AZLALAM N YIYDAN

0 75

Tettwagdel (interdite) tfaska (fête du sacrifice) aseggwas-a, ayd ittini uberraḥ yales-as. Imezdaɣ tettemseksiwen, ka yukez, ka yugey. Aseggwas-a, idrus wactal g Meṛṛuk. Mek ɣersen medden i izamaren, imal ad ur ten-d-yaf. Ad terbḥem a medden, tettwagdel tfaska aseggwas-a (…) yuwen i ugellid d yuwen i ugdud-nnes. Ad iɣers Lḥasan i sin izamaren, winnes d win ugdud. Ilkem-d uneɣmis, mmerwalen medden.

Xes iɣra umezwaru s tẓallit, iccwu-tent Σalawi s tmezgida. Ixwla-t uzlalam n xalis iggal ittaker-t ar ass iggran. Inna lmudden llahukbar, ibiṭer (pédaler) Σalawi, ig tazwut. Ikcem s tgemmi, yaɣul anuddem, zund xes tawargit. Tifawt, s usekkel, issufeɣ-d azlalam, inhem-as ar ɣur tesnawit, iffer-t-inn ammas n yat teɣwda g iga wekbal (maïs) iferxan, ikcem ad iɣer. Ku ass iffer-t-inn g teɣwda ar d-iffeɣ g tesnawit yasi-t. Iḍ, areḥbiy ɣur wulli ag t-issensa. Inyadda wawal n tukkerḍa, iksuḍ Σalawi. Yuɣul iseɣ aṭṭas n lbantura tazeggwaɣt ad izel timitar n uzlalam awraɣ. Ur yuǧǧi Lemqeddem n xalis ameqjur g iεerrimen n iɣrem ur isdaddey. Yunef wakal isreṭ-t, izla unaɣiz n uzlalam. Iḍ hilli ayed issufuɣ Σalawi, s tuggda, azlalam. Tegraẓ-t akw t-yukren. Yuɣul iwet tanbaṭ, issili-t ar taberjiyt, ɣur wukus n waman. Ar t-id-ikettey allig t-ittu.

Tenmala-d tfaska, tennal azemmur. Mag akw nn-illa kan uẓeɣwad iεayen igran s uẓram d uɣellel. Azlalam, netta, xwant-as rrwayeḍ s mayed irɣa d tafuyt. Ass n tṛebεiyt, ass n muddayen, icwa-as ufus, s uyenna n medden, i umxib. Azemmur-nnsen iḍuf-t. Iḥeṛṛa-as i awedyan ad t-inn-inmili. Amm tafuyt, yaɣ akw Σalawi, s usara, igran. Iḍ n Σaṛafa, mmensun-nn ayt darsen ɣur Xalis. Xes ad ittubdar uzlalam iṭṭukey Σalawi. Issaɣ-as bu sin rrwayeḍ , siwriɣ. Mmensun, ffɣen. Tifawt urta iffu lḥal yurgu s Tizi n Imnayen ad d-inzeɣ anuguḍ asen-yakka daddas ku tafaska. Netta sɣur Leqayed han mayd akw igan win Lmexzen ar itterrida. Unna izrin gen ẓares εewwam. Tirufa qellben, ijellubay ssensren. Uress akw mayed ttinigen ! Yuwen s yuwen allig nn-igula mulley Σalawi, setterfsen-as ar tizukin, nḍ un ar t-seqsan “win mi ayed tgid?”, “mani g nn-tensid iḍ gam?” ɣurek igdi?”. Sulen da t-seqsan inḍ ud xalis :

– Winneɣ ayennaɣ !

– Tessend-t ? as-irura Umxezniy

– Win ultma ! Ẓer acehbun-indeɣ !

Rulen imxezniyn s ucehbun, isrugg-t Σalawi. G tgemmi yules-as i daddas; iqqim umɣar xes ar diges iseksiw. Amya ur t-yukiz. G uqerru-nnes, yuwey Σalawi is da ttnadan azlam awraɣ, azeggwaɣ xla dɣi ! Netta s tgemmi, iwet-nn ɣef Imxezniyen diɣ, unna izrin sbedden-t, ka seqsan-t, ka ufsen-t s Jeep n Jaḍarmeyya. Isrem Σalawi xes ur irẓim i ubeẓẓid. Ass-inu ameggaru aya, umẓen-i, umẓen-i.

Sin igdan yazun a ɣef d-fafan imezdaɣ. Γef ugadir, tama n dinna g ttyaglen igdan, ittyaru s uẓeggwaɣ anaw n idammen « dabaḥa xarufayen wadabaḥtum kelbayen », itteggan s tmaziɣt : « iɣers i sin izamaren, tɣersem i sin igdan.»

Amya ur t-ẓrin imezdaɣ, ɣersen i iḥuliyen s tuffra suḍen afa i uksum. Sulen da kennfen ayt Σalawi, temneqqer teflut, iwet-nn ɣifsen Lemqeddem n xalis; ar kennfen ifest, yazen afus issef tinnes. Mayd ila wass ittemrwal d imxezniyen, iggez diges laẓ. Iwta anzaf, issefru awal adwal. Σalawi netta, yufes tiɣmert, yumeẓ-t siwriɣ.

– Nniɣ-awen yad issefḍer iɣrem-a. Ur akw iri ad yaɣ g iɣerman. Iwa dduw-at, ha-kwen ayennaɣ taɣm-nn dinna g ur d-ttuɣulem, s ushirr d ugemgem ayed inna xali.

– Is ran ayt iɣrem ad ɣersen i yigdan a Tthami? As-irura bba.

– Unna ittečan Remḍan ad iɣers awed i tfednin-nnes! Tfu! G iɣreman akw n temnaṭ-a xes nekwni ag illa ka!

– I wenna nn-issiwiḍen awal n Iɣrem, imẓiy neɣ ixater, i Leqayed izrey wuẓum-nnes?

– Cchat-inw xes amm idd key nnik ayed asen-iɣersen maka hay-yi festiɣ! Nnameqquren a mayed akw igan aεerrim inessan ass-a abniq, ayd aɣ-inna xali, inker iddu.

Ur telkim tdeggwat allig ur d-iqqim i tgejda yusin tigwmma xes ad allant s mayd tessker jaḍarmeyya g iεerrimen n iɣrem. Iffeɣ-asen-d i midden Musulini, awal d uḍemmis. Mayed igen aεerrim xwemcen-t jaḍarmeyya. Da ikkat ujaḍarmi ar d-iwḥel iɣer i wayeḍ . Gen-asen mulley i yecirran allig uzzlen idammen. Ku ass d mami d-reẓmen, ku ass d mayed usin. Iεerrimen iffeɣ-nn iḍ n tfaska a ɣef tes-sakkan adwal. Bbin ɣifsen učči d tissi, ɣlin-ten s iguta ibzin g waman n tisent. G ubniq, ufiɣ-nn akw ayt Iɣrem, awed infalen. Xes ufesn-i-nn jaḍarmeyya aḥanu ntun imḍerrqen. Mayed akw igen bu igdan leqwfen-t-inn ass-nnaɣ. Yuwen ḍart yuwen allig nn-beddan ɣef Σalawi. Tella tegdit-nnes d igdan ittyazun imi n Iɣrem. Inekraf s mas akw nella nessen is ur igi Σalawi amya. Tedrus tfekka-nnes, tekk tewja-nnes tama i tsertit! Gulan-t-inn jaḍarmeyya ig uggaden g iḥruyen-nnes. Ur akw issin s tawda mas asen-ittrara. Gern-as altu asidd allig izwa imi-nnes, amẓen-t s tguta s waraɣ, ig t-ẓeyyren ig as-salwen allig druɣ d-nḍunt wallen-nnes. Sɣwejdmen-t, ɣren-d i bu Ddaktilu ad yuru aneqqis. Aseqsi as-kan, irar-asen allig nn-gulan tigdit iqerra-asen is as-ttyaker ass n umhad. Ayenna inna izemmem-t ujaḍarmiy. Mmutin s wufuɣ n yiḍ. Ur ǧǧin akw ffiɣeɣ s yiḍ imlas-ad izrin, as asen-irura Σalawi. Fsin-as tiguta raren-t-id s ɣurneɣ, asin yuwen yaḍen. G iḍ mayed ila ittenxsis Σalawi, εeṛṛmen-tt tseggwin-nnes s ireklan yumeẓ. Nek uwiɣ-tt g waḍu-new. Ur ssineɣ akw matta wudem s nn-kecmeɣ s tesnawit ig i-islellin. Gan-i-d Jaḍarmeyya yan yimeẓ n Huliwud, ammas n temsirt n tutlayt tanegliziyt ag i-d-hezzan. Ku yan yuwi-tt g waḍu-nnes, ur nektiy la fad la laẓ. Awedyan iwta yiṭs, tifawt ɣur tiss sa anfen-nn ɣifneɣ jaḍarmeyya tiflut. Gen-aɣ altu mulley, ad diɣ nrar i iseqsiten n yiḍgam. Slellin idsen, kerfen-d wiyeḍ. Meqqar imeẓẓiy iɣrem, llan kan imezdaɣ ur ǧǧin annayeɣ ar ass-nnaɣ. Ikcem jaḍarmeyya usurdu g idsen, isti-ten s iwri-nn, surrin-d wiyeḍ s ɣurneɣ allig stin yan sḍis g illa Σalawi. Unna ɣef akw d-smattren kan ineɣmisen ɣern-as. Zwuren s Σalawi, awal d uḍemmis. Ṭṭfen ɣifes tiḥellal. Ass-ddaɣ ɣef asen-inna ittyaker-as diges igdi, iffeɣ diges. Inna-asen-tt ka t-yannayen. Da t-kkaten ard iɣerd, yagey ad iqerra. Neqqim xes ar netterεab. Netta iggwed ad asen-yini nwis iffeɣ ad yaker azlalam i xalis; nitni inta usurdu ar ten-iɣelley. Ik-asen ukumanḍar anaḍ (ordre), n titi, asin-t s aḥanu n userfuffen. Ass mayed ila itɣewwat, xes ad d-inker g usxaf rnun-as titi. Asin-nn tabeṭṭant-nnes tadeggwat gern-aɣ-tt-nn. Rẓan-t g ufus, kken-as-d idammen imezyan xes ur immut. Nsul da as-neggar ka n waman, kecmen-nn jaḍarmeyya asin-t diɣ. Ufan-nn ɣures g tgemmi kan ccifun yuḍren s wanaw aẓeggwaɣ. Aẓeggwaɣ amm waddaɣ s yaru ka imi n Iɣrem. Ikcem-aɣ ṣafi usurdu awd nekwni, ur yad nukiz amya. Σalawi meεna ayed yarun g ugadir? Iɣres Σalawi i igdan? Nessen is ur akw iɣiy ula yeεlaḥal maka mani as-d-ikka ccifun? G iɣfawen-nnsen, nnan jaḍarmeyya nufa abrid s ayt igdan. Asin Σalawi sersen-t g uḥanu xes netta ad ur yaf awal s awedyan. Inekraf imezwura ar asen-reẓẓmen yuwen ḍart yuwen allig ur d-iqqimi g iεerrimen xes wattayen n simraw. Imeqjar d iskayriyen d imesswa n yiḍ d inelmaden amm nek d Σalawi ayed d-iqqiman. Ssaɣen-aɣ laẓ d fad bbin digneɣ awal. Mrid i uryaz n ultma ayed aɣ-itteεtaqen qad yawey laẓ s wass-nneɣ ameggaru. Iga amxezniy g Igwlmimen, yawi-d ka n wussan n berrmesyun ad iswunfu. Da ilessa iḥruyen n sserbis itkur tirufa s tiyni, ikcem-nn xes ammi ira ad i-yinniy. Ig da i-isawal ar xewwun inekraf yaḍen lajyab. Semmus as-nella g ssilul, ayenna ira akw yawi-t-inn. Nessen, isinen idd tareɣdemt as-nettwakraf. Σalawi ag sulen nurzen jaḍarmeyya, da t-kkaten irdel ar diɣ tteqqlen ar d-ifafa. Ar izziḍir Σalawi allig iṛmey iger-asen-t-id. Ccifun-nnaɣ tufam, winu ayed iga, ɣwmiɣ-iss azlalam as-ukreɣ i xali, ayed asen-inna. Irnu-asen : “Ad t-inn-tafem ɣur wukus n waman.” Ifukka awal-nnes irdel s mayed icekwcta d idammen ɣef uzlalam n igdan.

Yaru-t: ASAFAR LIHI

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *