Σumar DERWIC

ΓWẒANEN IS NEBBUJJED NEZDEY G UDUHDU

2 87

Ilmend n ukettay n tsekra n tiliẓri tiss 8t

Ayenna as-iga uγlif n usegmi i tmaziγt ayd as-iga win umsawaḍ g Merruk. Amezwaru yusi-d iselmaden n taεrabt d win tefransist izzrey-asen kuẓ n wussan n “usileγ” irẓem-asen akw ur ta lmiden isekkilen n tmaziγt, nnan-asen yimennebḍen nwis gan diγ iselmaden n tutlayt tamaziγt!

Meqqar d-ssafγen yimnuda d yinawuren n Usinag Ageldan n Tussna Tamaziγt idlisen d wallalen n ussγer n tmaziγt ur illi g wakal mayed ilan afud d tussna d-yusan i uzizzel d uselmed n tutlayt-a tigellint tagujilt.

Akw ur ssinen yiselmaden-nneγ d tselmadin-nneγ ad γren urun tamaziγt daccen ad tt-sseγren i yinelmaden d tnelmadin! Aya as nezmer ad nini nwis gan yiselmaden-a d tselmadin-a γas inelmaden d tnelmadin n tmaziγt. Ihi, skareksen-asen yimennebḍen!

Iwa walu mayed asen-ittinin i yimennebḍen-ddeγ nwis da tturaren s tutlayt n yimelyan g Yimaziγen d Tmaziγin raren-ten d islemyiwen d teslemyiwin. Azwar iga-t yifesti n willi d tilli ttininin nwis gan imeγnasen d tmeγnasin n Umussu Adelsan Amaziγ lumen winna d tinna nn-aγnin irbi n udabu amerruki munen ides g tsertit-nnes issumumen amussu amaziγ ameqjur.

Wiss sin yusi-d yitsen yimesnilen isnilin izlan iqburen g umaṭṭaf n tmaziγt izzri-ten s tiliẓri tiss 8t nna d-iγref udabu i Yimaziγen d Tmaziγin. Zwar, iddeγ ur ta telli tiliẓri-a, ifka-as uγlif n yineγmisen i tmaziγt mrawt d semmust n tusdidin nna bḍant tantalayin n tcelḥit d trifit d tmaziγt kraygat yat s semmust n tusdidin-nnes, ar zzruyen akw ayennaγ s yat talγa tamazdart g ttalsen i uneγmis kraṭ n tikkal imseṭfaren! Medzen yimannayen d tmannayin zund ikemmayen n uγwenfif.

Tiliẓri tiss tamt (8) γas uṭṭun-nnes da d-isskan tattekkwant tamazdart nna as-ran yimennebḍen g Merruk i tmaziγt ad nn diges teqqim. Ddaw tnila n umsemmus (axwemmas) ag nn-udren i tutlayt tamaziγt d winna d tinna tt-isawalen; agensu n tiliẓri-a, idrus mag nettinniy tiγawsiwin issemγuren Imaziγen d Tmaziγin: Asselku izdey seg wawal ar tirra ikk γef tugniwin!

TV Tamazight

Tawlaft yuseey umyaru i “TV Tamazight”

Asussen meqqar da ibedder timukras n Yimaziγen n temnaḍin issatem udabu amerrukiy seg mayed t-tesdif Fransa ur da isgidiy γas imuyuden n tezlatin d uẓawan s inurez ad itteṭṭef tawna i winna d tinna isul isselka. G usussen n tiliẓri tiss tamt, illa yiwen umur istin i yimudaren d yigḍaḍ d yibuxxa; uress idd Imaziγen aymi da isskan udabu ayennaγ neγ imarrayen sγufant tmura-nnsen igan γas adida d waggu d waqqur!

Isura neγ ssinima yuger uyenna n taεrabt win tmaziγt meqqar nessen atig ila usuγel n twuriwin zwarnin; maca maγ allig ur illi usuγel n yisura n yiṛumiyen neγ n winna ur igin Aεraben? Aya n tmukrist da d-tezzuγur aγlif n yidles ur da ikkaten anfa g yidles amaziγ, ur issin γas i tukki n tiqqar i wawal amaziγ!

Tirra s tmaziγt, nezmer ad nini nwis illa diges usselku axatar acku da nettinniy izeggalen ur tteggan yinelmaden d tnelmadin imkinna nesniγis azzur n tirra s taεrabt d ussdid n tin tmaziγt neγ akw ukus n tmaziγt g wahli n wahilen zund anezwi g tettili tmaziγt d taεrabt g yismawen n yiγerman n Merruk, ur da tettili γas taεrabt g yismawen n yiγerman n Dzayer d Muriṭanya d Fransa d Iṭalya…atg

Illa diγ yiwen usselku ameqwran addag da isawal kra g Yimerrukiyen s taεrabt tigelgelt, ur illi usuγel n wawal-nnes s tmaziγt zund tga tamaziγt. Yager wawal n tẓallit d usγan zund ur llint tmukrisin ggudinin γur yimannayen d tmannayin imaziγen!

tv8_02

Tawlaft yusey umyaru i “TV Tamazight”

Mek nezrey s tiliẓriwin yaḍnin n Merruk, da nettafa is ur fkint γas yitsent tusdidin i uyenna mi ttinin “ineγmisen”; tuger-ten tin 2M nna ur da d-issufuγen awd udem n umesnil n yineγmisen, ar aγ-sγilen is nn-ngula aswir n Euronews matta γas ufur d ussitem n wudem amaziγ isawalen s tmaziγt ur ta ittusseγran g tesdawiyin d yisinagen unnigen nna d-issufuγen imassanen d tmassanin γwebbeznin g tussna tamaziγt. Idd Tiliẓri 1ut, meqqar da tezzruy ayenna mi tettini “ineγmisen” γas ayenna tga yad s taεrabt ayd tettales s tmaziγt tagel-asen-d I yimannayen d tmannayin tirra n taεrabt zund ur da tettyaru tmaziγt!

Ad nemmattey s tudert tamatut g nesniγis assefreγ n yismawen n yidγaren d tmizar d ugdal n tutlayt tamaziγt g mayed igen tadbelt. Idd ismawen n teslemyiwin d yislemyiwen, sulen wuzlan n yimennebḍen n uγlif n ugensu da ttebbin ulawen n yimarawen ittusemraran zund tislemyiwin ar ttusdiddiyen ad ssurfen g uzref-nnsen d win tarwa-nnsen, isal wuggug amgelmaziγ (anti-amazigh) ur da izzruy γas ismawen ira d winna t-iwtan s yiγnan sriwen tixwba i yinififen-nnes!

Maca aya ifka-t-id uduhdu d wumun d ulluzzu n Umussu Adelsan Amaziγ ur igin tawuri-nnes n usfafa n yimezdaγ ad amun g umussu: winna d tinna iγran ayd iγiyen ad afen iberdan s keccmen agdud zzrin-as tiktiwin n ufafa d tamunt d ullelli d tussna n yizerfan.

Tella tmatart aγ-isskanen adhac-nneγ dat umukris n yinekraf isertanen imaziγen: Mesṭafa USAYA d Ḥamid UΣḌUC nn-isulen g ukurmu sḍis n yiseggwasen aya nisin gar azraf nna ten-inn-igran γur yimakren d yinemmetla n tidet. Seg mayed d-icaccey udabu iherdan-nnes n tama taberẓelmaṭ ad sxuben aḍu i yimeγnasen imaziγen g tesdawitin ayd d-yaγ udduxeccu n tuddsa tamaziγt ur issinen mimek tettrara γef yiγef-nnes. Tamukrist-a da aγ-tnezzeγ s amxuzzu g illa Umussu Adelsan Amaziγ g tesdawit issalin tirsal-nnes γef wawal iggudin d tigiwin drusnin. Ur da nsennegzu amur n wawal g usfafa d ussikez n yimezdaγ d tmezdaγ maca uress is da nn akw ittgulu wawal illan timizar d yiγerman d mayed digsen iddren!

Ar tettugu tuttra-a: “Matta wenna neγ tenna nn-iqqen usfafa d ussiwey n yimezdaγ nna g illa umata ur iγrin? Tili tririt-nnes nwis d winna d tinna γranin fafanin ayd nn-teqqen twuri-a taxatart!

Maca Timaziγin d Yimaziγen γranin drusen digsen winna d tinna fafanin: Iga ufafa-nnsen zund kra n uxelbic, da ittwakkas naf-nn aduhdu d gar tussna d tferγi d tkerkas. Seg mayed d-ilula Umussu Adelsan Amaziγ g tesdawiyin ur illi diges mayed d-issafγen kra n tesγunt s tmaziγt ad tsiwel γef twuriwin d tektiwin d tmariwin n Yimaziγen d Tmaziγin! Tawuri illan, idrus kigan mag da d-tetteffeγ iγwerban n tesdawit. G uwilan, uress mani da ittekka Umussu-nneγ !? Da iswilin g yiγerman d yiγemran ar izuzwu ar ittirir g tmeγriwin mek tent-ufan!

tv8_03

Aya n tmukrist tekka-d tuddsa ur illin d ur da fellas isawal awd yiwen; ayennaγ as ur da nettafa azday n twuri d ummezday d umur yaḍen n Umussu illan awd netta maca iwer-inn i tesdawiyin.

Amussu Adelsan Amaziγ ur illin g tesdawit gant-t tmesmunin imunen d usaḍuf n Merruk, ulint s tzemmar n winna d tinna ifkan akud-nnsen d yidrimen-nnsen af ad ssikzen winna d tinna ufan da γursen ttekkan; maca aṭṭan yaγen timesmunin ikka-d kigan degsent illan: kra ira ad ig tawuri frun-as-tt wiyeḍ, kra akw ira ad ig tawuri yasey g yidrimen nna as-ittufkan zund timesmunin izdin tiwuriwin-nnsent d Usinag Ageldan n Tussna Tamaziγt.

Ufan yitsen yixendallasen tawuri tadelsant d abrid n uskirkes γef yimezdaγ d tmezdaγ itteqqlen s kra n tnumi d twuri issiliyen ikey maca ur ukizen mayed illan datasen zziγ imeskireksen neγ ikennaden! Illa yiwen wanaw amaynu n tmesmunin, amata digsent issker-tent udabu amerruki, tiddeγ lant tawuri g tneflit neγ asnegmi! Winna d tinna fellasen illan gan yitsen medden d-uznen yimennebḍen n uγlif n ugensu ad kksen imezdaγ i tmesmunin tidelsanin ssiwidnin s uyenna zzruyent i yimeẓγan d tmeẓγin. Iggru yiwen wanaw n tmesmunin isskaren tifaskiwin neγ igwdad: Illa uyenna iγudan g uyenna sskarent akw tmesmunin-a maca ad ur nettettu nwis tent-ran yimennebḍen i wuṭuf n tawna d ussehwu.

Iwer-inn i tuddsiwin-a, qqiman wahli n yimegga d tmegga ilellilyen maca gguten digsen yinegmaren d tnegmarin ittnadan maymi zzenzan tilelli-nnsen s watig amazdar!

Timetti tamaziγt meqqar da nettinniy uṭuf-nnes s asγan da nesniγis nwis iga γures zund učči neγ tessi: Ur tenγi tẓallit akeddel d unnefrureγ g twuriwin d wawal; ur iggudiy γas takendawt d uselmed n tmunnaḍ.

Σumar DERWIC

Amawal (vocabulaire):

Bbujjed: être naïf; aγlif : ministère ; asileγ : formation ; imennebḍen : responsables, autorités ; aduhdu : ivresse ; imesnilen : présentateurs ; iherdan : chiens ; taberẓelmaṭ : extrème gauche ; assiwey : conduite ; swilen : estiver ; tiddeγ : celles-ci ; atig : prix, valeur ; asγan: religion; akeddel : trahison

Σumar DERWIC

View all contributions by Σumar DERWIC

2 Comments

  1. Yafelman March 8, 2014 at 15:16

    Da ssirimegh ad akzen ineghmasen n Tmexzniyt TV awal n DDa Lghaci ! Maka ahayyayha !

  2. Adrar March 9, 2014 at 14:40

    – Asselku izdey seg wawal ar tirra ikk γef tugniwin!
    – Maca Timaziγin d Yimaziγen γranin drusen digsen winna d tinna fafanin.
    – Ur tenγi tẓallit akeddel d unnefrureγ g twuriwin d wawal; ur iggudiy γas takendawt d uselmed n tmunnaḍ.

Leave a reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Nba