tadinant

AΓEDDU N TDINANT

0 48

Tuzen-d izen tenna-yi mantur nesflid i ugerḍ-nnek. Neg tadeggwat ad nn-nemnaggar g yigran n yimariγen. Γef tdawt, usiγ-tt, tadinant, andah i ubrid . Mud inew ar ttalseγ i tezlatin riγ ad irireγ d mamek as-tent-sselkameγ. G yan wakud. Ar diγ kettiγ assufeγ n waggu n wagirru g tancucin-nnes g yat tikkelt. Teqqen allen ar Tessεcaq s usussem n uẓawan d waggu. Uliγ-d g umda n iswengimen-inew ha-tt dati mag nn-teqqimit? Tseqsa-yi d tfiras n wudem-nnes sseknent-i azmummeg issaren d tγufi, sin imalasen n war amyinniy a xali aya. Neddu ar ddaw yat tzemmurt illan ammas n yan yiger amiriw neqqim. Kammla fukkaγ asnem n tmawin n tdinant tessiγ i yuwen ar ttirireγ tizlit n tmacaḥut n Yidir ar ttamez anya s wagirru ittellin s waẓya d waẓya, iγmu waggu-nnes tazwut asin-t iẓenzar n tafuyt s yigenna, tseqsa-yi γef unamek n iwaliwen alseγ-as tamacaḥut n tsekkurt, s yikez issusem-tt ugar izli. Tillas iṭṭaren sbeddant irir d tkemmayt-nneγ, ar imi n taddart-nnsen, sguluγ-tt-nn.

Sin wussan zrin s twada n ifker ,neg ad nemnal g wansa nna nemyar, nufa-nn adγar yuḍer, iger usin-t waman, ar nettettiy iger s wayḍ ar unna izwan, g udγar issenfin, netta ayd yuḍern s ifsan n lkif d ukwerfa-nnes d takat n lfixer d yat thituret tabaliyt, kkan ayt tacqqufin da ayd as-nniγ ad neqqim diyes mayd bexxern i udγar, nsers tizukin-nneγ γef wakal ar nsawal ar i-ttales ussan-nnes n tesdawit d mamek tbda da tkemmey, alsegh-as ass amezwaru g usiγ ad lmdeγ i tdinant ar ttelmadeγ i tezlit n Yidir baba innuba, ar as-ttiniγ han mamek s tturrar ar ttirir idi, imiḥ ktiγ-d ka ixessan nniγ-as mani garru-nnem idd nniyt ur ti-ttiwiyt, tfest imiḥ tenna-yi mani tadinant-nnek zwar ay akennad, settuγ-as awal s wawal d-usiγ γef ilugan n tirra n tutlayt tamaziγt nγwbbez g tjeṛṛumt, ar tseqsa mantur ayd nettga tinzeγt i umyag d mantur ayd nbeṭṭu ismawen, tsettey afus-nnes tameẓ ifer azegzaw ar t-tsewrerray ger ifassen-nnes, ffeγaγ da ayd i-tenna seg tikkelt tameggarut g nemayannay ur urimeγ agarru d tura tra twengimt-inew yuwen, terna-yi.

Ddiγ ar tigemmi, ssirdeγ iḍaren itkaren s tidi d ugḍṛur kecmeγ aḥanu-inew, imik snaγseγ iba n tdinant g wansa-nnes, seqsaγ ultma tenna-yi hat iffer-tt baba g uḥanu-nnes uresss max, nger-d imensi ar nesflid i ineγmisen n Eljazira, mani tadinant-inew a baba? Ayd nniγ ifest imiḥ inna-yi ur ǧin tlid d walḥrufen-nnek seg mayd ak-d-yiwey igm-ak aqecbu-inn ukkfis aselmad n Math inna-yi ur yad da teqqart amm useggwas izrin d usar tannayt tadinant ar tγert mezyan. S tidet riγ ad siwleγ maka ka n tγawsa agensu-new tennayi rar-tt i wul-nnek tfest kcmeγ aḥanu-new, ukiγ s udḥac dat tektiwin n baba maka ur idd yat tdinant ayd illan, ar swengimeγ g wahli, anelli ar ittiziy γifi, γufaγ s tidi, kecmeγ yan udlis ad settuγ akemmer-inew . G iznen qqiseγ-as tinew, s uqnad d wul itebbin tenna-yi nwis mma-nnes tuta diyes aḍu n tbaγγa temzaray ides g teskalya n tberjiyt, yaγ usidd azeggwaγ tawengimt n mma-nnes, teggal s tgallit taxatart usar as-tikki awd aryyal ar tebḍu d garru, is trid aγ-tessiγt azwar g laεlu, mayd ira ad yini baba-nnem i imeddukkal-nnes d mani riγ ad sikkeγ udem-inew dat tutmin a illis n lḥram, as tenna mma-nnes s uzεaf, temqet iγef-nnes g uzmez g ṭṭaren γifes inuẓir n treggam temqet maγ ad d-tlal d terbat, d maγ ad ur yili γures uzref ad tesker ayenna tra war ad trar taγdeft i umetti yudan abuγlu ula tawja-nnes iskaren ayenna ukzen madden yaḍen, ulac masen-inmen.

Ḍart imkli n usekka-nnes, teṭṭaqes tafuyt g igenna, inker yan uzwu d-yusin agedṛur n umerdul s imawen n tadderwin, anezwi n uress, laḥ mani ikka yan laḥ mayd ifares awdyan, yat tγawsa ayd illan, asenned, ayd tt-ifran. Mmeγrdeγ ar tḥasabeγ ussan imyaren wiyyeḍ, gen γuri ismawen n imalas Acur, ur da kettiγ xes ass g tt-temnaleγ, kammla rnuγ yan imik han Numidya teγra-d g ttiliγri, tenna-yi nwad anemnal dγi dγi, s tidet tizwuri ur riγ, maka llig i-tenna nwis amukris-nnes issenγ-as allaγ, tra mayd as-isettun akemmer-nnes. Hezzaγ-tt s Ḥmad Ssleε, gulaγ-nn γures yinniy-i inna-yi ican ka ṛṛay, nniγ-as ican ka ṛṛay, iwa ssiγ, irar-i iwa ara amzeγ γures semmus n iγdduten n Philip Mouris snimmreγ-t asiγ kra n uγu amzeγ abrid s igran iṣinṣṣiyen n wazal n uwilan.

Tuwi-d aγu , twalf-t tafugla, ur k-ixessa xes kan tiyni neg tutra da, ayd d-tenna seg uεraq urta tt-nn-gulaγ nniγ-as ula dγy han iferxan d igwra d walim d tuga gan-am cchud ! ar tessa, neqqim fekeγ-as aγdduten, tenna-yi sber ad d-uγuleγ teddu s ḍart usklu n lluz tasid tadinant, mag tufit diγ tadinant a tanεimalt! tumez-tt γur illis n εemmi-nnes s iγnan, snimmreγ-tt, tt-d-yiwin neqqim tessiγ I wagarru ar tleddey aggu s wansa akw iγban g turin-nnes tessufeγ-t-id g yat tikkelt, armeγ nekkin tadinant is tnem , thyya! ur da kemmiγ maka ur da yi-isxub ka aḍu mek ikmi tama-new, ur i-igi Ṛebbi, ktiγ-d tizlit n Drusen winna yukzen n Imezna, ar tt-ttirireγ, tsexsey aγeddu, sbeddeγ aẓawan, nniγ-as maγ? Trar-i riγ ad idek muneγ g unya d iwaliwen, kkat nek ar ttirieγ, nbdu, s tidet γures agerḍ iḥlan , issusme-t yirir imiḥ han Yugerten d Σetman sussan-d kan tfruxt zrin γifneγ tkuren-aγ acḍaḍen s tiyni takalilut, neccur masečča d uγjdim nirir ku tasga imik tizlatin n Ali Amrane d Ideflawen d lwennas d Saγru d Tifyur ccarent aẓawan d ibucamen illan afella n isekwla aγ-ittin, swunfun yiman-nneγ ugar tali-d tatsa. Tessaγ i ugarru ameggaru ar itesmur ar ittesmur ides usidd n tafuyt, sulen-d kraḍ wussan i ṛemḍan, mamek nesskar ad nettmyinniy? Ar dinnaγ naf-as abrid. Nemsadam nbeḍu.

Ikcem sidna ṛemḍan, narem diyes laẓ d fad, neg timẓurin n taddart, mek neffeγ hill tadeggwat ad d-nawey akuffi n tin wučči. Ur yad da netmnal s wass, maka tga talemmiẓt ad naγ tacamma n uḍar g Beṛṛa n Id Beṛṛa d imeddukkal . Izrey imalas amezwaru γef imezdaγ amm useggwas, tetkur tmezgida ar imi s wenna iran ad issired iman-nnes g txendallasin n useggwas mayd ila, s tidet udmawen iteddun s tmezgida ig ifukka wayyur n laẓ da snimmiren Afqqih gen ides timnilit aseggwas d-iddan, ad ur timnilit ! nekwni nemnal g wammas n imalas wiss sin ḍart tin wučči g unsa-nneγ tawi-d tadinant d garru d tecamεin, neqqim ar nessflid i luqran n tmezgidiwin n tmazirt immezday g imezyan-nneγ, irwey amm talxca, ur yad nessin mayd nettameẓ nemyamaẓ ifassen ar tessufuγ aggu ammas n tillas, llig tfukka, neqqim ar netmsksiw azneγ udem-inew teswererrey winnes medzen wancucen-nneγ s taṭfi d waḍu n garru issiγ digneγ times n uṛamsu, msekcament tfekkiwin-nneγ s imik imik ar nessflid i llah ukbar. Sbeddeγ assudem-inew tenna-yi mak yaγen, nniγ-as ukzeγ kan usidd ikka-d aẓey-inn, inmili-d usidd akzeγ is ayt tacqufin ayd d-ikcmen ad assen diγ iγef s tγawsiwin n uduhdu; nemmuttey s yan uqbu n ufrux iḍran s wakal, neqqim nniγ-as ur i-tettired ass-a am-irireγ ka, swa maγef !!
– Is aẓawan as-d-nettddu mid ka yaḍen? Maγ allig da nettjmuε?
– Aẓawan-nnek iḥla γuri d riγ ad lmdeγ i tdinant d iḥla γuri iγimi idek, maγ mayd da neskar mar ad tinid aseqsi-nnaγ?
– Ukiγ tigiriwin-a is i-temyart wahli d ur kem-riγ ad tirid ka neγ tettert ka nna mi ur γiyeγ, ur riγ aqmmeε n awdyan, ur da zerriγ nekk imeddukkal-inew muneγ idem tta ur neccar xes tiddukkla d taymat!
– Uhu, ur ttinit imkinnaγ, tessent hat dima da ak-ttiniγ tḥlit γuri d ur ufiγ g iγrem-a mayd i-ittakzen ugar-nnek.
– Maγ ddag illa ma kem-ittakzen ugar-inew ad tegt tizizwit tayellt ẓares tezrit-i tezrit adγar-nnem.

Tfest ur tenni adu, nenker, ad tt-nn-sguluγ taddart-nnsen, imiḥ terrez ifesti, tenna-yi dima da ttiniγ g iγef-inew hat unna takit s uyenna ttakiγ, nniγ-as mas ttakit? Iεjbi uγjdim idek s yat daraja ur tγiyt ad tswert, dima riγek tama-new, tamzt-i afus, ayenna riγ afdaḥ. Ur igi afdaḥ xes mr ur iss tumint, afdaḥ da t-skaren akw madden maka ur da ttinin hat nra-t, da teskaren hill ,ccil-i hat ur baḍeγ g iγef-inew d ur da sselkuγ raγabat-inew ayenna riγ skreγ-t, ngulu-nn taddart tekcem kkeγ dinnaγ s γur ayt tacqufin.

Nemnaggar itsen wussan ḍart wa, nmun ar adγar nniγ-as mani tadinant i-tennit ad d-tawit, trari-d mani aγeddu tennit ad d-tawit, ur d uwiγ aγeddu d ur d-tuwi tadinant nennaγ. Nemsisi nuγul diγ nennaγ.

Yaru-t: Masin AGNAW

Virginia , US , g 02/22/2016

Tasghunt Idles

View all contributions by Tasghunt Idles

Leave a reply

Your email address will not be published. Required fields are marked *