Ḥamid QECMAR neɣ amzil n teklut

1 77

 

 

 

 

 

 

Ilul Ḥamid QECMAṚ g useggwas n 1969 g yiɣrem n Tdiɣust g Waṭlas Ameqqwran Anammas, 78 Km ɣef Yimḍeɣren. Idfaṛ tiɣṛi-nnes tamenzut g yiɣṛem-nnes ngum ad iddu s Imeknasen ad digsen issker turagt n tesnudert. Aseggwas n 2006, iddem Amaster n Tẓuriwin Tifalkayin g tesdawit n Haward g tmurt n Marikan. Ḥamid d anaẓur amekla amaziɣ. G umagrad-a, ad nesnil taẓuri-nnes d kra g yirmuden-nnes.

G tizwiri, mek naɣul s uzday illan ger umdan d yizamulen ifka i tmust d tɣerma-nnes, ad nini nwis da ittnaɣ ad tent-isti ɣef tiyyaḍ, ad asent-ifek udem azedgan d-inezzɣen allen. Tussniwin tilsanin amm Tantṛupulijit da tsenmal taẓuṛi s tenfalitin8 isskar umdan af ad isiwel ɣif yiɣef-nnes, ayenna s iswingim d uyenna ittidir s kigan n yimassen. Izmer ad ig tasekla, aẓawan neɣ tamekla. Tameggarut-a ag yamu Ḥamid QECMAṚ. Yusi ɣef uɣweṛd-nnes taẓuri n Maziɣ s yincew af ad issken tamaziɣt d timmuzɣa i umaḍal akw.

Mek nra ad nsiwel ɣif tfelwin n unaẓuṛ-a iqqen-aɣ-nn ad nisin iẓuṛan-nnes. Tiwuriwin-nnes, llant aha digsent tfinaɣ, izamulen imazrayen n tɣerma n Tefrikt Ugafa. Da yissent isskan issikta d uswingem n ayt zik af ad isiwel ɣif imir-a. Tifinaɣ ucckant kigan n yiseggwasen g twengimt n Umaziɣ, innaɣ s tẓuṛi-nnes af ad tent-issider ifk-asent udem atrar acku ur gint ɣas tirra, gant awed afus n umennuɣ awmus.
Anaẓur issekren g tiṭ tirsal n tfelwin-nnes, nettat ayed igen tacfawit-nnes, nettat ayed igen iles-nnes. Unna iẓran tiwuriwin-nnes ad t-yakez. Da aneɣ-ismuddu g umaḍal ur nettiẓir ɣas s tẓuri. Allalen s ittwar Mass Qecmar ɣiyen ad gen aluḍ, iselli, akecciḍ, alim, atg. Awettas g wanect-a ad yili wudem amaḍlan g tẓuri-nnes.

Ttufesrent tfeliwin-nnes g kigan n tmura amm Marikan g ittidir d tin Uṛuppa. Aseggwas n 1990 g Utillu Art Spiyes g Mugaḍur n Umeṛṛuk. Iga, altu, anebgi n usefser agraɣlan n tẓuri tatrart g yiɣrem n Nis g unẓul n Fransa d ulmuggar agraɣlan n tẓuri n yigudar g yiɣrem n Bufuṛ g Franṣa. Ittusnebga awed g tmurt n Spanya g yiɣrem n Liyun. Ikka awed Asalay “Textile” n Tuṛunṭu g Kanaḍa…atg. Ifka kigan n yisaragen ɣif tẓuri d tmust g waṭas n tesdawitin d yiɣerbazen imajgalen g tmurt n Marikan.

Taggara, yusa-d ad ssektiɣ is nla inaẓuren d tnaẓurin s aɣ-iqqen ad nburez. Igellin n Muḥend SΣIDI, igellin n Mḥemd ISYAXEM, HAWAD, Leḥbib FUAD, Faṭima MELLAL, Muḥa ẒELMAD d wiyyaḍ d tiyyaḍ. Taẓuri-nneɣ ur ǧǧin teggujil. Hamid QECMAR iksa-as i tmust s tẓuri tazedgant, isselkem tamaziɣt d timmuzɣa s ansiwen g ur tettwassen. Maka, nekwni, Imaziɣen, is nessen akw inaẓuren-a ? S tudert n winna iddren digsen ad ten-niẓir g twuriwin yaḍnin, swunfun yiman n winna d tinna ur isulen.

Yaru-t : Anumid.

 

 

 

 

 

Tasghunt Idles

View all contributions by Tasghunt Idles

1 Comment

  1. Sifaw March 1, 2019 at 18:16

    tanemmirt Anumid. ur jjin ssineɣ is illa unaẓur-a 🙂

Reply Cancel

Your email address will not be published. Required fields are marked *

This site uses Akismet to reduce spam. Learn how your comment data is processed.