GAYA D WARRAW-NNES

0 107

GAYA D WARRAW-NNES*

Seg tizwiri γur u-ya n tγermin, walu γursent abla Gaya. Awed Gaya walu xes nettat da tt-tneqqa tγufi d taγzi n yiḍan, meqqar urta llin yiḍan ula tifawin, ula ussan akud-nnaγ. D taγzi n uzemz meqqar urta illi. Gaya tebḍa ger uswingem g uwtem d ger tγufi g tella. Ig tgen da tcehencir kigan da tt-ttaγ tmaḍunt da tt-tneqqa lqilt, allig tukez is ilaq ad yili uwtem xef wakal uridd xes tawtemt. Maka imek ittegga ad yili? S mani? Seg mandi? I mami ila tawuri hat illa? I matta iswiten s ittili? Iγey ad yili s iswi n tayri d twusi d tamunt. Ayedda illa uwtem qqad yaf i iyγef-nnes iswiten-nnes yaḍnin.

Yan wass inger uzal d tdeggwat tusey Gaya tummist n wafa, talaγt, tiẓula iγwlan d akw izwuten tsefsey-ten, terru-yasen aman, temri-ten allig gan arktu, tbeṛṛem-t amm teglayt tleqqwem-t. Ggiḍ tgen iṭeṣ iγwban, ar ttakey d teglayt ar ttemγur g udis-nnes. Imaḥ hat turew, han taslemya temγur. Itreg iga aryaz. Gaya aynna turew tettu ur tebbiy asṛem n tmiṭṭ, ula yas-tkkes aγu ar diges iteṭṭeḍ aha.

Iqqim memmis aha isleγ diges isenbuttel-tt g yimussuten-nnes, ar γifs iggan ig tgen. Γur idelsen n warnaten da di-tffγent tmitar n utrag g yiwetman zik. Maka id mma ur da yakkant taγḍeft i uynnaγ.

Mma abda da ṭṭamẓ g memmis ur tessin mayed isellwu yimeẓ-nnaγ. Da ttγima s uḥeẓẓud ar tessirid tafekka-nnes datas, ar tggar tara d mayd ijjan tgen γur memmis. A-ya ayd isellwan tarwa. A-ya ayd ijṛan ger Gaya d memmis allig turew wayeḍ uwtem. Nγiy ad nini Gaya ayd iran a-ya ad yili, acku yuwen g iswiten-ddeγ as d-tessafeγ amzwaru s tudert. Iffeγ-d wayeḍ uwtem s tudert ar itemγur amm bba-nnes. Iga aryaz ikemmelen. Gaya tuḥel tezzikrir sin iregzen tẓuẓed ibeddi ula tawuri, dinnaγ ag tusey tebbey iseṛman n tmiṭṭ tebḍu idsen. Iddeγ bḍan inker imenγi ger wawmaten ar tnaγen γef mma-nsen. Kuyan ira-tt I waḍu-nnes. Gaya tekka tasga i uxatar allig imγur umeẓẓan tuγul ẓares. Nettat ayed igan i yimenγi-ddeγ ad yili.

Tsul da tessuḍuḍ ameẓẓan ar iss-tesskar ayeddaγ tra, ayennaγ ayd ibrin amezwaru iγal is ur yad t-itri is iss-teqḍa iswiten-nnes tger-iss. Ibberber wafa g ul n uxatar. Ismuqqel hat ur yad iswuri i waḍu g u-ya n tudert icklen, da ittenaγ ad iheṛd memmis maka ur as-izḍar acku tekka-yas-d mma-nnes tasga. Awd ameẓẓan da ikkat ad iheṛd bba-nnes maka da yas-ttamma mma-nnes, ar t-ttrara ḍart. Da yalla, ar ittini bba ira kulci i waḍu-nnes, ira amur-nnes yiri winnew. Idd amezwaru da inedder ar ittini awd yan i-iran g tudert-a. Gaya mud-nnes memmis, memmis mud-nnes mma-nnes, awd yan i-iran.

Seg unẓir ad munen s kraḍ g yan wansa. Da ag itteyakez uzeggal n u-ya n tlalit. Gaya ur tessin iswiten γef turew amezwaru. D ur ssinen nitni s sin man ḍart tlalit n umeẓẓan. War aswingem dat tlalit n ufgan ayd d-isellwun medden ad gen icenga grasen. Gaya af ad ad tettu leγlubit g tella ar tsbedda tiwririn ar teẓẓad idurar. Idd iwtman mud-nnsen imenγi allig irra umeẓẓan bba-nnes, ibbey-as iḍarren d yifassen. Ira a’t-ineγ maka umman-as idamen-nnsen igan yuwen. Inna-as mek trid ad tidired aley s afella ad ur k-ttinniyeγ.

Yaley uxatar s afella, s amya, s yan wansa ixwan urta illin. Beṭṭu n Gaya d uryaz-nnes, igan memmis, ayd aγ-d-ikan igenwan. Ameẓẓan ibri-t uyenna issker g bba-nnes, ira ad t-iqqis i mma-nnes maka ur t-tuǧi, ḍas-treggwel i wawal af ad ad ibabb aẓaẓa n bba-nnes i waḍu-nnes. Axatar idda yuley da inedder isul da ittini awd yan i-iran g tudert-a. teḍher-d tmaḍunt yaγen axatar g iwaliwen-nnes, itkar wul-nnes s leḥsayef d uγenzu, meqqar dd-ayennaγ, iswanfa g imenγi. Itsent tikkal imdez, itsent yaḍen iqreḥ.

Axatar iga igenna. Ig iqreḥ ḍaγ-d-ittazen tigniw, usman, isemmiden d izwuten. Ig imdez, diγ, ik-aγ-d tafuyt, ayyur, itran d teslit n unẓar. Imki as d-iffeγ waggwal amzwaru d ureẓẓum amezwaru g tudert. D tmukrisin ittilin g twaculin d tawjiwin. Gaya turew sin iwetman imseḍfaṛen, ijṛu beṭṭu grasen, yaley uxatar s afella iffeγ akal ik-aγ-d igenna. Ger yigenna d wakal ika-yaγ-t-id umeẓẓan, ik-aγ-d awd wahli n yimxalafen usar innin ad imun. Tayri d uγenzu. Imenγi d talwit. A-ya ayd d-yuglen imenγri ger kraḍ illan γef tudert. Axatar isnaγes is da ttarew Gaya γas iwtman, a-ya ayed innan ad d-issufeγ imenγiten ixataren.

Seg dinnaγ, ayd iggulla ur ittarew γas tiwetmin, ittazen-tent i warraw n yirizen n Gaya. Yarew tarbat tamzwarut ig-as Gara yazen-tt i memmis s akal. Memmis ilha g Gara tuwey-as anelli. Meqqar dd imki ur ittu mma-nnes. Ayeddeγ as ifssus unezgum γef yigenna. Gaya txiḍ tazen iwetman-nnnes i tutmin n yignna. Igenna yuzen-d iwtman-nnes s akal, yaγ wafa g tudert, ssufγen-d tirgiga n wakal, iskawaren, izwuten d taγart. Iqqima imenγi imki abda n tudert, axatar isul da inedder ar ittini awd yan i-iran g tudert-a, Gaya da treggem ass g teswangem g uwtem. Iḍaq wul n umeẓẓan g waddad g illa. Ikka ger bba-nnes d mma-nnes a’ten-isemsasa, maka iṛmi-ten ugin tamunt. Awd yan iran ad issuref i wayeḍ. Allig iṛmey umeẓẓan yazen-asen azemz ad ten-issuḥel!…

* Asemmumey-a ittuldi-d g (La Théogonie d’Hésiode) d kigan n tirra g yiger n tesnamya. Ittusseker usemmumey-a g waγan n tmucuha ttinin imezwura-nneγ ḍart wafa.

Tssaγul-tt, tsemmumi-tt: ZAKIYA ULAΣLI

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *