurem taluft, hat ayenna ywhnen akw aynna ! A yayd taluft meqquren tennarẓem ɣef ufus-inw!

Yiwn yiḍ, zzrin-d itilifizyunen n Urupa tamukrist n udrar n Taẓult… Ẓran medden ayenna yettuyaran ɣef tfelwin yuglen dat ixamen. Ẓran tamara d tmukrist g llan medden n Ayt Kraḍ Ixsan…

Tifawt n wass yaḍen, ggzen ijaḍarmiyn d imxezniyen s ilandrubiren-nnsen ɣef txamin. Amata g medden yella sul yeṭṭes. Ar ten kkaten! Ar kkaten akw d iwessaren, tiwetmin d warraw-nnsent, ar ten-kkaten allig ten-gan d izggwaɣen, redlen-asen akw tixamin. Winna yrewlen rewlen, winna ur yezmiren umẓen-ten. Tifunasin, iserdan d ileɣwman ṭayn-ten g udrar, kemḍen ixamen d ikḍifen. Amẓen irgazen, awin-ten…

Yettuyameẓ Markus, Muḥend, Sekku d wiyaḍ. Awin-ten ɣer lkumisariya, zzrin-ten i lmeḥkama, wten-ten s sin isggwasen n lḥebs ɣef uyenna ur sskiren. Aran-asen g iwriqen is ssekren akabar agrawal yran ad ysekker tagrawla g idurar n Atlas… Yefest ṛadiyu, festen iɣmisen! Ur ysawl akw d yiwn… ɣas taymunt n izerfan n umdan g Tinmel, d kra n imesdawn n tmazirt ay sawalen ɣef taluft mi qqaren: Adrar n Taẓult. Aqadus n uzerdiɣ sul ytteffey irin s asif. Markus d imeddukal-is g lḥebs, medden n tmazirt bḍan g idurar n tasga n iɣrem. Amata ur nn-yaɣul, yeffer-nn g ifri n udrar…

Zrin wussan, yettu wawal awal. Awal yerẓag ur sul da t- yettfzaẓ awdyan. Yiwen wass alin-d iɣmisen s yan uneɣmis ẓun d lbarud da yettini: Ma yessaɣen iɣiz yellan g udrar n Taẓult!! Takubbanit yefkan ugar tawi-t! Ad yeg winnes!! Wenna ɣur llan idrimen yeddu ad yseɣ adrar!! Adrar n Taẓult yekcem ssuq n isemsaren… ffɣen-d medden ar ttinin:

– Bab llah Iɣiz n Iblis!

– Bab llah Adrar n Taẓult!

– Bab llah Tamurt n Iderwicn!

Zziɣ da tnezza tmurt n Imaziɣen g ssuq n Urupa…

Zrin isggwasen, yaɣul-d Markus ad yezdeɣ g udrar n tmazirt, ar yetteqqel ad as-nn-awḍent tebratin seg ɣur ugraw n Imaziɣen. Ur yad da d-ittali waggu seg taddart n Markus. Tameṭṭuṭ-nnes ur sul da tteddu ɣer igran g ur ylli uleǧig d tuga… Aluḍ n tmazirt da deg-s d-ikkat waḍu n uzerdiɣ. Tizizwa terwel seg wurtan. Iselman mmutnin sulen imdwan n wasif da ten-d-ggaren. Tiɣeṭṭen yenɣa-tent yirin, irgazen n tmazirt mmuten s tixat. Tamara taderɣalt ay amddakwel.

Yaru-t: Laḥbib Fouad

25 g yunyu 1996

– Iɣiz n Iblis: Le ravin du diable

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *