assosiation taymat

ABDA IWJED, UR ISSIN MAYED IGAN MUḤUL D TAMAZIΓT UNFUS-NNES

1 174

Iga lḥal ṣṣif, akud n tigga1, tigira n wayyur n ɣuct 2955, ku yan mandi g nn-izzruy tigga-nnes! ka tama n yilel2 ka ɣur yiɣbula, macan Muḥend ur yufi aya, d ur idd is ur da as-ittiɛjib! ɣas anezgum n yimenɣi amaziɣ yusey ayd ur as-d-yuǧǧin mag ixemmez iɣef-nnes. Ameḥra ayd yaɣul g yitsent termudin3 ɣur yat tmesmunt g Yigwelmimen, ha-aɣ nbedda-d ɣifes g Yimteɣren af ad t-nasey s Mṣiṣi, af ad nezzri ussanen idelsanen imezwura n tmesmunt Taymat. Nufa-t-id iwjed yad ! Ismutter arrum4-nnes namez abrid s Mṣiṣi nn-illan g 150 km s izdar n Yimtɣren, kud netteddu ittzayad leḥma, ngula-nn taleggwat netta tafuyt tsul da tessekmaḍ. Ahil5 n wussan itkwar, macan tirmudin n Muḥend usint uggar n uzgen g uhil kullut. Semmus n wussan ku ass Muḥend seg mayed tneqqer ard teɣley ɣas tawuri; tifawin, da ixeddem d twetmin ; da asent-isselmad tiɣawsiwin n tigni, taleggwat, ar ittegga tiɣmi, unuɣ d tfinaɣ d yikerran imeẓẓanen , idd g yiḍ, diɣ hat win yimsawalen, bla ad nettu asefser n tfelwin-nnes nna da isekcamen tifinaɣ d tmaziɣt g wul i kull mayed tent-iẓran, ad tinit ussan n Muḥend aya, ur idd win tmesmunt Taymat. Muḥend igellin ur yufi ad iswunfu, macan meqqar ira leḥma ur da aɣ-ittaǧǧa, tenwa tmazirt ad tinit tafuyt ɣas nnig yiɣfawen-nneɣ ag tella, awd ka n umzuzwu ig ixdem ur da d-ittṣuḍ ɣas lhif, tzaydet-as kullu tiwetmin d yikerran n tmazirt ran ad umun g termudin-nnes d netta ur as-inɛeddal ad isexser i awd yan, ɣas tamummit6 n medden ayd as-isettun muḥul, ayennaɣ is isgadi tirabbutin, snat n twetmin d snat n yikerran, da itteffeɣ ka ikcem ka. Macan ayenna zrin yan sin wussan igulu-d umeddakwel-nneɣ Σumar Derwic nna iqqablen wahli n yikerran s cigan n termudin ula netta.

Seg mayed nesbedda tamesmunt Taymat g yanayer 2955 ayd nsewjad nekwni d Muḥend i wussan-a acku nra ad gen yan usender7 i tmesmunt, d uyeddeɣ ayd illan is as-gan yan utḥay axatar i tmesmunt allig teẓẓa iẓeɣran-nnes g tmazirt aya s uqqil8 n Muḥend ula Derwic d tmummit-nneɣ, agensu n semmus n wussan kullu iɣrem issen Muḥend, iɛezza darsen, tameṭṭut ula aryaz, axatar ula ameẓẓan d awd netta ɛezzan ɣures. ḍart wussan-ddeɣ Muḥend ixdem cigan i Taymat; idebber-as-d i yan udwal d tmesmunt Tiwizi n Swisra, nessker dides yat tsedlist d yat tansurart (ludothèque) arrum n tɣuri d semmust n tsedlisin g yiɣerman yaḍnin tasga n Mṣiṣi. g kullu ayeddeɣ, Muḥend abda, azgen n twuri ayd isskar ɣas tirewliwin, ger Yimteɣren d Mṣiṣi, ika seg luqt-nnes d jjib-nnes, d ur illi g yimi nnes ɣas : “ma k-illan !”.

Ayeddeɣ is ittwassen Muḥend agensu n Umussu Amaziɣ, tirmudin g iḥaḍer tisint is semmursent d ɛlayen azgen ayd digsent isskar, ur jjun issin mayed igan iɣimi ula tigga, ur inni ad isexser i awd yan, ad ikkes i yiɣef-nnes af ad ik i wiyyaḍ, meqqar diges nn-tusa ur inni ad t-id-issufeɣ, ula nnad icetku, iɣimi-nnes ur t-igi ɣas ig t-irdel yiṭeṣ s bessif, ima maḥedd reẓment tallin-nnes hat isniɣisen ayennaɣ d twuri. Tigemmi-nnes terẓem i ku yan, tuf zzawit, acku zzawit, medden ayd ttit-yusin ima tigemmi n Muḥend nettat ayd ten-ittasin… aya kullu ɣif yimenɣi-nneɣ amaziɣ igan unfus-nnes. Aswunfu g ufra a Muḥend ameddakwel !

Yidir ẒEQQURI

Amyaru amatu n Tmesmunt TAYMAT i Yidles d Tneflit n Mṣiṣi

Amawal:

– [1]: Vacances
– [2]: Mer
– [3]: Activités
– [4]: Matériels
– [5]: Programme
– [6]: Volonté
– [7]: Démarrage
– [8]: Grâce

Tawlaft: Alugu issker Muḥend AMEẒYAN SSΣIDI i tmesmunt TAYMAT

Tasghunt Idles

View all contributions by Tasghunt Idles

1 Comment

  1. Asafar December 13, 2014 at 01:04

    Igellin n Muh’end igzey amezruy s tad’fi agh-idrusen, nekwni Imazighen. Isbedda tirsal n twizi nettu ig, xes netta, tamsirt. Anaz’ur iga ila tibar n uzzid’er d twuri. Da ittnagh s tayri s yugem wul maci d umeqqet n icenga iserfuffen tawengimt. Xes s tayri as-ittnagh. Tayri-agi s t-id-nkettey ayed igan Muh’end. Muh’end d tayri. Tayri tceqqa, ameghnas isi’d; ger asen akud n ger itran d wakal. Tatri n Muh’end tenmala ulawen iran asaddi d ufra. Sin neh’waj iseggwawen-a n yighigh d uqra’h. Max is irra awedyan tayri ?

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.