Tizgi

GER UGAFA D UNẒUL

0 105

Ass amezwaru g tt-yannay ar d-tteggez seg umesnay (bus) ibeddan dat usasu (Café) « les roches » g waqqa n Tiẓgi, isella i kra n wawal ikka-d agensu-nnes, inna-as : «Nker ! Nettat aya ! ». Inmala ɣer amesnay, inna i yirumiyen degs d-ittegzen :

« Anṣuf-issun g waqqa n Tdeɣt ! ». Inmala ɣer tmeṭṭuṭ tawessart, inna-as :
– Azul a massa, anṣuf-issem ! Axes ur trid kra n tɣawsa ?

– Tanemmirt-nnek ! Riɣ ad ɣliɣ asif, ad akiɣ s uqraf n waman. Mek tɣiyed ad i-tawsed ad ɣliɣ !
– S umdaz !

Yumeẓ-as afus, ddmen (commencer) tawada allig nḍun issif n waman isul wasif da yalla. Tenna-as :
– Aɣulen drusen waman kigan g wasif !

– Ih kigan !

– Kkiɣ da ugar n 30 n useggwas aya. Kkan waman n wasif-ddeɣ dusen. Zemren ad asin amdan !

– Tadersi ag idda wasif itsen iseggwasen aya !

Tuta afus g trufa-nnes (poche), teldi-d kra n idrimen, tra ad as-ten-tfek, inna-as :
– Ula maɣef a massa. Ur nniɣ ad amẓeɣ amya.

– Wenna trid !

Ternu imiq, tenna-as :
– Trid ad tsud kra ? Addud ɣer asasu mek ɣurrek imiq n wakud !

Γwejdmen g usasu allig swan atag. Sulen ar sawalen tiselli trumiyt tawessart i umessudu n umesnay ar ittini :
– Rfu-yat. Ur ɣurneɣ kigan n wakud. Mek tram ad nn-nessikel aɣelluy n tafuyt ɣef ilxixen n Merzuga, ilaq ad tɣiwlem.

Tumeẓ trumiyt afus n uterras, tenna-as :
– Tanemmirt-nnek. Ur awed ssineɣ isem-nnek, nekkin Claire !

– Tessemdez-i tussna-nnem a massa, nekkin Muḥa !

Teldi-d aɣanib seg teqrabt-nnes, turu tansa-nnes d wuṭṭun n tiliɣri-nnes ɣef yat tewriqt, tek-as-tt, tenna-as :
– Ad iqqim uzday geraɣ. Azen-inn tansa-nnek.

– Waxxa ! Amuddu iɣudan !

Tney g umesnay, tuta-as s ufus. Yusi afus ɣer igenna, yaki d yan yired n usirem immɣid agensu-nnes. Γas isaggez afus, yinniy amesnay yaḍen ar d-ittenmili. Iseggem iselsa-nnes izegzawen d tkerziyt-nnes, inna-asen-d :
– Anṣuf-issun g Waqqa …

Iddeɣ teɣli tafuyt, ikkes iselsa-nnes, ifel-ten g usasu, yuɣul ɣer iɣrem-nnes. G ubrid, ikti-d tarumiyt, allen-nnes tizegzawin, azzar-nnes awraɣ d yiffan-nnes yuffan. Yameẓ abrid ɣer yan umeddakkwel-nnes ɣur illa uselkim (ordinateur) izdin s agratsa (internet). Iɣwejdem allig yaru yat tebrat i Claire, inada isem-nnes g Facebook, twitter d Instagram. Ur tt-yufi.

Asekka-nnes, yazen-as yat tkerḍa g lbusṭa. Netta ilkem-d asasu, yaf-tt-d dat-as, tbedda amm kra n tmillust. Ur issin mayed ittini. Tenna-as :
– Aɣuleɣ-d ɣifk ! Imeddukkal-inu ddan ɣer Warzazat !

– Anṣuf-issem !

Iɣwejdem. Ur issin mayed ittini. Tenna-as diɣ :
– Ur ẓḍareɣ ad ttuɣ azmummeg-nnek d tirwi n wul-nnek. Riɣ ad isineɣ is zemreɣ ad ssekreɣ kra s k-ttawseɣ.

Itter yat talqehwat taberkant i userbay, inna-as :
– Ayenna ɣifi illan ayed ssekreɣ a massa !

– Drusen winna isskaren ayenna ɣifsen illan g wakud-ddeɣ !

– Mayed igan tawuri-nnek !

– Amya ! Gifeɣ amm kigan g tezgiwin-inu ! Γriɣ g tesdawit ! ur telli twuri, ur illi usirem. Ur nli afud ! tudert-inu d taseggant. Imi-inu da izmummug ɣas i yirumiyen, maka ul-inu inḍef, degs aters ur jjujuyen isafaren.

Tfesta trumiyt, tenna-as :
– Ad nečč imekli ukwan nsiwel, maka ur zmireɣ ad isineɣ imaɣ allig iters wul-nnek meqqar tedderd g waqqa izeddigen, iẓilen amm wa.

– Nekkin a «Madame» ṛmiɣ seg « Anṣuf-issun », « Y’a pas mieux que le tajine », «Tapis et bijoux berbères», « alxix n Merzuga », « aneqqer d uɣelluy n tafuyt ɣef igidu n umaɣa » … ɣuri ammi d-tuli tafuyt ammi teɣli … ɣef ulxix neɣ ɣef ka yaḍen. Nekkin tillas ag ddreɣ !

Ibedda iddeɣ yannay imeṭṭawen ar sfikkiten ɣef waggayen n Claire. Tenna-as :
– Awed nekkin, addad (situation) amm winnek ag ddreɣ ! Nekkin tazumi (solitude) ayed i-inɣan. Awed yan ur da digi iseqsa. Awed yan i-iran acku wessireɣ !

– Uhu a lalla. Ad ur ttinid ayennaɣ. Ha-yi a-ya idem. Mayed trid ?

– Mer ufiɣ iɣwzif ! Mer ufiɣ ur idk beṭṭuɣ !

Tfesta, ifest awed netta. Teɣra i userbay ad asen-ik ad tčin imekli. Zzrin tameddit n wass-nnaɣ g usasu ar sawalen. Iddeɣ ḍrant tillas imun ids ɣer taddart-nnes. Tensa ɣursen. Asekka-nnes, imun ids allig ssaran g Tinɣir d Bumalen n Dades. Zrin ɣifsen wussan amm wusman. Rfan. Izri umalas, tenna-as :
– Ilaq ad uɣuleɣ ɣer Fransa

Tefka-as kra n idrimen, iddeɣ tt-nn-isselkem i usafag n Warzazat, tenna-as :
– Ad d-uɣuleɣ ayyur yaḍen !

Tsars ancucen-nnes ɣef wininnes, ternu, tenna-as :
– Usar ttuɣ amalas-ddeɣ idk zzriɣ !

– Ar timnilit !

Tney g tmaylalt, yuɣul-d netta ɣer aqqa. Iḍ n wass-nnaɣ teɣra-as-d g tiliɣri allig mmefkan ineɣmisen. Ku yass ar ttemsawalen g Skype, neɣ myazanen g Facebook g taɣul tessker amiḍan (compte). Ku yass imkinnaɣ. Ur da akw itteffeɣ asibir n iɣrem. Nettat ar tettganna ɣas iɣef n wayyur ad tameẓ idrimen add tuɣul ɣer Merruk. Tenna-as yan wass :
– Keyyin tsuled tmeẓẓiyed. Nekkin ɣuri 65 n iseggwasen. Wenna aɣ-yannayen ad yiɣil is tgid memmi !

Irar-as s uzrab :
– Ur illi uɣilif. Ad ur tsenbuttuld iɣef-nnem s tektiwin amm tinnaɣ. Nekkin riɣ-kem. Riɣ ad idireɣ g yirbi-nnem.

Agensu-nnes, inna : « Γas ssufeɣ-i hill tamazirt-ddeɣ tigdit. Riɣ ad dduɣ s Uruppa. Γiyeɣ ad niɣ aɣerrabu n ukecciḍ, daccen a tafekka amm tinnem af ad nn-awḍeɣ.»

Ilkem-d yiɣef n wayyur, tuɣul-d Claire ɣer tmazirt. Imdez Muḥa. Ur issin amek iga allig as-inna :
– I mer nuwil ?

– Wenna trid !

Mma n Muḥa ur tri. Ur tt-tessusim tekti-ddeɣ. Claire twessir. Ur awed tri ad iddu memmis ɣer Uruppa. Teggwed ad iffeɣ abrid, ayed as-tenna. Daccen ur akw tessin Claire, ula mayed tra g memmis.

Uwlen, gin yat tfugla tameẓẓant g taddart n Muḥa. Nnan-as imeddukkal-nnes :
– Γas gulu-nn, ssker tiwriqqin-nnek, tgerd-iss !

– Ur zḍareɣ ! ur i-iki wul-inu ad as-ssekreɣ tennaɣ. Nek riɣ ad ffɣeɣ tamazirt-ddeɣ, nettat tra ad degs teqqim. Tenna-ak : « Tra tafuyt », nekkin tuley-id g uqerru. Ur tt-ḥmileɣ. Ilaq ad dduɣ !

Zrin itsen iyyar, iddu Muḥa d Claire ɣer Fransa. G Bariz, yukez amuḍin yaɣen Claire izedɣen g yat taddart inyaman. Icirran-nnes zrin-tt ur yad da ɣurs ttekkan.

Iddem Muḥa ar ittewwiri, maka tayri-nnes i Claire ar txessey. Inna-as yan wass :
– Riɣ icirran ! Kem ur tɣiyed !

– Ssneɣ is wessireɣ ! Icirran, mecta ayed trid ?

– Yiwen ! Γas yiwen !

– Ad t-id nawi seg iɣrem-nnek. Ad ilin igujilen yuklalen (qui méritent) ! Aǧ ad dduɣ, siwleɣ i yemmak.

– Waxxa !

Tedda Claire ɣer Merruk add tnada kra n urba. Tufa-t ɣur yat twacult g Tinɣir. Mmuten imarawen-nnes. Tuwit Claire ɣer tgemmi n Ayt Muḥa, teddem ar ttazzla seg tedbelt (administration) ɣer tayḍ. Seg Warzazat ar Tinɣir, seg Merrakc ar Tamesna. Arba, ku yass ittmer degs. Nettat ur yad tɣiy ad t-tfel. Tka-as awal. Teggwulla-as ur t-tzerrey. Nnan-as g Tmesna : «Ur tɣiyed ad t-tawid acku ur tgid taneslemt !

Tenna-asen : «Maka argaz-inu u tmazirt ayed iga », ruran-as : « Tezmerd ad tekcemd yislam, tawid-t ». Tenna-asen : « Ur nniɣ !». Ruran-as : « Ur am illi ».

Nettat ttukraf. Ur yad tɣiy ad tawi arba as yad iqqarem « mma », ula tɣiy ad t-tfel. Teqqima nettat d urba g taddart n mma n Muḥa. Netta iqqima g tmazirt n usemmiḍ. Mzarayen.

Zrin itsen imalasen, yuɣul-d ɣer tmazirt. Iddem diɣ ar ittini i ymerrayen (touristes) g waqqa n Tiẓgi:

– Anṣuf-issun g tmazirt n tafuyt … Alxix n Merzuga … Aɣlay d uneqqeṛ n tafuyt … amm nitni ur illi … g Bariz.

Yaru-t: Aksel AZERGI

Lille ass n 12.12.13

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *