Idles Magazine

Max Idles ?

« Idles ». Nestey assaγ-ddeγ ger kigan n wiyeḍ af ad nessekti i tsutiwin tasγunt «Idles» d-tessafeγ Tmesmunt Tadelsant Tamettit Tilelli (Tizi n Imnayen) d tizwuri n iseggwasen 1990. Tekka tessafeγ-d Tilelli sin wuṭṭunen, tbedd. Tur-a, neddem tawuri-ddeγ acku amentil-lliγ γef ttnaγ Tilelli, igan asbuγlu n yidles amaziγ, isul idder. Idles amaziγ isul ittuselka g tmurt-nnes. Da itleqqaf iman acku ittugra γer tama. Awanek ameṛṛuki ur γurs awed yat tsertit tadelsant iran ad tessudu idles-nneγ γer dat. Da yekkat γas af ad t-ineγ.

Max tasrit ?

Nestey tasrit acku tedrus g yidles-nneγ atrar. Kigan n imyura da tturun γas tamedyazt. Iẓil ad tili tmedyazt, maka yuf diγ ugar ad ilin awed wungalen, ilin-t tsiway n umezgun d wamuden n tulluzin. Tasγunt-nneγ tin winna akw itturun tasrist g tmura n Tmazγa. Nsul ad d-nessufeγ g wayyuren d-iddan kigan n iḍrisen aγ-d-ilekmen s akw tmizar n Tefriqt n Ugafa.

Tawinest «Idles» :

Tawinest Idles sbeddan-tt kra n imyura imaziγen illan g Tmazγa Tutrimt. Iswi-nnes amezwaru iga-t usyissen n iḍrisen n imyura ur ǧin d-issafγen kra n yidlisen. Asenfar n twinest-nneγ igat ussufeγ n idlisen n imeslaḍen-nnes g tizwuri d winin wiyeḍ imyura mek nufa iwes.

Ha-yaγ negra taγuri. Da nnesirim ad as akw tisellim.