Unuγ n Muḥend Ameẓyan SΣIDI

BARBI D WALES IMEDREG

0 72

Iqqim di tafuyt, ifser idaṛṛen-nnes ar iseksiw s akal. Ur tt-yuwiy g mad izerrin tama-nnes. Ad dars tili attayen n xemsiyen εam; ibda da yettusir. Ibayn is ɣifs tekka tmara. Awd adida nnil-as ur-t-idiṛunja.

Jjuṭiyt n Leqriεa g Darlbiḍa ag id-s jemεeɣ. Nek walfeɣ ad dduɣ s jjuṭiyt neɣ lxwerda. Da degs ttafaɣ kra n tikkal kra n udlis neɣ tasɣunt taqburt; tzemred ad tafed tasɣunt n xemsiyen derhem ɣas s rebεiyen ryal. Yat lmerrt ufiɣ adlis n Sigmund Freud s meyaderyal. G jjuṭiyt, llan ixemmalen. Da ttsaran id g iḍ g yizeglalen iɣwezzafen n Kazablanka, ar ttqellaben atiṛṛuten d id berkassa; s asekka-nnes ddun s Leqriεa, qqi-men g tafuyt, fsern ayennaɣ n iqerqucen-nnsen, siggen-asen iɣef. Da zzenzan. Unna itt-nadan ad yaf ! « Qui cherche trouve !» s tefransist.

Ass-nnaɣ ur ufiɣ walu. Ar seksiweɣ g urgaz. Γas ifser idaṛṛen-nnes ddaw iceḍran n yizenzaṛen n tafuyt. Inger yidaṛṛen-nnes yat talqubt n wuzzal, tetkar s waman. Da issi-rid yat Lpupya yufa-ts g zzebbalt, yawi-tt-dd ad tt-izzenz. Qqimeɣ nek ar degs-seksiweɣ. Lpupya tsul theyya. Mm-wallen tizegzawin d wazzar asfakkat amm tadṛatt, tancucin-nnes tizeggwaɣin izmummugen. Argaz imedreg ar issirid lpupya ẓund teεziz dars; tga amm teslemya.

S imik imik ar tt-issirid. Issard-as udem, issard-as taxemmuyt, d tancucin, issard-as tifassin ilkem tizukin, issird-as tidaṛin d tfednin. Mer as tsawel ? Ad as-tini: baba ! Qad inḍew , ikkas-d uklaffu n tugda tiyenzar. Qqimeɣ ar ttedsaɣ, ar tteḍsaɣ ar degs-seksiweɣ. Imik ar itteḍsa akwed netta ! Mayd yufa ? Nmiliɣ ad iẓireɣ, ssfeldeɣ, akiɣ d maɣ allig da itteḍsa. Tafuyt teḥma, izenẓaren ssuddan, imejjan ar sinṣigen. Ikk lhif akal ! Ar izmummug, ɣas iqucan-nnes asusen. Γemlen s tbaɣa neɣ kra nniḍen. Waqila aɣrum ayd as-issɣemlen tuɣmas. Ur tt-yuwiy g awd yan, ur yukiy s mayd illan nnil-as, ur da iseksiw ɣas dat-as, ur da isseflid ɣas i yiɣef-nnes. Greɣ tiṭ s mayd ifser, ad tt-izzenz, dat-as : afus n temrilt, snatt tzebgatin, kra n tbuqalin n imsuten, bizagrat, agudiy n tṣerrawin, snatt tjenway, tuzlin, tiɣwemdin n waskaren, sin ireggalen min tisura, tis-maqalin iṛṛẓan, id lqeṛs n usidd, lḥejrat n ṛṛadyu; yiwen ṛṛadyu aqdim n sis, kra n iselsa iccaren. Isares tama-nnes lkis n lqehwa mm εetriya d girru. Iqqim urgaz ar issirid lpu-pya. Ar itteḍsa! Da ittegga tigelgaḍ i lpupya ar itteḍsa. Kud as-ittegg tigelgaḍ itteḍsa…

Jules

Unuγ n Muḥend Ameẓyan SΣIDI

Unuγ n Muḥend Ameẓyan SΣIDI

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *